عرض مشاركة واحدة
  #8832  
قديم 09/08/2022, 13h15
الصورة الرمزية عادل صموئيل
عادل صموئيل عادل صموئيل غير متصل  
Moderator
رقم العضوية:249452
 
تاريخ التسجيل: juin 2008
الجنسية: مصرى
الإقامة: مصر
العمر: 73
المشاركات: 552
افتراضي رد: طلبات نوتة أ / عادل صموئيل الجزء الثانى

احبائى
اقدم لكم اغنية عبد الحليم حافظ

وحياة قلبى وافراحه

... الاغنية دى من تلحين الملحن العبقرى منير مراد .. الاول حتكلم عن الحاجةالى ماعجبتنيش وهى التوزيع اللى عامله على اسماعيل .. كان زمان ايام السينما لما كانت سينما وكان اسمها الشاشة الكبيرة يعنى قاعة ضخمة وشاشة ضخمة وعشان اللى بيعمل فيلم يملا المكان والضخامة دى كان لازم يكون الفيلم ضخم كانت اول حاجة التركيز عليها هى الموسيقىالتصويرية .. وكانت اما موسيقى كلاسيك اوموسيقى لعباقرة مثلا فؤاد الظاهرى وكان صديقى وتشرفت بالجلوس معاه والعمل معه فترة من حياتى .. كان فؤاد الظاهرى بيجيبوه لما يكون فيلم مصرى اوى زى الزوجة الثانية او ثلاثية نجيب محفوظ يعنى الحى الشعبى المصرى .. او بيعملوا الموسيقى منتخبات من الموسيقى الكلاسيكية كان بيعد الموسيقى ناس عباقرة حافظين السيمفونيات صم وعارف فى المشهد ده يضع موسيقى لمين .. المهم ان عبد الحليم والذى ظهر فى مرحلة متأخرة يعنى اوئل الخمسينات ومتأخرة يعنى كانت السينما المصرية خلال العشر سنوات السابقة لظهور عبد الحليم وصلت للذروة .. ف عبد الحليم كان متأثر اوى بالشكل الضخم بتاع الشاشة الكبيرة والموسيقى الصاخبة فكان بيحب يوزع معظم اغانية .. كان فيه اول ماظهر اندريا رايدر .. وده كان موزع عازف كمان اصلا يعنى كان بيدى الوتريات نصيب الاسد وده ال خلا افلام عبد الحليم اللى عملها اندريا رايدر الاغانى ناعمة رومانسية .. وبعدين دخل على اسماعيل على الخط .. على اسماعيل كان عسكرى بتاع موسيقات عسكرية .. يعنى بيميل الى الآلات النحاسية اكتر .. كانت احيانا بتبقى حادة اكتر من ال لازم .. يعنىانت لما بتوزع لحن بتعمل له شكل تانى خالص غير الشكل الاصلى .. يعنىلو انت سميع قديم .. فىالخمسينات والستينات .. مصر تعرضت لحروب كتير وهزيمة وانتصار .. ظروف الحروب كانت بتنتج اغانى او اناشيد وطنية اما ساعةالحرب بنحتاج اناشيد حماسية اوى اوى يعنى زى دع سمائى ف سمائى محرقة .. حاجة تخلى العسكرى ف الحرب يرمى نفسه ف النار .. ودى كانت بتعتمد على الآلات النحاسية .. يعنى يقلب لك الفرقة مجنزرات ومدافع .. وفيه نوعية تانية وهى اغانى النصر .. دى كانت بتبقى انعم شوية والنحاس فيها بيبقى اهدى شوية .. فهمتوا قصدى لحد كده ؟ هنا فى اللحن ده على اسماعيل مافهمش طبيعةمنير مراد الرومانسية الخفيفة يعنى لما تسمع الحن اداه توزيع مجنزرات ومدافع ودى تلاحظها فى المقدمة .. وبيبان اوى اوى انها مش ف مكانها لما تسمع صولوا الناى بعدها .. يعنى نقلة كأنك فى مكان مزدحم جدا جد وصاخب وتدخل منه على مكان هادىء صامت .. يعنى التوزيع كان زيادة عن اللزوم او على اسماعيل تخيل انها معركة حربية مش واحد كسبان انتخابات .. وايه انتخابات اتحاد طلبة فى الجامعة .. .... وهنا انا احب اتكلم عن صديقى الملحن الجميل العبقرى منيرمراد .. احنا كان المكتب بتاعنا بتاع الفرقة الماسية 34 شارع عدلى فى وسط البلد فى الدور السابع .. وكان جنبنا بنزينة .. وبعدها عمارة ساكن فيها منير مراد فى الدور السابع ايضا .. يعنى كان بيننا لغة تخاطب من النوافذ .. وكنت بروح ازوره واسهر معاه احيانا .. ومرة قال لى حعمل لك مفاجأة بس هات معاك الكمنجة .. وفعلا نزلت رحت له وقال لى حنروح مشوار .. وركبت معه عربيته وتخيلوا رايحين فين .. ( وهو كان معاه العود بتاعه ) .. انا صعقت لما دخلت فيللا واكتشفت اننا عند الفنانة الرائعة ليلى مراد وعملنا سهرة من سهرات ماتتحسبش من العمر يعنى عزفنا لها وقعدت تغنى للصبح .. واهم شىء انها اكتشفت انى حافظ كل اغانيها .. وده الى خلاها تطلع كل المحبوس جواها.. لأن انت لو حبيت تشوف احلى 100 اغنية من اغانى الزمن الجميل ليلى مراد حايطلع لها نصيب كبير .. والفنان ( وانا بتحصل لى .. لما يكون مش بيعزف وقت طويل لما بتيبجى فرصة حد بيشجعه ممكن يعزف لتانى يوم ... للعلم منير مراد ده مش ملحن اغانى خفيفة ولكن ملحن طرب اصيل يعنى بس ما اخدش حظه كاملا .. يعنى كان ابوهم اسمه زكى افندى مراد كان مطرب كبير وشهيرومتمكن من بتوع التلاتينات .. بالطبع ليلى ومنير اتولدوا فى بيت فنى .. يعنى مستحيل كانوا يوصلوا للمستوى ده ( وشوفوا اوائل افلام ليلى مراد ) إلا لما يكونوا متربيين على فن اصيل رائع ... رحم الله الجميع ومع اطيب تحياتى
الملفات المرفقة
نوع الملف: pdf وحياة قلبى وافراحه.pdf‏ (31.2 كيلوبايت, المشاهدات 72)
__________________


صفحة معزوفات الاستاذ عادل صموئيل على الكمان

http://www.sama3y.net/forum/showthread.php?t=46963

رد مع اقتباس