حكاية الشيخ فؤاد وسطوحى
--------------------
بعد الصلا ع النبى هو نبينا الزين
نبى جى رحمة لنا وصانا بالوالدين
تنفيذ وصية حبيبى دا من تمام الدين
يارب لجل النبى اجعلنا مقبولين
-----
الشيخ فؤاد كان له ورث أراضى معقول
كمان له شغل حكومى شهرى الراتب على طول
ومراته كات مسرفة بالفعل ويا القول
وهو بيحبها وعمره لها ما يهين
-----
سنة تروح ورا سنة والشيخ فؤاد بيبيع
الأرض كدا حتة حتة لقرايبه م المقاطيع
يسددوا له التمن تقسيط بشكل فظيع
والخلفة عنده كتير كام بنت مع ولدين
-----
والشيخ فؤاد فى البلد طبعه حامى معروف
ميال كمان للخير ودا برضه شيئ معروف
ومع اجوزة بناته معاملة بالمعروف
حتى اللى تغضب ما يسألها انتى جاية منين
-----
بعد ماتاخد واجبها ياخدها يوديها
يقعد كمان مع جوزها ما يجيب سيرة ليها
ويكلمه فى أى شيئ والطارئة يعديها
ويرجع تانى على بيته يقعد مع القاعدين
-----
حماه كان راجل أمير ومنه اتعلم
ان السكوت من دهب لو حب يتكلم
ويبقا الكلام معقول مافى حد يتظلم
منه بقا بالقول والعقل حلو وزين
-----
وولده البكرى شكرى أخد شهادته وراح
قعد فى محافظة نائية فاكر بكدا يرتاح
والشيخ سابه على راحته لو حتى جا أو راح
جواه أهو بيدعيله ويقول فى سره أمين
-----
أما البنات ما فلحوا أبدا فى أى علام
جزم قديمة امخاخهم لا فهم ولا إفهام
والدين قليل عندهم والصحة وافية تمام
وكل واحدة منهم تشبه لجالس طين
-----
ماعدا أصغر بنت هى اللى فلحت فيهم
وبقت مهندسة شاطرة والنار قادت فيهم
وكمان أخوهم الصغير ودا كان تابع ليهم
أما امهم شريرة ماتحبش الناجحين
-----
المهندسة اتجوزت مهندس زميل ليها
وكان قوى يحبها وما حب قبليها
وأى حاجة تطلبها حالا يلبيها
والحب نعمة جميلة والكره عقبه شين
-----
وكان يعامل اهلها بالضبط زى اهله
دايما يلبى الندا لو حد يندهله
عمل مجاملات ياما فى ناس ما يستاهلوا
يبتسموا له فى الوش والحقد جوا دفين
-----
ولما المهندس سافر قعدت فى بيت ابوها
واللى ما طاقشى نفسه فى الحالة دى أخوها
أخوها أصغر منها ومعاه ربوها
اسمه سطوحى ويشبه تيس وله قرنين
-----
والواد سطوحى اتجوز وقعد فى نفس البيت
جوازته بفلوس من أخته وهو أصله تبيت
وأمه تقابل حبها بغلاسة مع تغتيت
وسطوحى مع أمه حلف ومعاهم الشياطين
-----
وكان كبر الشيخ فؤاد وبدون سابق إنذار
سطوحى افتعل خناقة مع أخته جواه نار
وزعق بعلو صوته وعنيه تطق شرار
والكل قاعد وسامع وأبوه مع القاعدين
-----
البيت دا بيتى أنا ومفيشى حد يقول
كلمة غير كلمتى وغير كدا اللى يقول
أى كلام بقا تانى له عندى بعد القول
انى اضربه بالجزمة وكلكم سامعين
-----
بيبكى الشيخ فؤاد لأن طاله الهوان
لو كان بقا بصحته ماكانشى بالإمكان
ان ابنه يغلط فيه كان دوقه الحرمان
يمكن كمان يطرده فى الشارع شهور وسنين
-----
الشيخ فؤاد جات له جلطة يومين تلاتة ومات
والمهندسة سكنت بره بعد العزا ما فات
وجوزها رجع وأخدها وقعدوا فى الإمارات
سابوا البلد وما فيها للحقد والحاقدين
-----
نرجع بقا لسطوحى أمه معاشها كبير
حوالى كدا ست الاف شهرى بقا ودا غير
معاش كمان م النقابة يعنى الحصيلة كتير
ينام عليها سطوحى ما يسيب لها جنيهين
-----
وكمان سلط أمه على كل اخواته
يسيبوا الميراث فى البيت ودى عيشته وحياته
لأنه غلبان يا عينى واّدى دنياته
دايما بقا معاكساه علشان كدا مسكين
-----
ونجحت أمه فى كدا وتم له ما أراد
حتى اللى سابوا شرا أخدوا يدوب بالكاد
عشر السعر اللى ماشى والدفع بعد ميعاد
وخلص البيت بإسمه بمعاونة الشياطين
-----
ومن المعاش الكبير جدد بناية البيت
وعمل له برضه خميرة فلوس فى بنك وبيت
وأمه عاشت له كتير وهو زاويها فى البيت
ولو حد جى يزورها يقول نايمة من ساعتين
-----
وسطوحى بقا كان عنده بنت وتلات اولاد
البنت نانى بعدها ييجى أخوها عماد
بعده فتوح بعده لطفى ودى أسامى لولاد
والدنيا ساقية ودايرة تلف شمال ويمين
-----
وبنته كبرت ماجالهاشى كتير خطاب
وأول واحد خلع من قبل كتب كتاب
وخد شبكته والهدايا ماقالوشى أيه الاسباب
وكان قريبهم وسكة أم شورة شين
-----
وتانى واحد خلع وجه بداله تالت
لما الجوازة مشيت قالوا خلاص طابت
قعدت يدوبك سنة وأهله فيهم عابت
بعد ما ولدت بنت مات جوزها يوم الاتنين
-----
رجعت لبيت أبوها ماهى كانت فى بيت عيلة
ورجع سطوحى من تانى وشال دى الشيلة
قعدت معاهم شهور ياما بقا طويلة
وعماد عايز يتجوز وإقامته هتكون فين ؟
-----
قال الدور الفوقانى ليا وانا براحتى
والكل فى التحتانى ماتقلقوش راحتى
والكبد ماسك سطوحى ومراته تقول ياختى
الراجل خلاص اتنخل بقا يا ناس مسكين
-----
وقبل الجواز بيومين وبدون سابق إنذار
عماد افتعل خناقة مع أخته جواه نار
وزعق بعلو صوته وعنيه تطق شرار
والكل قاعد وسامع وسطوحى مع القاعدين
-----
البيت دا بيتى أنا ومفيشى حد يقول
كلمة غير كلمتى وغير كدا اللى يقول
أى كلام بقا تانى له عندى بعد القول
انى اضربه بالجزمة وكلكم سامعين
-----
وان كان ياخوانا لسه فى العمر تانى بواقى
وماوافتنيش المنية سبحان الحى الباقى
هيبقا فيه مرة تانية ونحكى ساعة التلاقى
حكاية ليكم جديدة بأمر رب معين
-----
هانئ الجمل