احبائى
اقدم لكم نوتة
سيرة الحب كاملة
اتمنوا ان تسعدوا بها
هنا ملحوظات مهمة انا فى الافتتاحية الاولى عملتها على ميزان يعنى اكيد انا مركز على الموضوع ده ان الجملة الادليب احيانا ممكن تكون من النوعية التى تصلح للكتابة على ميزان , وطبعاً ناس ممكن تسأل ما معنى نوعية تصلح للكتابة على ميزان , معناها ان الجملة مقسمة بالتساوى او محددة شوية غير الادليب بيبقى منطلق , وطبعا ده انا شىء عامله بالذات لمساعدة الاحباء الهواة والمبتدئين وللعلم اقول لكم سر ان الادليب لو انت مش حافظ اللحن بنسبة 90% على الاقل مش حايطلع مضبوط , يعنى احنا ايام الزمن الجميل لما كانت النوتة توضع امامنا لأول مرة , احنا كنا بنقرأ الجمل اللى على ميزان عادى امر مفروغ منه يعنى المايسترو او قائد الفرقة بيعطينا السرعة , لكن الادليب لازم الملحن يعزفه على العود او يغنيه امامنا كذا مرة والمايسترو يتشبع بالجملة بحيث ان هو بيقودنا واحنا بنقرأ , او لو جملية غنائية المطرب بيبقى حافظها وانا بتابع مع المطرب وعينى ع النوتة يعنى زى ماقلت ان الادليب النوتة بتكون استرشادية , لكن لو انت مش حافظ اللحن تمتم حاتطلع حروفقد لايكون لها معنى
هنا فى اللحن ده ارجو تاخدوا بالكم من الاختلاف فى السرعة يعنى انا طبعا كاتبها مبسطة بأعلى درجة وحتلاقوا ان بين مازورتين السرعة بتتغير فجأة من 140 الى 100 طبعا مع اننا ناخد بالنا من التحويلات المقامية الكتير والمفاجئة ايضاً , وهنا احب اقول ملحوظة ان اللحن ده بيحتاج تجويد فى الغناء او العزف يعنى هو كنغمات سهل جدا اسهل من اى لحن تانى ولكن قوته فى حلاوة الاداء
مع اطيب تحياتى واهديه لأخى العزيز نور الصباح بمناسبة عيد ميلاده واهديه لجميع الاخوة الاحباء فى المنتدى
احبائى
اقدم لكم نوتة
النيل نجاشى
واهديها للأخ العزيز نور الصباح
كما اهديها لكل عشاق الاغانى الصعبة بل المستحيلة
يعنى هذه النوعية من الاغانى ( اغانى عبد الوهاب القديمة ) تعتبر اصعب الالحان فى التدوين اطلاقا وانا للعلم كتبتها كنوع من التحدى مع نفسى , لأنى متأكد ان اللى ممكن يكتبوا هذه النوعية مش موجودين نهائيا اليومين دول وانا حبيت احس انى لسه شاطر يعنى , وصعوبة هذه النوعية من الألحان انها من مطلع الاربعينيات كان مفيش تدوين موسيقى يعنى كانوا بيحفظوا اللحن من عبد الواب على العود , والمشكلة هنا عبقرية عبد الوهاب الزائدة , يعنى كان بيعمل حاجات فوق مستوى التدوين يعنى مش ممكن حد يقدر يدونها
( وانا قلت لكم قبل كده انه كان كل فترة بيعمل لحن مستحيل حد يقدر يؤدية كاملاً عشان يثبت لنفسه وللناس انه عبد الوهاب المستحيل ) والعملية دى بتخلى التدوين صعب جدا لأنه فى عبقريته بيخرج عن كل قواعد الموازين والمقامات والمشكلة الخطيرة فى التدوين انك لو حبيت تلتزم بالقواعد الاكاديمية للتدوين ممكن عشان تظبط الموازين تغير حاجة فى اللحن ودى طبعا مشكلة المشاكل او كبرى الكبائر , لأن ملايين الناس وبالذات عشاق أو مدمنى عبد الوهاب حافظين اللحن سمعاً زى ماهو , واى تعديل حتى للظبط العلمى ممكن يعمل اختلاف على الاقل الناس ممكن يقولوا انا مدون اللحن وفيه اخطاء
ولكن عشان عادل صموئيل ونابليون كانوا مايعرفوش المستحيل عندى الحل انا دونت اللحن بقدر الامكان بأقصى خبرتى المطلوب عشان تعزفه باكبر قدر من الجودة انك تكون حافظ اللحن من تسجيل عبد الوهاب 100% بعدين تمسك النوتة وتطلع جزء جزء واكيد حاتوصل .
فيه كمان مشكلة خطيرة فى التسجيل ايام الاغنية دى ان كانوا لسه ما اخترعوش شرائط التسجيل وبالتالى المونتاج , كانوا بيسجلوا على الإسطوانات الحجارى القديمة وكان الاسطوانة وجهين كل وجه 3 دقائق تقريبا فكانوا بيقسموا الاغنية نصفين وعند التسجيل كان يتم بأكثر الوسائل بدائية يعنى لازم كل وجه من الاسطوانة يتسجل مرة واحدة بدون توقف ولو حصل اى خطأ فادح ولأنهم كانوا الأول بيسجلوا على قرص شمع وكان غالى الثمن جدا كانوا بيرموا قرص الشمع ويحطوا واحد تانى , والكارثة دى كانت بتخليهم يتغاضوا عن اى غلطة صغيرة فى التسجيل , وتيجى هنا الكارثة دى فى التدوين يعنى عشان اظبط المازورة دى بدون ان اغير فى اللحن اللى الناس حافظينة ممكن افكر فيها كذا ساعة , والمشكلة دى طبعا انتهت مع ظهور التسجيل على الشرائط لأن الغلطات كانت بتتشال فى المونتاج
اتمنى ان تعجبكم النوتة ولكن بشرط ماحدش يستعملها غير لما يكون حافظ اللحن جدا والتسجيل موجود هنا
مع اطيب تحياتى
عشان خاطركم يهون كل التعب والمجهود لأن اكتر شىء يهمنى ان تستفيدوا منى
التعديل الأخير تم بواسطة : عادل صموئيل بتاريخ 11/02/2010 الساعة 14h37
احبائى
بعد طول انتظار وتكرار الطلب على نفس الاغنية
اقدم لكم اخيرا نوتة
حبيبتى من تكون
هنا فيه ملحوظة فيه اجزاء صعبة فى اللحن لكن طبعا النوت الاسهل اللى انا بقدمها لكم اكيد بتفتج المجال انكم تعزفوا نوت اصعب شوية يعنى انا حاولت التبسيط على ما اقدر لكن التبسيط لازم يكون بحيث تسهيل القراءة مع عدم الاخلا باللحن , المقدمة الموسيقية طويلة جدا وتعبتنى بجد لكن انا قدمتها كاملة ما اختصرتش منها , انا بعمل حساب ان ممكن اى انسان يستفيد منها حسب احتيجه يعنى ممكن فرقة محترمة فى اى بلد تعزفها واكون مسرور لو انهم يحسوا انى قدمت لهم كتابة حلوة تريحهم فى العزف ويقتكرونى ( بعدين )
من الملحوظات المهمة فيه فروق سرعات فجائية كتير ناخد بالنا منها ( لأن السرعة مراقبة بالرادار ) وطبعا النصيحة الدائمة نحاول نسمع التسجيل كويس الاول عشان نبقى فاهمين حانعزف ايه
انا طبعا اول ماخلصتها ما قدرتش اصبر للصبح قلت انزلها فوراً يمكن يكون حد سهران ويسعد بها الليلة
مع اطيب تحياتى
نشكرك استاذ عادل
على المعلومات القيمه والمجهود الضخم الجبار واضح ان نوته حبيبتى من تكون مليانه لفت نظرى سريعا فى الصفحه الاولى المازورة14 وجود 3شرط فوق بعض فهل معناها نفس 3 نغمات فى المازورة السابقه مضافا اليهم النغمه الرابعه الجديده فى المازورة الجديده ولكم جزيل الشكر.
عزيزى ابو كارم
انت بتسأل اسئلة مهمة وانا احب هذا النوع من الأسئلة لأن العملية اولا مش انى بكتب نوتة وخلاص ولكن من خلال النوتة ممكن نستفيد دروس مهمة للمستقبل
عشان اشرح لكم الموضوع اتكلم شوية انت لما تشوف العلامات الايقاعية عندك بنبدأ بالروند ثم البلانش ثم النوار دول اول مجموعة بعدها الكروش والدوبل كروش والتريبل كروش والمجموعة الثانية دى اسمها علامات ذات السنون يعنى الكروش بسن واحد والدوبل كروش بسنتين والتريبل كروش بثلاث سنون وهكذا , والتدوين الموسيقى يحتوى على علامات او اشارات اختصار لتسهيل شكل النوتة يعنى ان لو كتبت روند معناها انك تعزفها روند ولو كتبت روند وفوقها شرطة واحدة يعنى انك تعزفها لكن تقسمها الى علامات من ذات السن الواحد يعنى تعزفها 4 كروش , لو الروند عليها شرطتين يبقى تقسمها الى علامة من ذات السنتين يعنى دوبل كروش يعنى تعزف نغمة الروند دى 8 دوبل كروش ولو الروند عليها 3 شرط يغنى تقسمها علامات من ذات ال 3 سنون يعنى تريبل كروش وهنا تسمى تريمولو يعنى بقوس الكمنجة بنعزف النغمات السريعة دى
اتمنى تكون المعلومة وصلت وراجعها على الشريط حاتستوعبها اكتر , واشارات او علامات الاختصار اهم وظائفها تسهيل شكل الكتابة وقد قمت بعمل شرح مرفق هنا لمزيد من تفهم الموضوع
مع اطيب تحياتى عادل صموئيل
التعديل الأخير تم بواسطة : عادل صموئيل بتاريخ 14/02/2010 الساعة 12h56
احبائى
اعتذر عن الغياب عنكم وساغين 3او 4 ايام تانى لأن عندى ظروف قهرية ومشغول جدا
هنا انا اقدم الملف الخاص بشرح علامة الاختصار لأخى ابو كارم عشان تحسوا ان فى اضيق ظروفى مش ناسيكم وبفكر فيكم
وعايز اقول حاجة كان فيه مشكلة تقنية فى المنتدى ما رضيتش اقول لكم عليها إلا لما خلصت ماحدش منكم حس بيها وهى ان المنتدى بقى ما يقبلش رفع اى ملفات من 3 ايام طبعا مشكلة خطيرة معناها انى وغيرى ما نقدرش نرفع اى ملفات او نوت او اى حاجة ولكن الحمد لله المشكلة اتحلت بفضل بطولة الاخ العزيز محمد الزمنطر والذى اوجه له كل الشكر والإعزاز نيابة عنكم
وانا كنت رفعت الملف المرقف هنا والحظ كان ساعة عطل الرفع فالملف طلع فاضى واعيد تقديمه هنا
الاصدقاء الاعزاء
عارفين أغنية "دندنة" والتى غنتها وردة فى منتصف السبيعينات هى من تأليف الاستاذ /عبد الوهاب محمد وتلحين المدهش /بليغ حمدى
احب اهدى الكلمات الجميلة دى للاستاذ /نور الصباح ليهديها بأسمنا كلنا لعمنا /الرائع عادل صمويل.... وطبعا النوتة بتاعتها ...ودى احدى ابداعاتى فى غشها ونقلها وتصويرها وعمل سكان لها... عشان نغنيها سوا لأستاذنا.
خاصة ان فيها صولو رائع ل ناى محمود عفت -للاسف مش مدون-وتألق لقانون احمد فؤاد حسن يسلطن فيه وردة ايام نضوجها فى الكوبليه التانى.
كالعادة النوتة مش للمبتئدين ولا للمعاقين موسيقيا وعزفيا امثالى خاصة ان فيا قرارات كمانجات عالية قوى...لكن كلماتها حلوة قوى ...واهى تصبيرة لحين عودة الكبير بتاعنا
ياللا نغنى:
انا ...غيرك..؟ ماليش بعدك..؟ مافيش
انا ...مهما أقول بهواك....كل الكلام ...مايكفينيش ...ولا الزمان ...ما يقضينيش
اللحن كله شقاوة وواحدة فرحانة بحبها بتغنيه وهى بتضحك لحد الكوبليه التانى اللى فيه مناجاه على مقام الصبا....ارجوكم تستمتعوا .
رد: طلبات نوتة
العرض العادي
