لقاء الأحبة/زهرة البستان (1-2-3) 27/8/07-18/1/08-16/3/2008

**محمود** · #1 27/08/2007, 23h20

لقاء سماعي/زهرة البستان (الأول) 27/8/2007

أول كلامي سلام ..

كانت أمسية رائعة بكل المقاييس. لقاء أعضاء سماعي بالقاهرة انعقد في مقهى بشارع صبري أبو علم. بالصدفة الإسم الذي يحمله الشارع غني عن التعريف وكذلك الميدانين الشهيرين الذين يصل بينهما .. ميدان طلعت حرب وميدان عبد االسلام عارف. الحضور لم يكن كثيفا كما تمنينا ولكن بارك الله في القليل وأحسب بعد تلك الأمسية التي ستجد لها مكانا في وجدان كل من حضرها أن الحضور في المرات القادمة بإذن الله سيكون أكثر. تعارفنا وتناقشنا وضحكنا وتناولنا موضوعات كثيرة. عن المنتدى ؟ ... بالتأكيد ، وعن غيره أيضا. عن الأعضاء؟ .. طبعا ، لم نترك عضوا إلا ندفنا وَبَرَهُ وَبَرًًًََ وَبَرَة. عن الموضوعات الساخنة على المنتدى؟ .. هذا لا شك فيه. وعن الحياة والأسرة والذكريات. الحاضرون كانوا نخبة في غاية العظمة: من اقاهرة كان هناك عمنا محمدالآلاتي والأستاذ غازي الضبع ، من بنها حضر الأستاذ أحمد البنهاوي (أم نقول الكابتن أحمد البنهاوي؟) ، ومن الإسماعيلية نورنا الأستاذ حسن كشك (ولكن بدون كيس المانجو الموعود). كان هناك أيضا ضيفين كريمين حضرا مع كل من الأستاذ حسن والأستاذ أحمد. والله تمتعنا وتبادلنا ارقام الهواتف وعناوين الإيميل ، وكانت أحاديث الآلاتي الشيقة أحلى ما في الموضوع واتفقنا على أنها تجربة تستحق التكرار. يكفي أننا خرجنا منها بروابط أكثر متانة بيننا كأشخاص وزال من بيننا حاجز عادة ما يعوق التواصل والتقارب ألا وهو ذلك التخاطب من وراء حجاب حيث كل يجلس في داره ويخاطب شخصية افتراضية رسمها خياله أو ربما وعيه وفقا لما تجمع من معلومات ووفقا لقدرته على تجميع تلك المعلومات ونسج تصور من خلالها لتلك الشخصية على الطرف الآخر من النت. أزعم أن هذا الحاجز قد زال بين من التقوا الليلة وأتمنى أن يزول بين باقي الأعضاء. الأستاذ حسن والأستاذ البنهاوي استأذنا مبكرا وقد اتصل الأستاذ حسن وطمأننا على سلامة وصوله إلى الإسماعيلية فيما كنا أنا والآلاتي وغازي ما زلنا مستمتعين بالسهرة اللذيذة... حمد الله على السلامة يا حسن بك.

آه .. أهم حاجة ، طبعا حضراتكم منتظرين الصور .. أنا قمت بالتقاط بعض الصور كما قام الأستاذ حسن بتصوير بعض لقطات الفيديو. من جانبي .. هذه هي الصور التي التقطتها أو التقطها أحد الحضور بكاميرتي (تستطيعون الاستنتاج بطبيعة الحال من وجودي في بعض الصور. حسب رغبة بعض الحضور أترك لكم ربط الصور بالأسماء (شيء أشبه بامتحانات المدرسة (صل كل كلمة من المجموعة (أ) بما يناسبها من المجموعة (ب). طبعا لأنه أول امتحان فأكثر من نصف الإجابات معروفة من الصور السابقة في المنتدى ولكن يبقى البعض لتجيبوا حضراتكم عنه. الحل في العدد القادم (بعد 24 ساعة من الآن). الحقيقة أن حضور غازي كان مفاجأة جميلة كانت ستزيد جمالا لو أن د. راضي والأستاذ المشاعلي تمكنا من الحضور كما وعدا. سننتظر أضعاف هذا العدد في المرة القادمة ولكن المشكلة أن رمضان صار على مرمى حجر .. كل عام وحضراتكم جميعا بخير.

مع تحياتي

محمود

**غازي الضبع** · #2 28/08/2007, 08h44

الحقيقة يا جماعة ...
الجلسة بتاعة إمبارح كانت ناقصاكوا كلكم
فعلا كانت في منتهى الجمال ..
وزي ما قولت لكم رغم إني حاولت النوم الساعة 3 صباحا .. وعارف إني هاصحى 6 صباحا
إلا أنني من كتر ما فرحان بالمقابلة اللي حصلت .. ماعرفتش أنام ..
من كتر التفكير ..
حسن شرح الموقف أو الصورة حلو ..
أنا كمان وانا رايح كنت حاسس نفس الإحساس بتاعه ..
بس أنا لما دخلت القهوة .. جات معايا عكس حسن خالص ..
حسن مالاقاش أو ما شافش الجماعة .. بس هُم عرفوه وندهوا له ..
أما أنا بالعكس .. عرفتهم بسرعة جدا .. ورحت لهم .. بس هم اللي ما عرفونيش ..
وليهم العذر طبعا لأنني طبعا ما كنتش حاطط صورتي ..
لآ وحسن المدقدق كان فاكر - ولا زال فاكر - إن دي صورتي ..

لا داهية لا تكونوا إنتوا كمان فاكرين إن دي صورتي ..

دي صورة عمنا عبد الوهاب يا عم حسن ..
لأ ويقولك إيه : طلع شكله غير صورته خالص

هههههههههههههه
...
بس كان فاكهة القاعدة كلها كان عمنا محمد الآلاتي ..
راجل موسوعة على رأي عنما محمود رزق .. ( رجل مهذب جدا يا جماعة )
والطيبة والأخلاق واضحة جدا على وجهه السمح ..
أما حضرة الضابط أحمد البنهاوي .. شاب جنتل قوي ..
بجد مش عارف أوصف لكم سعادتي الكبيرة .. لدرجة تكاد تصل أن أتهور وأطلب منهم نلتقي يومياً ..
بس طبعا كل واحد ليه ظروفه ..
عم محمود رزق كان جاي من الإسماعيلية .. من شغله .. على عندنا ..
وعم حسن كمان نفس المشوار ..
وحضرة الضابط أحمد كان مسافر تاني يوم للإسماعيلية ..
( مش عارف إيه حكاية الأسماعيلية ) ..
بس السهرة اقتصرت عليا والأستاذ الآلاتي والأستاذ محمود رزق ..
واتكلمنا في كل حاجة .. في الموسيقى ، في الفن ، في السينما، في السياسة ، في أسباب هبوط الأغنية ، في السيرة الذاتية لكلا منا ......... في حاجات كتيرة قوي ..
وبجد عمنا الآلاتي طلع حكاية كبيرة قوي قوي ..
وغنى لينا وعمل كام مقطوعة موسيقية كده بفمه ..
بجد يا جماعة .. كل من لم يأتي فاتُه كتييييييير قوي
........ بس ملحوقة إن شاء الله

**حسن كشك** · #3 28/08/2007, 10h55

بجد
كانت المقابله رائعة جدا جدا جدا
وكأننا كنا نعرف بعض من سنييييييييييييييييييين طويله
وانا حكيت خلاص
ويا استاذه ساميه
كنتى معانا انتى ولولى
عشان الجماعه جابوا سيره الاحتكاك الاخوى بيننا
وكلنا اتكلمنا عنكم كلكم
وكانكم قاعدين معانا
وايضا لاحساسنا بانكم عيلتنا اللى ماجوش معانا
واحلى الامانى فيك يازمان
لقا الاحبه فى كل اوان
هو ده التعبير والاسم اللى حسيت انه ينطبق
على لقائنا
باذن الله عادة ولن تنقطع والعدد يزيد بيكم باذن الله
واول ست هتشرفنا هتشيل الحساب
مش هى مساواه ولا كلام وبس
ولعلمك يا استاذة ساميه
مكانتش قهوة بالمعنى المعروف
كانت كافتريا تقريبا وكان فيه ستات قاعدين
والمكان كان اسمه وخدى بالك
زهرة البستان
ملتقى الادباء والفنانين
ومرفق صوره لينا وكل واحد عليه اسمه عشان ماتتحيروش

**احمد البنهاوي** · #4 28/08/2007, 10h57

اخواني الأعزاء السلام عليكم طبعا مش هاقدر اتكلم ولا اوصف حاجه بعد اللي قاله الأستاذ محمود والأستاذ غازي لأنهم قالو كل حاجه ممكن تتقال عن الفرحه باللقاء وانا صراحة لا استطيع ان نصف مدي فرحتي بهذا اللقاء حيث التقيت فيه بصحبه جديده متميزه وكما يقولون معرفة الرجال كنوز فقد استمتعت كثيرا بالحديث مع عمنا محمد الألاتي واستمتعنا بخفة دمه المتناهيه وسعدنا كثيرا بحيث الأستاذ محمود رزق وكذلك عمنا حسن كشك وكانت اكبر مفاجاة هي حضور اخونا غازي بصراحه عمنا محمد الألاتي هو كان اول واحد وصل مكان اللقاء وكنت انا تاني واحد ومتعبتش ان انا الاقيه لأني عرفته من صورته بس سالته وتاكدت لما لقيت جنبه الورقه المكتوب عليها اسم المنتدي وكان هو لماح اكتر مني لما قالي من غير ما يشوفني قبل كده انت احمد البنهاوي المهم قعدنا نتكلم حوالي ربع ساعه وبعدين لقينا مين بيدور علينا كان الأستاذ حسن كشك هو بصراحه ما كانش شايفنا بس انا عرفته وقلت لعمنا محمد كده هو ده فقالي نشوف وبخفة دم متناهيه قام ناده بصوت عالي في اتجاه تاني وقال يا حسن لقيناه بيبص فتاكدنا ان هو سلمنا عليه وبصراحه قاعدتهم الأتنين مكنش ينزهق منها شويه ولقينا شاب غايه في الأدب والجنتله بيسال داخل بيسال علينا او عرفنا فقلنا ان هو اكيد من المنتدي وكانت المفاجاة ان هو الأستاذ غازي ودار بينا الحديث اللطيف اللي هو حكاه عن موضوع الصوره (وبصراحه يا استاذ غازي انا كنت فاكرها صورة مرسومه ليك

) بس شويه ولقينا بقه مين بيدور علينا عمنا الكبير وصاحب الأقتراح الأستاذ محمود رزق المهم ان القعده كانت رائعه ومش هاحكي تفاصيل الحديث لأن الأستاذ غازي والأستاذ محمود حكوه بس انا قلت احكي عن سيناريو اللقاء بصراحه انا لسه لحد دلوقتي سعيد جدا بهذا اللقاء وقلت لا يمكن اسافر الشغل قبل مكتب عن مدي هذه السعاده طبعا شوفتو الصور وشوفتو فزورة الأستاذ محمود بس مش انا اللي لابس بنطلون جينز زي ما قال الأستاذ ايهاب

عموا انا بشكر كل الأخوه اللي كانو معانا في اللقاء علي السعاده والفرح اللي فرحته بهذا اللقاء واتمني ان يتكرر كثيرا بس في اجازتي عشان اعرف اجي ادامكم الله جميعا وحفظ الله منتدي سماعي الذي اصبح بحق بيت العيله

**محمود** · #5 28/08/2007, 12h48

أول كلامي سلام ..

أنا بقى كان لازم أنزل المشاركة الأولى اللي فيها الصور لأن طبعا متوقع ان كثيرين منتظرين أخبار اللقاء وكيف سار ومين اللي حضر ومين اللي ظروفه ماسمحتش. بعدها نمت مادريتش بنفسي لأني كنت صاحي من سته صباحا وتوجهت للعمل (قرب الاسماعيلية. خرجت في الرابعة متوجها للقاهرة وصلت البيت (شقة حماتي في الدقي) رميت اللاب توب التهمة وشربت مية ونزلت جري على وسط البلد. المشوار إلى المنزل كان معاناة لأن منطقة 26 يوليو إلى عبد المنعم رياض كانت مقفولة بشكل غير عادي وهو ده السبب في العطلة دي كلها. وصلت زهرة البستان حوالي الساعة 7:30 (راجع مشاركتي الأخرى في الموضوع التاني لتعرف التفاصيل).

عزيزي إيهاب ،

المعروفين سلفا طبعا مفيهمش مشكلة. الغير معروفين سلفا جنابك تاخد فيهم خمسة من عشرة. أنت وهاني بك اللي بينقش من ورقتك وتطابق الإجابات ده حيضيعكم في الكنترول. غازي صح ولو اني شايف انه مغير الصورة وحط صورته في المشاركات بدل صورة عبد الوهاب (آل يعني فاكر نفسه أحلي!!!) مع أنه هو الذي طلب سؤال الأعضاء عن شخصيات المجتمعين وفي الآخر هو اللي بيغششهم!! أما أحمد بك البنهاوي فهو لابس قميص أزرق مقلم وبنطلون غامق في أقصى اليمين. كده يبقى لا تذاكر ولا غيره وانت والمحروسة تاخدوها كعابي من الصعيد الجواني وحتى زهرة البستان لحضور اللقاء القادم. طبعا هي مافيهاش صحة للمشوار ويبقى بركة يا جامع.

عزيزي المشاعلي أبو علم الأحياء كله ،

طبعا كنت معانا وسيرتك الحلوة لم تمر مرور الكرام. لكن كان نفسنا نشوفك. اتكلمنا عناستعدادك للحضور وتمنينا المانع يكون خير وإسهاماتك في المنتدى والإشراف وكمان عن معاونتك للآلاتي في استعادة ملفاته المفقودة. الجايات اكتر من الرايحات يا باشا.

العزيز سمعجي ،

كان نفسنا تكونوا معانا كلكم. طبعا اللقاء القادم حينور بيك بس تجهز لنا كام حاجة حلوة لأن انا متأكد أنك شخص مش عادي. وكذلك اليوم أكيد لن يكون يوم عادي جدا.

المهم المفاجأة الكبرى كانت طبعا حضور السيد غازي بعد ما نشف ريقنا وكان رافض الحضور ومصمم على يوم الجمعة. حاولوا يعملوهالي فزورة ويشوفوني حاعرفه ولا لأ. حتى لما قالولي بتاع الفوازير اللي جه في ذهني غازي لكن المفروض غازي مش جاي والشريط عمال يكر مين تاني بتاع الفوازير غير غازي .. مين .. مين الآخر الآلاتي قال ده أللي ماكانش مفروض انه جاي... بس!!! ... كده يبقى غازي ولا أحد سواه. الأستاذ أحمد البنهاوي عرفني بنفسه بذوق وجنتلة لافتة للنظر وكذلك بصديقه الذي حضر معه .. وبدأت سهرة لم أستمتع بمثلها من سنين. الغريب أنا كنت جاي في الطريق متوتر قليلا وفرحان .. الحقيقة لأول مرة مش لاقي كلمة عربي توصف احساسي بالظبط لكن كنت EXCITED إنما برضه شايل هم الجلسة اللي حتبقى رسمي وكلها أهلا وسهلا واحنا سعداء اننا شفناكم وأشياء من هذا القبيل اللي بتحصل بين ناس أول مرة يتقابلوا لكن الحقيقة أن بمجرد أن جلست شعرت فعلا كأني وسط أصدقاء أعرفهم من سنين. لم يكن هناك أي جليد ليذوب ولا تعارفات مطولة. الجلسة بدأت حميمة ومرت بسرعة غريبة. قائمة الخسرانين لا تضم فقط من لم يحضر ولكن تضم أيضا إثنين ممن حضرواوفاتهم متعة إكمال اللقاء لنهايته لما سخن الآلاتي وطلع ما في جعبته. الراجل ده يا جماعة فعلا موسوعة. فاكرين عبد الله أحمد عبد الله (ميكي ماوس)الله يرحمه ونبع معلوماته الفنية الذي لا ينضب. الآلاتي عامل زيه بالظبط في النقطة دي زد على ذلك معلوماته الموسيقية الوافرة وغناؤه الممتع وقدرته على عزف مقطوعة كاملة بفمه مقلدا أصوات جميع الآلات الموسيقية (مش آلاتي بقى). اتكلمنا في أبواب المنتدى المختلفة ومحتوياتها وفي بعض المشاركات التي كانت علامات مميزة أو حولت اتجاه مناقشات ودروس الموسيقى وتحليل الأغاني وجت سيرة د. راضي وأحمد الديب. ربنا يفك غربته ويرجعه الكويت بالسلامة علشان نعرف ناخد حسه. وكذلك جت سيرة د. أنس وسامية وإيهاب وهاني وسمعجي واسباب لخبطة الأعضاء بين هوبا وهاني والأستاذ حسن (Talab) والمهندس محمد علي ...كتير والله مش عاوز انسى حد من اللي قلِِبنا في سيرتهم. طبعا ماتنفعش القعدة من غير سيرة ام كلثوم وعبد الوهاب والسنباطي وطلب والموجي وعدوية وشعبولا وأسباب انهيار الفن وانهيار كل حاجة وخدنا درسين مزيكا على الماشي. حسن والبنهاوي .. كده ممكن تعرفوا انتوا خسرتوا قد إيه. أتمنى اللقاء القادم يكون قريب والعدد يكون أكبر (أعتقد جازما أنه حيكون أكبر).

العزيزة سامية ،

أظن كدة بلغ السيل الربى وغيظك واصل من الكويت لحد مصر. ENJOY .. على فكرة مفيش أي مشكلة في جلوس الستات على المقهى لأنه أشبه بالفيشاوي مع زحمة أقل بكثير وجلسة مريحة أكثر. يعني فيه أسر مصرية وأجانب والترابيزة اللي جنبنا كان عليها أسرة من ضمنها ست كانت بتشرب تفاحة وكان فيه أسر وستات تانية كتير. يمكن تلاحظي من الصور.

مع تحياتي

محمود

**غازي الضبع** · #6 28/08/2007, 18h20

الله يحفظك يا عم صلاح السويفي يا جميل ..
خد الصورة دي كمان حطها معاهم ...
..........
وقولوا لي إيه رأيكم

**حسن كشك** · #7 28/08/2007, 21h29

معلش يا جماعه
ده فيلم فيديو عن اللقاء اللى تم
لكن اعزرونى لعدم جودة الصوره
لان المكان كانت الاضاءة فيه خافته
وماكنتش عامل حسابى على ضوء
اضافى معلش
وكمان حاولت اضغط حجم الملف
الى اصغر حجم ممكن عشان الرفع
يعنى ده مقتطف صغير من اللقاء
وبأذن الله المره الجايه تكون افضل
__________________________________________________ _______
يالولو مساء الفل
انا يبهزر معاك ومسيرنا نتقابل
باذن الله وانا ياستى اللى هنادى
على الجرسون واطلبك كانز كوكا
مش شاى والحجات البلدى دى

**الألآتى** · #8 28/08/2007, 23h22

أقول إيه .. مش لاقى كلام .. فعلاً مش لاقى كلام أقوله بعد كل إللى قالوه حبايبى وحبايبكم ..

المجموعة كانت صغيرة فى العدد .. لكنها كانت كبيرة فى الحميمية والدفء والمشاعر المتدفقة ..

أنا شخصياً أعتبر نفسى أسعد الموجودين والفائز بالجائزة الكبرى فى هذا اللقاء ..

وفى هذا يحضرنى مقطع من أغنية ( شفيق جلال )

حلوين قوى ماعرفش لمين ... وأحلى من كل الحلوين
أقول كمان وأحلف يمين ... وأفضل أقول على طول حلوين
قوى .. قوى .. قوى .. قوى ... والنبى طعمين

أتمنى تكرار اللقاءات وزيادة عدد الموجودين .. لكم جميعاً كل حبى وتقديرى ..

**حسن كشك** · #9 19/01/2008, 12h50

اخى سنيور محمود
اولا كل سنه وانت بخير والعائلة بمناسبة (عاشوراء )
وطبعا دى كانت حجه ليك عشان ماتجيش وتدارى كسلك والبرد اللى خلاك تدخل تحت البطاطين - ويفوتك لقاء من اجمل لقاءات الاصدقاء - لكن كنت معنا والله بروحك وكان الجميع معانا سواء حضروا ام لم يحضروا
اخبار اللقاء بدون تفاصيل ( سيتم كتابة كل التفاصيل فى مشاركه لاحقة )
حسب الاتفاق توجهت الى القاهرة انا والاخ ( عماد جمعه ) وبعد ملفات وبحث وتوهان - وصلنا الى زهرة البستان - تقريبا فى حدود الساعة السادسة الا الربع
جلسنا فى نفس مكان لقاءنا الاول حتى يعرف من سيأتى مكاننا لاننا ملقناش حد مستنينا وخفنا يكون الموعد تأجل ولكن كنا سنعتبر اننا عملنا اللقاء انا وعماد وخلاص - وبعد اتصالات تليفونية - عرفنا ان المايسترو ابو حسام فى الطريق هو والاخ ايهاب عامر قادمين
وصل المايسترو ابو حسام ومعه المهندس ايهاب وكان اللقاء الاول بينى وبين ايهاب وخد عندك احضان وقبلات بينى وبينه وبين الاخ المايسترو ولم اسلم من تعليقات ولذعات الاخ المايسترو ابن البلد ( المؤدب )
حضر المهندس عادل السيد وتوجه الى وقاللى انت حسن واخذنا بعضنا بالاحضان وجلس وبدأنا نتحاور
وحضر الصديق غازى الضبع وكنت قد كلمته تليفونيا قبلها بيوم وعرفته باننا سنلتقى ولم يتردد غازى فى القبول والحضور وكان اخى المايسترو قد وجه له دعوة سابقة ( فقد كان غازى واحشنا كلنا )
المفاجأة الكبرى
هل علينا كالبدر ( النحيف الرشيق الوسيم ) الاستاذ سيد المشاعلى
وتوجه على وقال حسن واخذته بالحضن ( يااخى بناخد بعض بالحضن بمجرد ان نرى بعض انا وباقى الزملاء )وبعاطفة جياشه محبه غريبه وجميله
ثم بدأت المشاريب تنزل والكلام الاحلى يدور - وعرفنا ان الدكتور خضر - اعتذر فى اخر لحظة - لظروف عمل طارئه
وماتم فى الحوار ستعرفه فى مشاركه قادمه
حضر اللقاء
استاذ محمد ابو حسام - استاذ سيد المشاعلى - مهندس عادل السيد - استاذ غازى الضبع - مهندس ايهاب عامر - استاذ عماد جمعة - والعبد الفقير الى الله حسن كشك
وشاركنا تليفونيا
د محمود - ام مريم
كما هنأنا باللقاء تليفونيا فى لفته جميله ورائعةالاستاذ رؤوف المسيرى ( الباشا )

وانصرفنا فى حدود الحادية عشر والنصف مساءً

انا بكرر ماكتبته فى الدردشه هنا عشان مانحيرش الاصدقاء
اما بخصوص ززززززز خلى الطابق مستور ياعمده

اما بخصوص الحساب اللى انا دفعته
فاانا باحضر صور الفواتير عشان ابعتها للاخ الشوبكى - والدكتور خضر صاحب الدعوه - والاخ محمد زمنطر عشان يبعتولى الفلوس كل واحد حسب عمله بلده - وماينسوش البقشيش

**حسن كشك** · #10 19/01/2008, 19h22

فكرة حلوه ياسنيور محمود حكاية مثبت اللقاءات دى

لكن هانغير اسمها من لقاء الاحبة الى اى اسم تانى مثلا - لقاء سماعى بس - او لقاء الاعضاء - او اى اسم اخر تختاروه
وبعدين يا سنيورمحمود الكل كان متشوق للقائك وسألوا عنك - وزعلوا فعلا لعدم حضورك
فى البداية عرفنا وتأكدنا ان الاخ خضر لن يحضر لظروف عمله الطارئة - وانا اقوله انى بعد مارجعت اكتشفت رساله منه على الخاص يطلب منى العنوان بالتفصيل وترك رقم موبايلة وكتب على الرساله عاجله - واسف والله يااخى خضر لم ارى الرسالة الا اليوم - اسف يا خضر باشا
ويا اخى كمال انت كنت محور حديث طويل جدا - بعبقريتك وقريحتك الحاضرة وكلماتك الرائعة والكل لم يختلفوا فى انك فنان وشاعر كبير ولك مكانه كبيره فى قلوبهم
واجمل ماكان فى اللقاء اجتماع اعضاء سماعى ونهاوند فى لقاء رائع لكن كان الملاحظ ان الجميع كان لمنتدى سماعى تقدير كبير فى قلوبهم ولا يوجد فرق بين الاعضاء فى المنتديين
وكان اللقاء يجمع بين الحكومة والاهالى- الحكومه هما المشرفين - امثال سيد المشاعلى - عادل السيد - غازى الضبع والباقى كانوا الاهالى
ودار حوار رائع بيننا وبين الجميل الرشيق الشيك البارون السيد المشاعلى - وهو بحق يستحق كل تلك الالقاب واكثر - ومحا ذلك الحوار الكثير مما كان حادث من سوء فهم فى فترة معينة لا اعادها الله - ويا استاذ سيد لاتنسى اثراء موضوع الخط العربى بمشاركاتك الرائعة ومتنساش الملفات اللى هاتبعتهالى
وكان اللقاء الاول الذى جمعنى بالمهندس / عادل السيد وكان جاى لابس كل الهدوم التقيلة اللى عنده فوق بعضها وكان اقرع بعض الشئ نتيجة مشوار الحج تقبله منه الله - وهو انسان ذكى ونشيط اوى - وفيه شبه كبير اوى اوى من ابن عمى وانا قلتله الكلام وعمل لنا مسابقة صغيرة عن اسماء ممثلين الصف الثانى فى اوائل الافلام المصرية وسقطنا كلنا فى المسابقة والالاتى خد تقدير ضعيف وكان المهندس عادل شايل معاه شنطة سيديهات افلام قديمة بينسخ منها الاغانى اللى فيها
اما اخى محمد الالاتى فكان المحفز فى الكلام وكان بيناغشنا كلنا بكلامه الظريف الجديد وكان بيرش علينا سجاير سوبر وكان كلامه بيزيل الحواجز بيننا جميعا وخلى القعده رائعة وقعدة صحبجية
اما صديقى المهندس ايهاب ( ابو قلب ابيض طيب ) فكنت متشوق للقائه جدا واخذته بالحضن الشديد وكان فى صامتا متأملا فى بداية اللقاء - لكنه انطلق فى الحديث عن المنتدى ومايتمناه فيه ونواحى القصور التى يتمنى ان تعالج فى المنتدى - بحق ايهاب مهموم بالمنتدى فعلا ويحمل له اخلاصا كبيرا كبيرا- فعلا ايهاب يعشق منتدى سماعى بحق وكنت اتخيل ايهاب فى حجم اكبر لكن وجدته حاجه محندقه كده وظريفه
اما بلدياتى عماد جمعه ورفيق السفر وللعلم هو من العماليق جسديا - فكان فرحا باللقاء ومقابلة الاخوة الاعضاء وكان مبهورا ايضا طول الوقت بما يدور امامه وبذلك اللقاء الرائع وكان مستعما اكثر منه متكلما - وله العذر لكن انا متأكد انه تعلم واستفاد الكثير جدا من ذلك اللقاء
وكان حضور غازى شئ جميل ورائع - بناء على دعوتنا- ولبى دعوتنا بحب ودون تردد واشتياق فنحن اصدقاء مهما كانت الامور ومهما تغيرت الظروف وستبقى تلك الصداقة الى الابد باذن الله - لكنه ازداد سمنة وبدانه - لكن روحه الرائعة كانت فى توهجها وبريقها المعتاد وتناقشنا فى امور عديدة - وصدقونى لم اجد بداخله حزن ولا الم ولا يحمل اى زعل فى قلبه لاى حد ولكنه كان يملؤه امل كبير فى مستقبل تزال فيه حواجز وسوء فهم - بل كان يحمل كل تقدير ومحبه لكل اعضاء ومشرفى سماعى زملائه واخوته - اذال الله سوء الفهم - كنت رائع ياغازى ولابديل عنك فى كل اللقاءات
وتحدثت الينا الاخت الغالية - ام مريم - كلمتنا كلنا واحد واحد كانها وسطنا وتحضر اللقاء - ولكن كانت تسقط منا بعض الكلمات لعيوب فى الشبكه وكنا بنعمل نفسنا سامعين لكن كانت حاجه رائعة منها والله
وكانت ايضا مكالمتى مع الاستاذ رؤوف المسيرى رائعة وازالت كثيرا من صدرى من موقف نهاوند منى فى ايام سابقة والاخ الباشا راجل محترم جدا وزكى وقد عرف انى من اكلمه من اول كلمه رغم اننا لم نتحادث تليفونيا من قبل وماعرفش عرفنى ازاى لكن مكالمته داوت فى جرح كبير راح لحاله فشكر ياباشا
وقد كانت تراودنا فكرة ان نذهب بربطة المعلم الى الصيدلى ادهم عثمان فى صيدليته لكن تبين انه ليس موجودا ولم يرد على اتصالاتنا لان الرقم كان رقم الصيدلية واكيد كانت قافلة وهو فى البيت عشان سنانه بتوجعة - الف سلامه ياادهم باشا- وقد فكرنا ايضا فى الذهاب الى الدكتور راضى فقد وحشنا والله - والسياسه حاجه والمحبه حاجة تانيه - لكن عرفنا انه فى وقت امتحانات وتصحيح ونتايج فأجلناها لمشاغله - تتعوض
ودار حوارنا فى كل مناحى المنتديات وكل مناحى الحياه وكل من فى سماعى وبالاسم ولم نترك واحد الا بعد ما نتفنا فروته من اول محمد زمنطر الى اخر عضو فى سماعى- لكن والله الكل يعشق منتدى سماعى
وباذن الله الصور تنزل بعد النقل للسيرفر الجديد