[حمدى شبانة]

( 5 )

ياللى عاوزين العيال
ــــــــــــــــــــــــــــــــ

ياللى ماشية بالتمام
الولادة ف كُل عام
صحِتك ضاعت هَدَر

جوزها بيقول العيال
كُترُهم عزوة ياخال
ينفعوا عـند الكَبَـر

تلتقيه ف الهم بات
عنده خمسة م البنات
بس نِفسُه فى دَكَـر

بُكرة أنا شايفه أمامى
اللى عاطل أو حرامى
خدوا من غيركُم عِبَر

بكرة جايز يلعـنوك
يعنى مش حينفعوك
أصل عِيشِتهم كّدَر

يامُثبِّت العقول
كل يوم حياكلو فول
ونتا منحول الوبّر

والمعيشة مش تمام
فى ملابس أو طعام
راجل البيت افتقر

يكفى بس عيلين
يطلعوا متعلمين
قيمة مابين البشر

ــــــــــــــــــــــــــــــــــــــــــ

حـمـدى شـبـانـة