فينك يا حلوة
---------------
فينك يا حلوة مش كدا -- دا حرام عليكى التقل دا
ميلى كدا -- وكمان كدا
ميلى يمين -- وكمان شمال
ياد الدلع ياد الدلال -- دا مفيش جمال بالشكل دا
------
إزاى يا حلوة أوصفك -- كل الحبايب تعرفك
غزال يا ناس -- هنوصف ايه
طب واحدة واحدة -- هنقول يابيه
نوصف غزال مالوش مثال -- ياد الدلع ياد الدلال
دا مفيش جمال بالشكل دا
------
والشعر ليل -- وليل طويل
خلانى اغنى يا عين يا ليل
نزل يبوس الكتف دا -- ويبوس كمان الكتف دا
امتى يا ناس -- أحظى بوصال
ياد الدلع ياد الدلال -- دا مفيش جمال بالشكل دا
------
ودا الجبين وللا القمر -- ياّنسنا فى ليل السهر
دا نوره صافى مفيش كدا -- عمال ينور كدا وكدا
نور الجبين -- عايشنى حال
ياد الدلع ياد الدلال -- دا مفيش جمال بالشكل دا
------
ودول حواجب وللا قوسين -- يرموا السهام ع المجروحين
دول مرسومين -- فوق العنين
زى جمالهم -- هتلاقى فين
واحد لوحده يبقا هلال -- ياد الدلع ياد الدلال
دا مفيش جمال بالشكل دا
------
اّدى العيون
حاسب يا واد لتجرحك
إوعاك تقرب
أحسن رموشها تدبحك
جوا العيون -- حكايات طويلة
ياما عشنا فيها -- قول ألف ليلة
عينى عليها تغمز كدا -- تلاقى قلبك مال كدا
وانا ذنبى أيه -- والقلب مال
ياد الدلع ياد الدلال -- دا مفيش جمال يالشكل دا
------
والبق خاتم -- والسنة لولى
والشفة نبقة -- يا ناس قولولى
لما بتضحك البرق يبرق -- قلبى ساعتها ماكان مصدق
الضحكة ليا -- والغمزة ليا
وفضلت أسأل نفس السؤال -- ياد الدلع ياد الدلال
دا مفيش جمال بالشكل دا
------
والرقبة عاج -- لأ لأ دى مرمر
لها حق تحكم -- لها حق تؤمر
لما تروح وتيجى كدا -- عبير يفوح مفيش كدا
تشوفها تنسى عم وخال -- ياد الدلع ياد الدلال
دا مفيش جمال بالشكل دا
------
ودا أيه كمان يا غصن بان
دا غصن بان وطارح رمان
على غصنه طاب -- طاب من زمان
عمال يروح ويجى كدا
وتانى يرجع بالشكل دا
وانا صبرى راح م الحسن دا
ياناس ياهوه طالب الوصال -- ياد الدلع ياد الدلال
دا مفيش جمال بالشكل دا
------
مكسوف يا حلوة اكملك
خايف لوصفى يخجلك
ميلى كدا -- وكمان كدا
قدام كدا -- وكمان ورا
والخطوة دى ع المسطرة
واللفتة تسبى معطرة
من دا القوام -- زاد بى الغرام
والشوق كايدنى والقلب مال -- ياد الدلع ياد الدلال
دا مفيش جمال بالشكل دا