بنكتب لمين - ياعلى عبد اللاه

**حمدى شبانة** · #1 21/10/2009, 14h28

بنكتب لمين
عارف ياعلوة بنكتب لمين 00؟
للناس اللى طواها الحنين 00
جوة ضلوعهم صوت الأنين 0000
والمحرومين
فى راسهم بيكبر حلم السنين
لكنه جنين
الحلم مستنظر يتولد
ولا بيتوجد
أكتب لمن ليله طويل
مالوهش نهار
مستنى فجر حلمه الجميل
طال الانتظار
نكتب ياعلوة لحبيبتى وعينها
وقصة جبينها
وعقل يزينها
أو عن ولد
يحب البلد
ومهما ابتعد لازم يجيلها
عارف ياعلوة حكتب لمين ؟
للى انتهى
لانه قال(لأ)فى وقتها
عن اللى حبيبته راحت بعيد
وطال انتظاره وشوقه لها
بيقول حبيبتى راجعة أكيد
وحرجع لها
نكتب عن شخص حب السفر
( جوة البشر )
ويغوى السهر
وجايز يموت 000 لأنه بسيط
لو ليلة واحدة ماشافش القمر
نكتب عن اللى خياله
وعقله بناله
فى الأرض حلمه الجميل
لكن مستحيل
الأرض دايرة
والفكرة حايرة
ليوم الرحيل
عرفت ياعلوة؟ بنكتب لمين ؟
كل اللى زيى وأنا زيهم
حكتب عنى 00 أو عنهم 0!

**على عبداللاه** · #2 22/10/2009, 17h35

هتصدقنى لوو قلتلك إنى بكتب لك إنت بالتحديد ؟؟
مش مصدقنى .. صح لا صدق وهشرحلك أهو ..

انت وأنا صوت من سنين
حيره وألم وناى حزين
يطل على الصحبه يقولوا الله
صوتك يداوى المجروحين
يقعد لوحده يتخنق يصرخ
ولا حد سامع من صراخه كلمتين
...يا هلترى بعد اللى قلته
عرفت انا بكتب لمين ؟

**حمدى شبانة** · #3 23/10/2009, 16h35

مصدقك ياعلوة لأنك زيى بتكتب عنى ولية وأنا بكتب ليك وعنك والظاهر اننا حنكون أصدقاء دون أن نقصد يمكن يكون تواصل وجايز دا مكتوب علينا وبمناسبة المكتوب أنا قلت فى لحظة ضيق

مكتوب علينا الألم
حتى فى عز الفرح
نبدر تقاوى الأمل
نزرع مانلقى طرح
تكبر فى راسنا الأمانى
وتعلا قد الصرح
ينهد صرحى
يضيع فرحى
يموت طرحى
ويبقى لينا
000وفينا
الألم00والجرح
------------
صح ياعلوة ولا ايه رأيك 0000 ولك شكرى على الرد

**على عبداللاه** · #4 23/10/2009, 22h11

صح
.. منتهى الصح .. ويمكن كله
وهرجعلك بعد ردود الباقيين
وأنا سعيد بصداقتك
بجد سعيد بيها
تقبل تحياتى
وإحترامى