(مذهب)
سنة فاتت يا سئيل *** وبلدنا ف هم تقيل
والشعب زهق وبيصرخ *** ارحل ومعاك قنديل
سنة فاتت يا سئيل
وجماعة الخير وياك *** وعشيرتك برضوا معاك
والشعب ان كان ولاَّك *** بيقولك طفح الكيل
سنة فاتت يا سئيل
كارت احمر فى الميدان *** بيقول ارحل يا هامان
فرعون كان م الاخوان *** واتاريك اكتر يا رزيل
سنة فاتت يا سئيل
سنة فاتت وانت رئيس *** وبموكب زى عريس
فاكر نفسك عتريس *** وفؤادة مالها مثيل
سنة فاتت يا سئيل
وفؤادة مصر بجيشها *** شرطتها وبحرافيشها
وبناتها قبل شبابها *** بيقول ارحل يا جميل
سنة فاتت يا سئيل
وفؤادة مصر الخضره *** ان غابت تفضل حاضره
وان حضرت تدى محاضرة *** تدرس جيل ورا جيل
سنة فاتت يا سئيل
لا جماعة ولا تنظيم *** له بينا مكان ومقيم
دى وطن وسكن ونديم *** يسقينا شهد النيل
سنة فاتت يا سئيل
سنة فاتت ياسئيل
رد: سنة فاتت ياسئيل
العرض المتطور
