رسالة إلى الوالى
========
حضرة جناب الوالى
أغلى الناس يا غالى
يا اللى ساكن فى العلاللى
يا اللى حالك من قديم الدهر
كان و كأنه حالى
كنت تمشى فى الشوارع زيِّنا
و تلبس ملابس زيِّنا
و تجوع و تعطش
و الهوى ...
يمكن يسهَّرَك الليالى
و بكره كان همَّك كما كان هَمِّنا
أيه جرالك؟
و لا يمكن أيه جرالى؟
مابقاش يهِمَّك أى حاجة تهِمِّنا
ما بقيتش أبداً زيِّنا
وبقيت خيالى
أوهموك ولا إنت حابب تتوهم
بيخدعوك و لا إنت حابب تتخدع
مابقاش فى جوفك أى عضو بيتوِجِع
بص فْـ عيون الناس و حِسْ
شايف القَهْر اللى ممكن يبقى عُهْرْ؟
شايف الجوع اللى أدى للخنوع؟
شايف الصبر اللى هوه نفسه قبر؟
بُص شوف العيون مليانه خوف
و المهانة فى الطابور
دمعة المظلوم تطيَّر من عنيك النوم
لو لسه فيه عندك شعور
و الأسى فِـ عْنين مريض بدموع تفيض
تروى اللى ساكن فى القبور
و اللى غرق فى البحر الاحمر حقه فين؟
بلعه السمك فى الليل
ماشافت عينه نور
و اللى باعه كان على كرسى الحصانة
وبالأمانة جه بصندوق كله زور
و فص ملح وداب و فاتهم فى الضباب
أهل اللى ماتوا تاهوا فى الدواوين
و تعبوا من شهور
أوهموك إن الجياع بيغنوا ع المحمول
و بيصرفوا ملايين على الرنات
و اللوجوهات وبشكل مش معقول
و هوه أيه معقول؟
و إحنا فـ زمن إتلخبطت فيه العقول
ما فيهوش قِيَمْ مافيهوش مبادئ أو أصول
نفسى تفوق ...
قبل ما تطلع عنده فوق
و هناك مافيش حاشية و خلق بيخدعوك
مافيش هناك إصبر يا سيدنا الوالى
بكره راح تروق
هناك حساب على اللى مكتوب فى الكتاب
فى يوم ماتعرفله غروب و شروق
و هاتتسئِل ع اللى إنتهى عمره فى بحر التيه
و اللى غِرق ...
و اللى فى قطر المحرومين
شاف الهوان
و برضه مات محروق
نفسى تفوق
و لسه فيه فرصه لإيدك مدها
تلقى فـ إيدينا للنجاة الطوق
بس إنت فوق
__________________
دى فضفضة من قلم رغم الألم ... حسَّاس
مهموم بِهَمْ الناس
يمكن تضيئ كلمته ... العقل جوة الراس
رسالة إلى الوالى
العرض الشجري