متفائل ؟! ، قصيدة لسيد أبو زهده

**abuzahda** · #1 23/11/2008, 02h18

رداً علي القائل :
المتشائم ينظر للنصف الفارغ من الكوب (!)

نُص الكوباية الفاضي

فايض فوق عالنص وجار

و الفقر بسيفه الماضي

تلف الزرع و خرب الدار

متفائل لسة وراضي؟

ربنا هيوديك النار

لو متفائل .. إسأل قلبك:

هذا تفاؤل .. أم غيبوبة؟!

عدو من خلفك ، عدو من جنبك

و انت عنيك بإديك معصوبة

بَطـَّل هلس و لعب قمار

الكوباية ..خلاص ارميها

وجهة نظرك؟...إمسح بيها..

لو لامؤاخذة وقعت منك ....

الكوباية ، أو الشاي فار

**abuzahda** · #2 23/11/2008, 02h26

مثبت
الأشعار المسموعة
هنا

**abuzahda** · #3 23/11/2008, 02h28

كراكيب سيد أبو زهده
هنا

**رائد عبد السلام** · #4 23/11/2008, 03h58

عمنا سيد أبو زهدة
كله كوم .......ودي بقي كوم
لأنها بتلمس قضية جعلت أبناء يعرب لا يسيرون للأمام
كبقية خلق الله
ولكنهم يمشون القهقري دائما

نُص الكوباية الفاضي
فايض فوق عالنص وجار
و الفقر بسيفه الماضي
تلف الزرع و خرب الدار
متفائل لسة وراضي؟
ربنا هيوديك النار

لو متفائل .. إسأل قلبك:

هذا تفاؤل .. أم غيبوبة؟!

هو أكيد غيبوبة ياعم سيد
بس التعلب لما ما بيطولش العنب بيقول عليه حنظل
وإنت : سيد العارفين (أبو زهدة سابقا)
أحسن الله إليك يا أستاذنا
هامش : بس إزاي فيه حد يصطاد سمك من بلكونة ؟؟
أكيد دي ما كانتش مية النيل ..ده كان ...نشع

**رائد عبد السلام** · #5 23/11/2008, 04h06

معلهش ياعمنا ..وأنا طالع
اتشنكلت في المحفظة دي :

مرة واحد ، زيِّ تعلب ، جُوَّة جُحْرِ اْلكِيد يِبَيِّتْ
كـُلـِّنَا من كِيدُه نِغـْلـَبْ ، والمُؤامْرَة ، حَياتُه ، حَيِّتْ
زَارُه وَفدْ يقوله: عـِيب
رِجْعُوا قالوا: شِئ عجيب ! ،
لما شافنا ، كإنه ميِّت

---------

أنا عايز أعرف إزاي بتقصّ الكلام علي قد المعني كده؟
وتطعّمه بمدلول تراثي أو شعبي أو ومضة شعرية تلمع زي النجمة فتبقي القصيدة عاملة زي ....!! زي إيه ؟ ...مش لاقي حاجة ....
دي مش صنعة ...!!
ده فيض الموهبة

**د أنس البن** · #6 23/11/2008, 07h15

شاعرنا الكبير
لمناسبة هذه التحفه الإبداعيه حبيت أقول لك أن هذه العباره التى أصبحت من كثرة ما استهلكت على ألسنة ضيوف وسائل الإعلام من فرقة ( المبرراتيه ), تصيبنى بحاله من الغيظ الشديد عندما أسمعها , خصوصا عندما يبدأ المبرراتى من دول حديثه مستفتحا بها وهو يرد على سؤال حول مصيبه من المصائب التى صارت يوميه , يقوم كده (منجعص) على الكرسى الوثير ويقول بكل عين فارغه وكأنه جاب التايهه
.... أصل صاحب هذا الكلام ينظر الى نصف الكوب الفارغ ,
عموما انت رديت على الكل كليله منهم , الله يوقف نموهم

**abuzahda** · #7 23/11/2008, 12h32

اقتباس:

هامش : بس إزاي فيه حد يصطاد سمك من بلكونة ؟؟

البلكونة ناتئة من الإستراحة(الفلة) كلسان للنهر. خصيصاً للصيد ، وهي مشهورة عندكم

**abuzahda** · #8 23/11/2008, 12h34

اقتباس:

أنا عايز أعرف إزاي بتقصّ الكلام علي قد المعني كده؟

قل كلٌ من عند الله
يا أستاذ رائد عبد السلام
ياغالي

**abuzahda** · #9 23/11/2008, 12h41

اقتباس:

المشاركة الأصلية كتبت بواسطة د أنس البن

شاعرنا الكبير
لمناسبة هذه التحفه الإبداعيه حبيت أقول لك أن هذه العباره التى أصبحت من كثرة ما استهلكت على ألسنة ضيوف وسائل الإعلام من فرقة ( المبرراتيه ), تصيبنى بحاله من الغيظ الشديد عندما أسمعها , خصوصا عندما يبدأ المبرراتى من دول حديثه مستفتحا بها وهو يرد على سؤال حول مصيبه من المصائب التى صارت يوميه , يقوم كده (منجعص) على الكرسى الوثير ويقول بكل عين فارغه وكأنه جاب التايهه
.... أصل صاحب هذا الكلام ينظر الى نصف الكوب الفارغ ,
عموما انت رديت على الكل كليله منهم , الله يوقف نموهم

ماهو يا دكتور أنس
علشان انا عجباني "جعصته"
مارضتش أصادر "وجهة نظره"
و سيبتهاله "يمسح" بيها
مكان مابيتجعص

(شوف أنا راجل ليبرالي ، إزاي ؟)

**abuzahda** · #10 23/11/2008, 12h47

الأحباب
أعتذر عن الإختصار في التعليق على ردودكم المثيرة "للرغي و الأشجان"
فأنا في طريقي للعمل
و عند العودة (يساويها ربنا ياعم رائد)
بس عندي رجاء
اللي يسعد منكم بشوفة
منال 99
يسلملي عليها خالص