[unicorn]

من اشعار بيرم التونسى

مرمر زماني يازماني مرمر

البنت ماشية من زمن تتمخطر

والغفلة زارعة في الديوان قرع اخضر

يا راكب الفيتون وقلبك حامي

أسبق على القبة وسوق قدامي

تلقى العروسة زي محمل شامي

وأبوها يشبه في الشوارب عنتر

وغطى زهر الفل فوقها وفوقك

وجيبلها شبشب يكون على ذوقك

ونزل النونو القديم من طوقك

يطلع كويس لا الولد يكبر

ويوم ما ينزل في الجاكتة الكاكي

وستة خيل والقمشجي الملاكي

تسمع قولتها ........

العافية هابلة والولد متشطر

الوزة من قبل الفرح مدبوحة

والعطفة من قبل النظام مفتوحة

ولما جت تتجوز المفضوحة

قلت اسكتوا خلوا البنات تستر

فى الطريــــــــــــــق

أربع عساكر جبابرة يفتحوا برلين

ساحبين بتاعة حلاوة جاية من شربين

شايله على كتفها عيل عنيه وارمين

و الصاج على مخها يرقص شمال و يمين

إيه الحكاية يا بيه ؟ جال خالفت الجوانين ؟

إشمعنى مليون حرامى فى البلد سارحين

يمزعوا فى الجيوب و يفتحوا الدكاكين ؟

أسأل وزير الشئون و لا أكلم مين ؟

الغش و الغــــــــــــلا

الأكل و الشرب فى إيد اللومنجية

و الطماعين اللى غلوا الملح و الميه

و الغشاشين اللى فاقوا على الحرامية

الشاى بالمفتشر مخلوط ملوخية

والبن فيه الشعير تسعين فى الميه

و الميه و العيش برمله و طينه يا ملوخليه

و اللحم معروض بدون أختام رسمية

و الميه هيه اللبن و لا اللبن هيه

أفاعى متسيبه من غير رفاعيه

و دنيا مترتبه ترتيب فلاتيه