[عادل صموئيل]

الاخ العزيز عاصم
وسلامى الى الاخ العزيز احمد ارمندو وهو قال اللى عايز اقوله
لكن اضيف انت مثلا كمرشد شياحى ايه اهم مقومات المرشد السياحى الناجح ؟
يعنى اولا يكون بيجيد عدة لغات ثانيا يكون حافظ البلد اللى بيشتغل مرشد سياحى فيها شبر شبر وحارة حارة وزنجة زنجة
يعنى فيه سائح لمض يسألك مثلا عن بلد زى ملوى فى المنيا بتماز بحاجة خطيرة جدا جدا وهى نوع رائع رهيب من الجبنة البيضاء مش موجود فى العالم اجمع لما تكسرها تلاقى الخروم اللى جواها فيها سمن بلدى , ممكن يكون واحد اجنبى عارف الموضوع ده ومصريين كتير ماعندهمش فكرة عنو ... زائد المرشد السياحى لازم يكون عنده خلفيات عن الفنادق والاتوبيسات والليموزين وكل اللى انت عارفه ... زائد يكون عنده فكرة عن الاطعمة المصرية الاصيلة ممكن تتاكل فين وعند مين .. يعنى فيه محلات متخصصة بتعمل كشك صعيدى ومسقعة وقلقاس وملوخية والذى منه ... لأن معظم السواح قبل ما ييجوا مصر بسنة بيشتروا كتب ويقعدوا يقروا عن مصر بحيث لما ييجى ما يبقاش زى الفلاح اللى اول مرة يزور المدينة ويمشى اهبل فى الشوارع مش فاهم حاجة .. انا ليا اصحاب كتير اجانب بيزوروا كل سنة دولة بيعملوا خطط يعنى يروح فين السنة الجاية واللى بعدها .. وعشان يتمتع اقصى مدة بالفلوس اللى بيدفعها انو بيجيب كتب وبيدخل على النت يجمع اكبر كمية ممكنة من المعلومات عن البلد اللى رايحها والنوعية دى من السواح خطر جدا من ناحية انو بعد مايرجع بيقول لأصحابه الشركة اللى استضافتنا دى شركة محترمة جدا ويجيب لها كل اصحابه او يقول دى شركة زبالة ماتتعاملوش معاها .. من ايه ؟ انو قرأ عن مصر وجمع معلومات وانت فرجته كل اللى نفسه يشوفه اما الشركة الزبالة بتفرجه على نص اللى هو عايز يشوفه مقدما .. المقدمة دى بقولها لك كمرشد سياحى لو كانت لدكتوراو مهندس كنت حقول له كلام من مهنته
ايه السبب ان اغانى اليومين دول زبالة الزبالة ومافيهاش جمل لحنية وكل الجمل اللحنية متشابهة او هى هى تقريبا بس اللى مش بيخلى العيب ده ظاهر اوى اوى التوزيع والدوشة اللى بيعملوها وبتخفى معالم جريمة سرقة الالحان .. يعنى ايامنا .. لما كانت الفرقة بتقول الجملة بدون دوشة كان لو جملة شبه جملة سابقة بتبان فى لحظة حتى احنا واحنا فى البروفات بننبه الملحن وكان بيغيرها فورا
لما تسمع مطرب من الفظاع بتوع زمان وتسمعه بيقول قفلة نووية .. لازم الملحن نفسو يكون بيغنى بإقتدار مفزع وهو لحنها وقالها للمطرب يعنى حفظها لو ... والملحن اساسا عشان يبقى الكلام على مية بيضا اصلا بيتدى ازاى ؟
اول شىء بيبقى هاوى موسيقى يعنى سميع درجة اولى وبعدين بيتعلم العزف على آلة ما وبيوصل فيها لدرجة عالية
بعدين اخطر شىء ان الملحن اللى حايبقى ملحن متميز ده لازم بيكون امتداد لحد سابق .. يعنى قعد يسمع ويسمع ويحفظ ويعزف ويتعلم من اللى قبله .. لو مكانش اولا بيعرف يغنى اوى اوى اوى اوى مش حايقدر يلقط عبقريات الاسلاف .. يعنى عبد الوهاب ماطلعش كده جه من بيتهم وراح بقى كده يعنى من وهو طفل قعد يسمع سيد درويش واللذين معه والمشايخ وعشرات العمالقة ... لما تجيب لحن زى الجندول مثلا والعبقرية اللى فيه مش ممكن ملحن يطلع شىء رائع زى كده إلا انه يكون قعد سنين بيسمع ويذاكر الحان ناس سبقوه .. بالتالى هات واحد عايز يلحن وقول لو غنى لى الجندول لو قالها 100% يبقى ممكن يجى منه لو ماعرفش يقولها او قالها 20 % يبقى يروح يتنيل على عينو ويشتغل بتاع بطاطا احسن له .. لأنه لو غنى الجندول ممكن يعرف يلحن حاجة على المستوى لكن لو ماعرفش يغنيها يبقى كبيره ذهب الليل ... نفس الموضوع فى العزف انا لما اكون عازف شاطر اوى اوى اوى بسمع اى حاجة اعزفها صح 100% مع الدراسة بكون طبعا فاهم اللى بعزفه يعنى مثلا فيه جملة لعبد الوهاب فيها حركة او لمسة لمقام تانى تخليك تصرخ وتقول الله لو انا مش فاهم اللى بقولوه لو لحنت مش حعرف اعمل الحركات دى
الحاجة الاخيرة لما الملحن بيلحن حاجة ويمليها لى اكتبها نوتة انا بكتب من اللى هو بيعزفه مش معقول تيجى حتة ما يعرفش يعزفها على العود ويقولها لى ببقه .. لأنو اصلا لو مايعرفش يعزفها من المؤكد انه مش حايعرف يلحنها
والخلاصة طبعا انت سمعت عبد الوهاب والسنباطى والقصبجى على العود وشوف انت
المشكحلة الخطيرة الملحنين بتوع النهالاده كمان مش بيستعملوا الاورج ... يعنى فيه ملحن اصلا بيلعب طبلة المفروض ده بتاع ايقاع مالوش فى الموسيقى يعنى بيمسك الطبلة ويطبل ويلحن ببقه تارا رار رار ولما سكتنا لو دخل بحماره طلع ملحن كمان ما بيعرف طبلة بيلحن ع الترابيزة يعنى يطبل على الترابيزة ويعمل اللحن ببقه ... والاشكال دى بيبقى كمان اللى بيقولوه ببقه نشاز .. والشغل بيعملوا له واحد على الاورج ممكن بيسمع منه حاجة تانى غير اللى بيقولها وممكن الملحن مش فاهم ان فيه حروف غلط .. وبالطبع لما ييجى المطرب يغنى ويفلت منو حروف مش حياخد باله
يعنى تخيل لو انت جمعت كل اغنية غناها كل مطربين الزمن الجميل ويطلعوا 2000 اغنية مش حاتحصل ان مطرب وقع منه حرف واحد فى 2000 اغنية ... لأنو لو بيوقع حروف الملحنين مش حايلحنوا له تانى ويقعد فى بيتهم .. دلوقتى زمن الارقام القياسية فى النشاز يعنى فى الاغنية الواحدة شوف كام حرف طاير وكلو بيبع والمطرب بياخد فى الحفلة اد اللى اخده عبد الحليم طول عمره وحكمتك يارب
مع اطيب تحياتى