أعمال من تنفيذ الفنان محمد الآلاتي

**الألآتى** · #1 13/07/2006, 11h43

أسماء الله الحسنى .. قمت بتحميلها من هذا الموضوع .. وأشكر كل من قام بمجهود واضح فى إثراء ورفع أعمال الشيخ سيد النقشبندى ..

ولكن هذه الأعمال .. ذكرتنى ببرنامج تلفزيونى يحمل نفس الإسم ( أسماء الله الحسنى ) .. وكان يذاع فى شهر رمضان بالطبع .. ولكن هذا كان من زمن طويل .. يتذكره الغالبية منكم بحكم السن .. وكانت مقدمة البرنامج ( التتر ) .. هى نفسها أسماء الله الحسنى بصوت النقشبندى .. ولكنها ليست من ضمن الأعمال الثلاثة الموجودة فى موضوعنا هذا ..

ووجدت أنه من الصعب أن أحاول تذكيركم بهذا التتر .. لأن الكلمات واحدة فى كل الأعمال .. هى أسماء الله الحسنى .. ولن تتغير ..

ففكرت أن أسجل جزءاً من هذا العمل بصوتى ( الوحش طبعاً ) .. لعلكم تتذكرونها ..

أرجو سماعها والبحث فيما تمتلكونه من كنوز .. لعل وعسى ..

**الألآتى** · #2 08/08/2007, 12h43

موسيقى عزيزة .. لمحمد عبد الوهاب ...
تنفيذ متواضع لمحمد الألآتى .. مهداة للأستاذ العزيز : غازى الضبع .. أرجوا أن تنول رضاه ..

**ايهاب عامر** · #3 08/08/2007, 13h20

اقتباس:

المشاركة الأصلية كتبت بواسطة الألآتى

موسيقى عزيزة .. لمحمد عبد الوهاب ...

تنفيذ متواضع لمحمد الألآتى .. مهداة للأستاذ العزيز : غازى الضبع .. أرجوا أن تنول رضاه ..

السلام عليكم ورحمه الله وبركاته

ايه يا عم محمد يعنى ما ينفعش حد غير حبيبنا غازى يحملها ولا ايه
عموما انا حملتها وعجبتنى جدا وبسمعها
ومش هخلى حد يقولك انها عجبتنى جدا
ومش هخلى حد يقولك انى عايز اقولك انت جميل بجد

**الألآتى** · #4 08/08/2007, 15h27

ماتفهمنيش غلط ياإيهاب ..

كل المسألة .. إن عم غازى بيحب المقطوعة دى حسب كلامه .. لكنها مهداه للكل .. ولا تزعل ياعم ..

**محمود** · #5 08/08/2007, 18h17

أول كلامي سلام ..

إيه ده يا عم محمد؟!!! ده مش شغل يتحط في قسم المبدِعِين. دول لازم يعملوا قسم المبَدََعين.

مع تحياتي

محمود

**سامية** · #6 08/08/2007, 19h30

السلام عليكم ورحمه الله وبركاته
والله يا استاذ ابو حسام انت راجل فنان بجد .. وتنفيذك الغير متواضع على حد وصفك هو عمل اكتر من رائع
في انتظار أعمال أخرى لسيادتك .. تهديها لغازي بأه ، تهديها لأي حد برضه هانسمعها معاك
مع خالص تحياتي

**Adham Osman** · #7 09/08/2007, 05h34

صباح المزاج الجميل

أخيرا ياعمنا سمعنالك حاجة أتمنى ألا تكون بيضة الديك بالنسبة لنا.
وفعلا ملحوظة جدا إن إيقاعاتك مش ريتم بوكس ولكن تحس إنها حية وكمان محبوكة قوى مع المزيكا.
وبعدين 35 سنة عازف وحتة واحدة طب خليهم إتنين.
الله ينور ياعم محمد

أدهم

**هانى حازم** · #8 09/08/2007, 15h23

الله ينور با عم محمد دة مش بقك بس اللى بينزل سكر دة ايديك بردة فيها سكر

**محمد تميمي** · #9 09/08/2007, 20h59

حبيبنا الالاتي اولا وبعيد عن المجاملات انت فنان وفنان وفنان.
هذا راي قلائل من سمعوه مني, وانت واحد منهم لانك فعلا فنان بما قدمت وفنان لانك قدمت عزيزه وعزيزه على كل محبي عبد الوهاب واعماله الخالده.
سماعي هو مكان طبيعي لامثالك ومتخفش عندنا سميعه والحمدلله تقدر كل فنان زيك, سيبك من التواضع والخزعبلات
وهات من جعبتك ما يسعدنا كما اسعدتنا عزيزه من اناملك.

**mokhtar haider** · #10 10/08/2007, 00h13

اقتباس:

المشاركة الأصلية كتبت بواسطة الألآتى

إيه ده ياجماعة ... ماتنفخوش فيا قوى كده أحسن أفرقع .. وأفتكر نفسى مزيكاتى بجد ..

أنا بحب أنفذ الحاجات إللى بتعجبنى بس .. أنفذها زى ماهى .. بدون توزيع .. بدون إضافات .. لأنها مش للسوق .. أنا عايزها زى ماهى ..

ولعلمكم عايز أقول لكم حاجه .. ( فرصه بقى .. لقيت حد يعبرنى .. ) .

المزيكا مش مشكلة .. لأنى عازف من خمسة وتلاتين سنة ..

المشكلة فى الإيقاعات .. إنتوا عارفين .. أنا بعمل الإيقاعات دى إزاى ؟

أولاً : باستخدم برنامج إسمه Fruity Loops .. وده برنامج شامل ( إيقاعات ومزيكا ) ولكنى أستخدمه فى الإيقاعات فقط ..

أستخدم خامات الألآت الإيقاعية ( دم ، تك ، سك ، تش ، بش .. ألخ ) وأضعها بترتيب معين فى البرنامج فتنتج المازورة الإيقاعية التى أريدها .. وطبعاً علشان أنا عندى خلفية كويسه عن الإيقاعات وإستخدام الألآت الإيقاعية .. باأتخيل الشكل الإيقاعى المطلوب وأنفذه كما أريد .. هذه الخامات لها أكثر من مصدر .. من الإنترنت ، من الأصدقاء ، وأحياناً أحصل على هذه الخامات من الأصل .. يعنى إيه ؟

يعنى أجيب طبلة مثلاً .. وأسجل ( الدم ) لوحدها .. و ( التك ) لوحدها .. و ( السك ) لوحدها .. ( والشنبر ) لوحده .. وهكذا .. وأضع هذه الخامات فى البرنامج وأستخدمها .. فينتج صوت إيقاعى حقيقى .. وتسمعون إيقاع كما سمعتوه فى هذه المقطوعة ..

أغلبية الموزعين يستخدمون الإيقاع ك ( Loop ) لوب .. أى مازورة إيقاعية كاملة .. ويكررونها على مدار الأغنية .. طبعاً يستخدمون أكثر من مازورة .. لكنى أحب أن أعمل الإيقاع بنفسى حتى يأتى حسب خيالى .. كفايه كده ..

و دا اسمه كلام يا أبو حسام؟
شوف يا سيدي... تمتعنا في الأول وتسمعنا حاجة مخدومة... يعني مخدومة زي ما شرحت لنا ...و زي ما أنا حسيت من خلال استماعي لها... ثم تعمل لنا تعليق و تعطي شرحات على التوليفة الذكية اللي عملتها... لحد كدا كويس
ثم فجأة تيجي تقوم تقول لنا كفاية كدا... كمل يا سيدي دا البخل مش لايق عليك و الله.... عطشان يا أبو حسام... مش ترويني لحد ما ارتويي بجد؟؟؟