حبيبى اسمرانى اللون

**عفاف سليمان** · #1 01/06/2009, 07h08

صباح الخير على اهل سماعى الكرام
اتمنى ان تعجبكم خاطرتى
وارجوا اعطائى النقد لها
حبيبى اسمرانى اللون.........وعيونه عسليه
ساكن فى أخر الكون.........وحبه يا ناس ليه
عاشق هواى بجنون.........وكله حنيه
صوته يا ناس حنون.........مالى الدنيا عليه
اسمر وسماره جميل
فى الاصل ابن النيل
على جبينه يتقال مواويل
وفى عيونه يغنى الليل
اسمر عشقت هواه
عمرى فى يوم ما انساه
وإن مات هعيش يا ناس
فى الدنيا على ذكراه
وإن مت أنا واثقه
قلبه على حبى يبقى
ماهو اصله ابن النيل
فى حبه يتقال مواويل
اسمر جميل محلاه
لفيت الكون معاه
شالنى فى عيونه سنين
غنى لى كتير مواويل
وصفنى بالحنان
شفت معاه الامان
وان قال هو بحبك
هقوله قول كمان
وان قلت له بحبك
الدنيا تبقى جنان
يارب تعجبكم ويكفينا ويكفيكم شر الجنان
اختكم عفاف

**Islam Eidrisha** · #2 01/06/2009, 07h24

يا بخت السمر وسعدهم وهناهم
بكلامك الجميل يا أخت عفاف
بتذاكري من ورانا وبتكتبي شعر؟
طيب .. طلعي مواهبك المستخبية
واعذريني فلست متمرسا في معرفة بحور الشعر
ولا فعولن مفاعلن ومستفعلن لأحلل القصيدة
بس كل اللي أقدر أقوله إن القصيدة بتنقط عسل

**Tarek Elemary** · #3 01/06/2009, 08h17

الصديقة عفاف
برضه مش هانخسر بعض أبداً
حتى لو حاولتى تكتبى الكلام المقفى اللى فوق ده
هاعتبرك بتغنى فى الحمام ... كلنا عملناها و من صدى الصوت بفعل السيراميك و القيشانى فهمنا إن إحنا (أنا على الأقل) اكثر موهبة من عبدالحليم حافظ
بس ده لم يجعلنا نقول أننا مطربين ... كان مجرد تنفيس
لو قصيدتك مجرد تنفيس .... ماشى
مقبولة و زى الفل
تحياتى

**عفاف سليمان** · #4 01/06/2009, 08h24

صباح الخير عليك يا اسلام يا خويا
والله دا مش شعر انا كتبتها النهارده الصبح ووريتها لمى
وياريتنى سمعت كلامها
هههههههههههههه
اشكرك من كل قلبى بس خلى بالك من العسل لتتلزق
ولا يجيب عليك نمل
مش هى بتنقط عسل الله يا خليك يا عسل
وتحياتى لك وللجميع
وربنا لا يحرمنى من تعليقاتك الخفيفه
اختك عفاف

**عفاف سليمان** · #5 01/06/2009, 08h27

الاستاذ الشاعر طارق
يعنى شكلى كده مش هعرف اكل عيش معاكم
خلاص مش هجيب لكم اى حاجه تانى
وهبقى اغنى فى الحمام احسن
هههههههههههههه
ودى والله مش قصيده ولا حاجه دى خواطر
حرمت ياعم خلاص
واشكرك على مرورك عليها وردك الجميل
لك خالص التحيه والتقدير
وللجميع باسعد الاوقات
اختك عفاف

**Tarek Elemary** · #6 01/06/2009, 08h33

لأ كده ما فهمتيش قصدى خالص
إنتِ قلتِ خواطر يبقى خلاص مجازة و زى الفل
و لا تيأسى نهائيا و لو هاتنقلى الحمام كله على السماعى هانسمع برضه و نردد معكِ
فيه حد يقدر يقول بطلى
ده يبقى متخلف
إكتبى ما تشائين
لكن لا تعتبريه عمل شعرى
و تتعصبى ضد نقده
فهذا قد يجلب بعض
سوء الفهم مع أصحابك بالمنتدى
و هذا ما لا أرضاه لك
لكن لو صدرك واسع
يبقى على بركة الله
تحياتى

**عفاف سليمان** · #7 01/06/2009, 08h49

الاستاذ طارق
والله لم اقصد اساءة الفهم بل وضحت قبل اى كتابه انها خاطره
انا بحب بين وقت والتانى اكتب حاجات خفيفه
طبعا مش شعر لانكم اهل الشعر والعروض والاوزان لكن انا بحاول اكتب ما احس به وقتيا او فى الحال كما يقولون
يعنى حاجه خفيفه بسيطه لا اكثر ولا اقل
وبعدين ازاى يعنى ما اقبلش النقد ماهو انا قلت من الاول
اريد النقد بس على خواطر مش شعر
وربنا لا يحرمنى من نقدكم ولا ردودكم
واتمنى ان يكون صدرى رحب لهذه الكلمات والنقد عليها
ولك وللجميع خالص تحياتى
اختكم عفاف

**رائد عبد السلام** · #8 01/06/2009, 08h54

اقتباس:

المشاركة الأصلية كتبت بواسطة عفاف سليمان

وان قال هو بحبك
هقوله قول كمان
وان قلت له بحبك
الدنيا تبقى جنان
يارب تعجبكم ويكفينا ويكفيكم شر الجنان
اختكم عفاف

اللي أنا عايز أفهمه ياأم أيمن
هل الكلام اللي تحته خط ده ...من ضمن القصيدة ؟

**Tarek Elemary** · #9 01/06/2009, 08h58

ده لب القصيدة

**عفاف سليمان** · #10 01/06/2009, 09h00

استاذى رائد
بعد صباح الخير على حضرتك
لا طبعا انا قصدت يعنى اللى يقراء الكلام ده ربنا يكفيه شر الجنان خصوصا انى كاتبه فى اخر الخاطره
الدنيا تبقى جنان
فقصدت اللى هيقرئها ربنا يكفينا ويكفيه شر الجنان
يعنى خارج الخاطره
ولك تحياتى واشكرك على مرورك عليها
تحياتى لك وللجميع
اختكم عفاف