احبائى ..
اقدم لكم اللحن اللى قلت عليه انه من الصعب ان حد يدونه .. رائعة عبد الحليم حافظ وشادية ولحن السنباطى ..
لحن الوفاء ..
وزى ما قلت انى متردد من عشر سنوات انى اكتبه لأنه ان ما اتعملش بالمستوى اللائق حايتفسد .. وده للأمانة يعنى عبد الحليم والسنباطى وشادية اصدقاء وفيه بينى و بينهم عشرة وعيش وملح .. يعنى الاول اسمع التسحيل كذا مرة شوف الميزان بيتغير كام مرة .. والنوتة بدون المقالة الى بكتبها ابقا ظلمت الناس دول .. اول حاجة التوزيع .. زمان كان الملحن بيخاف على اللحن بتاعه ان التوزيع يفسده .. فكان بيحذر الموزع من انه يمس اللحن الاصلى لأنك كمواطن من عامة الشعب ودول 99% من المستعمين ممكن تدندن اللحن .. لكن مش مكمن حا تدندن التوزيع لأن ده مش حايفهمه غيرحد دارس موسيقى .. ف .. لو الموزع اعتدى على الحن وخلاه متداخل ف التوزيع كده اضمن ان ال 99 % من المستمعين مش حايفهموا اللحن كده الحن مات ..وده الى بيحصل دلقوتى للعلم فى90 % من الاغانى الموزعة... التوزيع كان اندريا رايدر وده واحد يعنى له افضال على الموسيقى المصرية عمل اعمال عظيمة ولما تسمع مع كل التوزيع الضخم جدا تحت اللحن لكن اللحن واضح زى الشمس .. لما نيجى للشكل العام ( وانا بحاول ارتب افكارى ) كان فريد عامل قبل كده ييجى خمسين فيلم وعبد الحليم لسه طالع ف لازم يعملوا ل عبد الحليم شكل حلو ..فيه ل عبد الحليم نوعين من الافلام الفيلم اللى بيطلع فيه مطرب صغير وبيتشهر ونوع اللى بيبقىطالع فى القصة شاب عادى وبيغنى زى ايامنا الحلوة وفتىاحلامى .. ف الافلام الى حايطلع فيها مطرب كان لازم يتعمل على المسرح سيمفونية ضخمة بعدد رهيب من العازفين والى انت بتشوفهم دول مش هم اللى سجلوا اللحن اصلا لأن الفرقة الماسية ماكانتش بتطلع فى السينما إلا فى افلام تعد على اصابع اليد الواحدة نظرا لأن السنما كان وقتها التصوير تعذيب يعنى بتقعد وقت طويل اوى مكمن اغنية تتصور على يومين او 3 بالذات لو فيها شغل زى اللحن ده .. من ضمن التضخيم ف الصورة تلاقى 4 قانون و3 رق وييجى خمسين كمنجة زائد خمس من كل نوع آلة .. اما الفرقة اى سجلت اللحن ده بالذات ده موضوع تانى .. عشان تطلع اتوزيع ده اللى هو مزيج بين الشرقى والغربى الاوركسترالى السيمفونى .. كان فيه تقليد بيتعمل فى النوعية دى من الاغانى العازف الشرقةى مش حايديك الغربىالسيمفونى .. والعزف السيمفونى مش حايديك الشرقى التطريبى .. كان وقتها فيه فى مصر جاليات من الأجانب ايطاليين ويونانيين وروس وارمن كان منهم موسيقيين وكورال دول كانوا عماد اوركسترا القاهرة السيمفونى ليه لأن الأجنبى مولود بيسمع بيتهوفن ودخلوه الكونسرفاتوار فى فيننا او روما من سن 6 سنوات طبعا غير المصرى اللى لسه حاتعلمه يعنى .. كمان الكورال الرهيب .. يعنى لاحظوا الكورال اللى ف المقدمة وانا كاتب كورال اوبرا .. وده بيختلف عن الكورال الشرقى بتاعنا اللى بعد كده غنى المذهب .. فكانوا بيجيبوا الفرقتين .. الفرقة الماسية بالكورال بتاعها والاوركسترا السيمفونى بالكورال بتاعه وكل يؤدى الدور المكتوب له . من نفس الاجانب دول برضه كان فيه راقصات .. ودول الى شكلهم واضح زى الشمس فى استعراضات الافلام بالذات مع فريد ومحمد فوزى يعنى لو مطلوب استعراض شكله اجنبى بيجيبوا الاجانب استعراض شرقى بيجيبوا العوالم بتوع شارع محمد على .. لما نيجى لخطورة وقوة اللحن .. السهولة والسلاسة هى الاساس .. بس لو حط جملة صعبة زى المازورة اللى بترد على غنيلى لحن الوفا ... بيتعمد الملحن انها ماتتعداش مازورة وتكون حلوة مش ملعبكة او اظهار قوة .. وماتبقاش طويلة عشان زى ما قلنا هو بيلحن لعامة الشعب .. وجدير بالذكر هنا كلمة خطيرة .. شفتم فيلم الايدى الناعمة لما كان احمد مظهر مخه ضارب عايش فى كوكب تانى وعامل نفسه بيألف سيمفونيات وراح لأدمون تويما يبيع له الموسيقى فقال له كلمة دى موسيقى برنسات والناس حاتفهمها بعد 20 سنة انا عايز موسيقى للشعب ,, هنا هو كان بيشتمه بالذوق .. لأن الموسيقى معقدة جدا وصعبه جدا وماحدش حايفهما اصلا فاهمين قصدى ؟ يعنى لا دلوقتى ولا بعد عشرين سنة .. يعنى ك واحد بيشترى موسيقى لو كان فاهم انهم حايفهموها بعد عشرين سنة كان اشتراها وركنها لما ييجى اللى يقدرها وكان حايكسب فيها .. وللعلم ده الى حاصل دلقوتى ناس بتتفزلك وتعمل موسيقى صعبة جدا ومش حلوة بس استعراض شطارة زى مقدمة اغنية انغام سكة سفر انا كتبت نصها وقرفت يعنى صعبة بشكل رهيب متعمدة العرقلة يعنى مقصود انهاه تبقى مش مفهومة يعنى انا الموسيقار المخضرم قعدت كتير اوى عشان استوعب تفعيلة الجملة طيب عامة الشعب حايفهموها ازاى ؟؟؟ وده الفرق الخطير بين اغانى الزمن الجميل ودلوقت يعنى انت ممكن تكون حافظ 1000 اغنية لأن كان الاغانى جميلة جدا ولكن سهلة يعنى تقدر تستوعبها لذلك سموها السهل الممتنع ولذلك الاغانى عاشت وحتعيش .. لما تسمع الجملة الفالس الى قبل غنا شادية انا كمدرس كمنجة بقول دى مش ممكن تتعزف إلا لو الكمنجات مظبوطة غربى عشان تطلع بالنعومة دى حيكون كل الحروف تحت صوابعك فى البويسيون الاول لكن لو شرقى ممكن تحصل لخبطة بين البوزيسيون الاول والتالت لسبب .. ان المعاهد الموسيقية مكانتش بتهتم بالكمان الشرقى يعنى واناطالب فىالكلية كان فيه قسم كمان شرقى كان وبيودوا فيها الفاشلين عشان التمارين فيه سهلة مش صعبة جدا جدا زى الغربى .. ولما لقوه مالوش قيمة قفلوا القسم وخلوهم كلهم عود يعنى كلنا كعازفين شرقيين دارسين غربى والشرقى اللى بنعزفه ده مهارات شخصية .. لذلك ممكن تحصل مشاكل زى كده لو جملة محتاجة الكلام اللى بقوله لأن عشان الجملة تبقى ناعمة زى الحرير لو عندك 12 كمنجة لازم كلهم يطلعوا نفس البوزيسيون مع بعض مش لسه وانا واقف ف الاستويدو حاعلمهم يقولوها ازاى لأن كل واحد حيقولها بطريقته .. فاهمين قصدى ؟ لكن لو غربة بيبقىعازف تتقال ازاى اخدها قبل كده كتير واترككم مع اللحن وجايز الردود تجيب اسألة تانية احنا مع بعض وآخر حاجة اقولها انت لما تسمع الحن تحسه انه صعب جدا لكن الشطارة انه حد يدونه بطريقة حتلاقيه بقا سهل ومع اطيب تحياتى