البنت حامل فى الولد

**Tarek Elemary** · #1 06/07/2009, 13h27

حبلى الصبية فى الولد

على شوق سنين

مستنياه كل البلد

و الغلبانين

بيقولوا مش لازم يكون

بشعر أصفر

أو ببشرة لونها كيت

و كيت و كيت

و لا حتى فارق عندهم ...

لون العنين

بس المهم يكون ولد

متربى ع الجوع و الجَلَد

حاسس بجرح المجروحين

لفحت جبينه الشمس

مَرْقِى من الحَسَد

وعنده دم و عنده دين

و الحَمْلْ طال

بس الظواهر كلها

بتقول خلاص

حان المعاد

و البنت توضع حملها

و ييجى الخلاص

البطن منفوخة

و ماشية البنت

تتعكز على كل الجيران

باين على عنيها التعب

بتلف على كل الببان

تطلب مدد

خطوتها مكتوفة

و كات بتهز خطوتها

يميل كل الشبيبة و الشباب

حتى جمال الوش غاب

ماشية تجرجر فى الهزال

و عودها كان أيام زمان

و لا غصن بان

و الكل يخطب ودها

و العاشقين الملهوفين

تحت الخطاوى قدَّروا حتى التراب

و توبها كان ... ماهو كله كان

فوق جسمها .. زان رسمها

روضة بيضحك وردها

بستان أمان

و القطف طاب

بكرة تقومى بالسلامة يا صبية

و ترجعى ست البنات

أم الولد

هايشد عودك من جديد

و يكون شديد و يكون أسد

الغابة مليانة بوحوش

شالوا الوشوش

الغابة محتاجة الأسد

و إنت حامل فى الولد

و الله حامل

فى الولد

**عفاف سليمان** · #2 06/07/2009, 13h33

مثال على الولد
يقولوا فيه
ان قالوا دا ولد انشد ظهرى وانسند
وان قالوا دى بنيه هدوا الدار عليه
يا عينى ع الولد اللى منتظراه البلد
ياريته يكون ولد
مولدتوش ولاده
ولد لهذا الزمن
بس ده مش عايز ولد واحد
دا عايز بلد
من كام ولد
تشد بيه الظهر وتنسند
بصراحه المره دى الكلمات جميله جميله جميله
ويارب يهدى الولد
وخلى الولد
وتحياتى لك اخى وللجميع
اختكم عفاف

**علاء طه ياسين** · #3 06/07/2009, 14h11

مستنظرين يوم الولادة
ويا الأمل مستنظرين
بس ندعي الحمل يكمل
مش يموت فيها الجنين

الشاعر الثورجي طارق العمري
صورت فأبدعت
وكتبت قصيدة رائعة
حلوة صفات الولد دي ..
حاسس بجرح المجروحين
.....
عنده دم .. وعنده دين
....

يحس بمرارة الظلم .. علشان يعرف حلاوة العدل

سلمت اليمين التي خطت هذه القصيدة
وسلم صاحبها

علاء

**NAHID 76** · #4 06/07/2009, 14h21

بسم الله الرحمن الرحيم
الشاعر الثائر طارق العمرى
وبعد أن تحدثنا عن جمال فكره الموضوع
والكلمات الجميله التى تشحذ الهمم
والاسلوب البسيط المعبر بلا أبتذال
أتأسف على الحال الذى الت اليه البلد من أنتظار أن يولد ولد
وصلنا لهذه الدرجه وأسفاه على هذا الحال
تحياتى

**Tarek Elemary** · #5 06/07/2009, 14h53

أهلا بالسيدة عفاف
هو ما ذكرت بالفعل هذه المأثورات عن المجتمعات الشرقية و إن كنت ضدها فى كثيرٍ من معتقداتها و لكن الرمزية هنا بين الصبية و الولد و الأمل و البلد و كما أوضحت فى تعليقك الكريم
شكراً للحضور و دام المرور

**Tarek Elemary** · #6 06/07/2009, 14h56

علاء يس .... كرة الإبداع الملتهبة و جذوة الشعر التى لا تنطفئ
طبعاً هو ولد بمواصفات خاصة بس يا ريت ما يبقاش لا صعيدى و لا منوفى ... مرة بقى يبقى إسكندرانى ... مش من نفسنا برضه

**Tarek Elemary** · #7 06/07/2009, 15h05

مدام ناهد هانم
===========
لا تأسفى لا تأسفى ... للحالِ بعدٌ فلسَفى
فالشعب يرضخ للطغاةِ موافقاً لا يكتَفى
فكيف عنه يرحلون فذاك كالخِلِ الوفى؟
ندعوه ربك للولــد أن ينتقيه و يصْطَفى
و يعيننا ألا نَظَلَ بكلِ ظـــــــــــلمٍ نحتفى

**سعدالشرقاوى** · #8 06/07/2009, 16h12

استاذى وحبيب قلبى/طارق العمرى

البنت حامل فى الولد
أن الاوان
الفرحه عمّت فى البلد
ضحك الزمان
عشان عزيمته والجلد
همّا الامان
والحلم رؤيه وفى الصلاح
لازم تبان
ياريت فى طرف مخدّتك
نحجز مكان
والحلم يصبح مشترك
والنور يبان
وف يوم سبوعه يتولد
فينا الامان

**Tarek Elemary** · #9 06/07/2009, 16h29

اقتباس:

المشاركة الأصلية كتبت بواسطة سعدالشرقاوى

البنت حامل فى الولد
أن الاوان
الفرحه عمّت فى البلد
ضحك الزمان
عشان عزيمته والجلد
همّا الامان
والحلم رؤيه وفى الصلاح
لازم تبان
ياريت فى طرف مخدّتك
نحجز مكان
والحلم يصبح مشترك
والنور يبان
وف يوم سبوعه يتولد

فينا الامان

بص بقى يا عم سعد أنا نومى قلق و ماحدش يطيق ينام جنبى و أحلامى كلها و أنا صاحى ... آيييييييوه يا جدع دا إنت داخل على طمع بقى .... باقولك أيه ..... إنت تيجى فى السبوع أحسن