البنت الدايبة كسوف

**علاء طه ياسين** · #1 09/07/2009, 07h53

إنتي البنت الدايبة كسوف
المليانة براءة وخوف
واللي كتير بأخجل قدامها
وباتهته لما بأكلمها
وف دنيا الأحلام بأرسمها
غنوة لذيذة بأحلي حروف

...

انتي البنت المدهشة جد
واللي جمالها يفوق الحد
واللي الكون عاشق ضحكتها
واللي القمر الطالع بيتها
واللي لقيت قلبي ف سكتها
فاقد النطق وفاقد الشوف

...

إنتي البنت الملهاش حل
واللي بدونها الكون يختل
واللي هواها بقا حدوتة
تحكيها العصافير للتوتة
مع بعض هتحلو الموتة
لو يبعدنا قدر وظروف

...

إنتي البنت اللي مفيش زيك
واللي الشمس تغير من ضيك
سهم الحب ف قلبك عدي
والشوق يزرع مليون وردة
واما بشوفك قلبي بيهدي
وعليكي بيروح محدوف

...

إنتي البنت الدايبة كسوف
المليانة براءة وخوف
واللي كتير بأخجل قدامها
وباتهته لما بأكلمها
وف دنيا الأحلام بأرسمها
غنوة لذيذة بأحلي حروف

علاء

**NAHID 76** · #2 09/07/2009, 10h37

بسم الله الرحمن الرحيم
الشاعر الغنائى علاء يا سين
وماذا بعد ما كتبه الكبير مصطفى زقزوق
المثل بيقول
أذا حضر الماء بطل التيمم
ولكنى اضيف تشجيعا الى تشجيعه وأعجابا يساير أعجابه وطلب فى الأستمرار فى هذا النوع الجميل أيها الشاعر الغنائى الغزير
تحياتى

**عفاف سليمان** · #3 09/07/2009, 13h37

اخى علاء بعد مساء الخير عليك وعلى الجميع
فينكم يا ملحنين وفينكم يا مطربين
الكلام اهه جميل
ملحن نفسه بس نقول يا مين
والله كل مره احلى واحلى من اللى قبلها
الله يزيدك من نعيمه وينعم عليك بفضله
بجد والله كلمات جميله وبسعد لما بشوفها
اسعد الله اوقاتك والجميع
تحياتى لك اخى وللجميع
فين حواديت الجروب
اختك عفاف

**علاء طه ياسين** · #4 09/07/2009, 14h36

مدام ناهد ..
صاحبة الحضور الطاغي ..
كتباتنا تستمد إلهامها منكم ..
وما ننشده ونغنيه ونؤلفه .. بفضل تشجيعكم ..
ولأن الحب هو أجمل الأشياء في الوجود ..
فلن أمل من الكتابة عنه ..

يللِّي تاعبني ومغلبني
آه منك آه منك ياني
أهرب منك وأبعد عنك
تيجي لحدي وتترجاني
وأَمَّا أَقَرَّبْ ترجع تهرب
وتداري مشاعرك وتعاني
اكدب قول انك مش عاشق
عاند نفسك واتحداني
شكلها باظت شكلها خربت
ولا يمكن تتصلح تاني

علاء

**علاء طه ياسين** · #5 09/07/2009, 14h43

أختنا الفاضلة
عفاف

انا راجع تاني لشخابيطي
لكتاب حكاياتي وحواديتي
وعشان خاطر ست عفاف
راح أكمل قصة عفاريتي

النهاردة بإذن الله تعالي هأبدأ أكمل مواقفي في الجروب مع الجن -اللهم احفظنا-
علاء

**سعدالشرقاوى** · #6 10/07/2009, 08h17

اخى الاستاذ/علاء طه
لاازيد عن ما قالته الاخت الاستاذة عفاف
كلام ملحن نفسه وتنادى اين المطربين والملحنين
وهذا احساس بعمل منظم محبوك يتطلب ذلك

إنتي البنت الملهاش حل
واللي بدونها الكون يختل
واللي هواها بقا حدوتة
تحكيها العصافير للتوتة
مع بعض هتحلو الموتة
لو يبعدنا قدر وظروف

نجم علاء يتالق يوما بعد يوم
فى مجال الاغنية الحلوة الخفيفة السهلة
واى حاجه فيها سيرة التوته تلاقيها حلوة
الله ينور يابو ياسين

**علاء طه ياسين** · #7 10/07/2009, 10h01

شكرا شكرا يا سعد يا خويا
بس علي رأي المثل
قليل البخت يعضه الكلب في المولد
فين بقا ..
علاء