أغـدا ألقاك

**سامية** · #1 30/07/2007, 21h12

السلام عليكم ورحمه الله وبركاته
مش عارفة في يا ابو حسام انت اعلنت انك واخد اجازة ولا هي الناس اتفقت ترحمك شوية
بصراحة كنت منتظرة دوري بس يظهر كده اني مش هانتظر كتير لان مفيش طلبات كتير عليك
قولت استغل وقت الفراغ اللي عندك ده واجيبلك أغنية انا باعشق كل حرف فيها وطبعا واضح من عنوان المثبت
هي قصيدة أغدا القاك
هاكتب كلماتها كما اتفقتم من قبل وهاقولكم ذكرياتي معاها .. اذا كان في خطأ في الكلمات فعليكم اصلاحها ولكم الشكر والتقدير

أغداً ألقاك
شعر: الهادي آدم وهو شاعر سوداني
الحان : محمد عبد الوهاب
غناء: أم كلثوم

أغداً ألقاك يا خوف فؤادي من غدٍ
يالشوقي وإحتراقي في إنتظار الموعد
آه كم أخشى غدي هذا وأرجوه إقترابا
كنت أستدنيه لكن هبته لما أهابا
وأهلت فرحة القرب به حين استجابا
هكذا أحتمل العمر نعيماً وعذابا
مهجة حرة وقلباً مسه الشوق فذابا
أغداً ألقاك

أنت يا جنة حبي واشتياقي وجنوني
أنت يا قبلة روحي وانطلاقي وشجوني
أغداً تشرق أضواؤك في ليل عيوني
آه من فرحة أحلامي ومن خوف ظنوني
كم أناديك وفي لحني حنين ودعاء
آه رجائي أنا كم عذبني طول الرجاء
أنا لو لا أنت لم أحفل بمن راح وجاء
أنا أحيا لغد آن بأحلام اللقاء
فأت أو لا تأتي أو فإفعل بقلبي ما تشاء
أغداً ألقاك

هذه الدنيا كتاب أنت فيه الفكر
هذه الدنيا ليال أنت فيها العمر
هذه الدنيا عيون أنت فيها البصر
هذه الدنيا سماء أنت فيها القمر
فإرحم القلب الذي يصبو إليك
فغداً تملكه بين يديك
وغداً تأتلف الجنة أنهاراً وظلاّ
وغداً ننسى فلا نأسى على ماضٍ تولّى
وغداً نزهو فلا نعرف للغيب محلا
وغداً للحاضر الزاهر نحيا ليس إلا
قد يكون الغيب حلواً .. إنما الحاضر أحلى
أغداً ألقاك
انتظروني في ذكرياتي مع هذه الاغنية تحديدا

**غازي الضبع** · #2 30/07/2007, 22h04

إختيار موفق يا سامية
طبعا أغداً ألقاك قصيدة في منتهى الروعة والجمال
تحمل كلمات جميلة جدا لشاعر رقيق ..
أما اللحن بقى فهو حكاية من حكايات الزمن
بالرغم من أنه يعتبر عادي بالنسبة للأستاذ عبد الوهاب
لإن كل أعماله غاية في الجمال ..
طبعا الأغنية كلها عاجباني جدا لكن أكتر حاجة بتعجبني في هذه الأغنية هي الموسيقى التي بين الكوبليهات مثلها مثل فاتت جنبنا ونبتدي منين الحكاية .. إلى آخر هذه الإبداعات لموسيقار الأجيال ..
.............
بالمناسبة أنا بانتهز الفرصة واحجز لي مقعدا في الدعوة القادمة .. بعد الانتهاء من هذه التحفة التي تدعونا إليها الأخت سامية
.............
ونحن الآن في انتظار ذكرياتها مع أغدا ألقاك
.............
الميكروفون معاكي يا سامية ..

**حسن كشك** · #3 30/07/2007, 23h51

ساميه
ايه الجمال ده
معقوله دى تطلع منك
يالله احكي وانا حضرت المناديل فى ايدى
انا قاعد فى الصف الاولانى ولابس الجلابيه البلدى عشان اسمع براحتى
ومحضر اللب والسودانى اللب ليا والسودنى ليكى
يلا يابابا متشوقين للاحساس بما تعبر به ممشاعرك الرقيقه
عيشينا معاك بس كونى صريحه جدا زى انا ماكنت
يالا ياساميه احكى

**ايهاب عامر** · #4 31/07/2007, 03h46

السلام عليكم ورحمه الله وبركاته

الله يا ساميه على روعه إختيارك لهذة الأغنيه
بجد أنا فعلا مستنى بشغف كل حاج هتتقال عنها لأن هيتقال فيها كلام كتير حلو
وبعدين خدى هنا إنتى كاتبه جزء من الكلمات غلط وإسمحيلي أصحح
كنت أستدنيه لكن هبته لما أهابا ده الغلط
كنت أستدنيه لكن هبته لما إيهابا ده الصح
يعنى الأغنيه دى بأسمى وده إللى كنت مش عايز أقول عليه علشان ما حدش يقول ده بيطنطط علينا وبيترسم
لأ بجد بحييكى على إختيارك وعلى كتابتك لكلمات الأغنيه صح
دى مزحه طبعا

**سامية** · #5 31/07/2007, 17h03

السلام عليكم ورحمه الله وبركاته
حلوه الصحبة دي ولب وسوداني والمواضيع كبيرة وفاكريني طبعا هاقول ذكريات محزنة وهانبكي كلنا .. بالعكس ذكرياتي عن هذه القصيدة ذكريات جميلة .. يعني لما باسمعها مش بيغمى عليا .. بالعكس باشعر اني باحلق في سماء صافية وتتلألأ من حواليا النجوم وبالمسها بايديا .. وباحضن القمر بعنيا .. وباتخيل اني عايشة في الجو الرائع ده في انتظار لقاء من يهواه قلبي وتتمنى عيوني رؤيته ..
انا مش هاشرح الكلمات لان معناها واضح جدا .. لكن باحكي ذكرياتي فقط وبعدين اختكم اصلها رومانسية حبتين ولما باحب باكون صعبة جدااااااا .. باحب بكل كياني .. كل خلية فيا بتهيم عشقا بحبيبي .. باتنفس حب .. عنيا مش بتشوف غير حبيبي .. والحمد لله رب العالمين ان من أحبه قلبي وأهواه هو زوجي الان ربنا يباركلي فيه ويحميه ويحفظه من كل سوء

انا باتكلم بكل صراحة أهو ومش عايزه تريقة وعموماً هاقولكم باختصار ايه حكاية الاغنية دي معايا
الاغنية دي كنت باسمعها من زمان وكنت معجبة بكلماتها ولحنها وأداء الست فيها
الا ان تعرفت على الاستاذ بتاعي ( اقصد جوزي ) وامتلأ قلبي بحبه والحقيقة انا من سكان الفيوم وجوزي من سكان شبرا ( شوفوا النصيب لما يجمع ) طبعا كنت باشوفه على فترات متباعدة نظراً لوجودي بمحافظة تانية ( يعني مش زي خطاب الايام دي يلزق في بيت خطيبته طول اليوم ويبأه عايز يبات عندهم كمان ) وكنا بنتفق على مواعيد طبعا للزيارات وقبل موعد من المواعيد المتفق عليها حسب الاصول سمعت هذه القصيدة بالصدفة .. ولا تتخيلوا مدى تأثيرها عليا وهي بتوصف حالتي وشوقي ولهفتي للقاء ..كنت باروح من الدنيا لما اسمع هذه الابيات بأداء الست
اسمعوا معايا الجزء ده
هذه الدنيا كتاب أنت فيه الفكر
هذه الدنيا ليال أنت فيها العمر
هذه الدنيا عيون أنت فيها البصر
هذه الدنيا سماء أنت فيها القمر
عند سماعها تشعر بأن حبيبك هو المكمل لكل شئ بالدنيا .. ومن غير وجوده لن تجد معنى لأي شئ بهذه الدنيا
ومن يومها وهذه القصيدة لها مكانة كبيرة عندي ولما باسمعها في أي لحظة بافتكر لحظات انتظاري ولهفتي للقاء حبيبي
دي ذكرياتي مع القصيدة ومازلت باعشقها لانها بتذكرني بالحب الحقيقي والصادق بحياتي .. وادعوا لي ربنا يديم عليا هذه النعمة .. ويبعد عننا عين الحسود
منتظرة تحليلك يا ابو حسام
ومنتظرة كمان تريقة البعض دون ذكر أسماء
مع خالص تحياتي

**الألآتى** · #6 31/07/2007, 18h02

والله أنا جاهز ... لكن كنت مستنى ذكرياتك وذكريات الأخوة وتحليلاتهم للكلمات .. وعموماً .. حاستنى برضه شوية لعل وعسى حد يحنّ عليكى بشوية ذكريات .. وربنا يخليلك ( الأفندى بتاعك ) .. تصورى ياسامية .. فى أول كلامك .. كنت فاكرك بتدورى على عريس .. وقلت فى نفسى .. خلاص ياواد .. فرجت .. وحاتخلص من واحد من ( الشُحطة ) إللى عندك فى البيت .. ( حاكم أنا عندى ثلاثة كُبب ) لكن معلش .. خيرها فى غيرها .. وربنا يهنيكى مع الأستاذ بتاعك ..

**غازي الضبع** · #7 31/07/2007, 20h28

اقتباس:

المشاركة الأصلية كتبت بواسطة samya

وادعوا لي ربنا يديم عليا هذه النعمة .. ويبعد عننا عين الحسود
منتظرة تحليلك يا ابو حسام
ومنتظرة كمان تريقة البعض دون ذكر أسماء

مع خالص تحياتي

عزيزتي سامية .. ربنا يديم عليكم هذه المودة والرحمة
ويلم شملكم ويجمع بينكم في خير ، ويرجعكم لأهلكم بالسلامة ..
أنتم والعيال .. على فكرة انتي ماجبتيش سيرة العيال خالص .. مستنيين
وبعدين مين هايتريق ؟ هو فيه حد هنا بيتريق ؟
دا احنا غلابة ..

اقتباس:

المشاركة الأصلية كتبت بواسطة الألآتى

والله أنا جاهز ... لكن كنت مستنى ذكرياتك وذكريات الأخوة وتحليلاتهم للكلمات .. وعموماً .. حاستنى برضه شوية لعل وعسى حد يحنّ عليكى بشوية ذكريات

حبيبي الآلاتي .. كل يوم بتزيد معزتك عندي عن اليوم اللي قبله ..
الكلمتين اللي قلتهم فوق دول
دايما على لساني
وبكده يتحقق الهدف الرئيسي من الموضوع
وما يبقاش مجرد أغنية اتقالت واتحللت ودمتم
.. وعلى فكرة جهز نفسك عشان أنا محضرلك أغنية تقيلة قوي
وهي اللي عليها الدور بعد أ. مختار
وبالبمناسبة طبعا أي حد يحجز له الأولوية ..
بس احنا هانعمل استثناء للأخوة قدامى المنتدى اللي اتشرفت ودعوتهم بصفة خاصة
بمعنى إنهم كده ليهم أماكنهم محجوزة من الآن
وربنا يخليك لينا يا حبيبي
ويكتر في عطاءك

**الألآتى** · #8 31/07/2007, 20h52

اقتباس:

المشاركة الأصلية كتبت بواسطة ghazyeldaba

.. وعلى فكرة جهز نفسك عشان أنا محضرلك أغنية تقيلة قوي [/center]

هو فيه إيه .. كل أغانيكم تقيلة ؟؟

بالراحة عليا ياناس .. خللى عندكم رحمة ..

عموماً : التقيل يخف لك ياعم غازى .. على وزن ( الغالى يرخص لك ) .. بس وحياة أولادك .. خليك فى الدور .. ماعنديش خيار ولا فاقوس .. تقوللى قدامى المنتدى .. تقوللى الحبايب وحبايب الحبايب .. ماعنديش كوسة .. كله فى الدور .. وإللى مش عاجبه .. يحلل هو .. أو يروح معمل تحاليل ..

**غازي الضبع** · #9 31/07/2007, 22h10

لا يا عم ..
عاجبني طبعا ..
أنا باحجز بس يا باشا ، وفي نفس الوقت عايزك تبقى مهيأ نفسيا للأغنية بتاعتي ..
عشان هيا غير تقليدية شوية

هيه الكوسة بقت بكام دلوقتي ؟

**حسن كشك** · #10 31/07/2007, 22h58

samyaالغاليه
اولا : ربنا يسعدك ويجعل حياتك كلها خير وبركه ويخليلك الاستاذ سى فلان
ثانيا: اذا كنتى متوقعه منى انا التريقه فى موضوع فيه مشاعر راقيه ذى ماوصفتى وحسستينى تبقى غلطانه لا والله دانا فرحت بروحك الساميه ياساميه وخاصة لما وصفتى حالتك فى الحب بس انت كنت واقعه خالص فى الفندى بتاعك يا بخته ذكريات جميله لكن لما كنتى بتشوفى الاستاذ كل خميس بشوق دلوقت لما هو جنبك ليل ونهار ايه الحال
ربنا يسعدك
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــ
يا غازى باشا
الكل هنا سواسيه مع احترامنا للقدامى
بطل مسح جوخ يا كابتن
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــ
حبيبى محمد الالاتى
روعه انت والله وشد حيلك وربنا يوفقك وخلى بالك من نفسك وصحتك مالناش غيرك يا عمنا
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــ
اما بخصوص اغنيه اغدا القاك
انا لا استمع الا الى الشطرين دول
اغدا القاك ياخوف فؤادى من غدى
يالشوقى واحتراقى فى انتظار الموعد
ومتهيالى ان باقى القصيدة تكرار بشكل متنوع لمعانى البيتين دول ولم تخرج عنهم
لكن الجديد ان الصوره الخياليه اتغيرت فى داخلى بعد كلام ساميه وراحت صورة ام كلثوم وجت بدالها صورة ساميه ( ام عين واحده وحاجب ) وهى فى الفيوم بالجلابيه الفلاحى والقرطه وواقفه فى الغيط جنب برج الحمام جنب الساقيه وبتبص على محطة السكه الحديد البعيده يوم الاربعاء فى العصارى وعماله تغنى اغدا القاك والبنات حواليها عمالين يرددوا الاغنيه اما يوم الخميس لما وصل الاستاذ / جم البنات عند بيت ساميه وقعدو يغنوا ( اهو جالك اهو )
ساميه بنضحك مع بعض مش تريقه ربنا يسعدك