[غواص النغم]

المشاركة الأصلية كتبت بواسطة عادل صموئيل

احبائى
فدوى عبيد

.. يعنى فدوى عبيد دى انا اول مرة النهاردة اسمع لها اغنية عاطفية ..
اكتشفت ان صوتها جميل اوى .. وبتقول ..
لأنى طول عمرى كنت بسمع لها اغنية لبيك اللى عاملها لها السنباطى وكتر اذاعة اغنية لبيك فقط حطها فى خانة الصوت المقاتل مش الصوت العاطفى ..
.. النهارده اول مرة اكتشف ان فدوى عبيد صوتها انثى وجميلة جدا
يعنى كمان مش صوتها حلو فقط
ولكن بتؤدى اغانى صعبة والدليل اغنية لبيك للسنباطى ..
اطيب تحياتى

مرحبا أستاذنا العزيز
كل عام وأنتم بخير
متابع لكتاباتك ولازم ازور موضوعاتك و استفيد من كلامك ربنا يحفظك
لفت نظري كلامك عن فدوى عبيد وواضح أن السنباطي كان
مش سهل يعطي ألحانه لأي صوت ولهذا فهو كان عارف
حلاوة صوت فدوى عبيد ولحن لها أكثر من دعاء ديني
ولحن لها عاطفي أيضا اغنية عايزة اسامحه. .
وأيضا لحن ب اعتبره من أجمل اغانيها
وأبرز تمكن و جمال صوتها وهو لحن بديع في رأيي
حبك على جبيني قدر
https://www.sama3y.net/forum/showpos...2&postcount=77

يقال زمان أن السنباطي يحتفظ ب ألحانه الجميلة لأم كلثوم
ويعطي فتات ألحانه لبقية الأصوات. . ده فتات !!
... في الآخر ياريت نعرف ذوقك في الغناء ايه يعني
بتحب مين في الأصوات و من مطرب ومطربين المفضلة ؟
ومن اللي كنت تعزف على الفرقة وتتسلطن ذوقيا معه ؟
وهل بيتغير الذوق الموسيقي مع تقدم العمر ؟
امدك الله بطول العمر والصحة والعافية

تحياتي

اخى العزيز ..
السنباطى لما يكن يعطى .. ولكن كان المطرب هو اللى بيكلفه يلحن له .. وبالطبع كان لأم كلثوم نصيب الاسد وكانت اغنية ام كلثوم بتستغرق معاه سنة فى اعدادها .. اما المطربين الآخرين فكانوا هم اللى بيطلبوا من السنباطى ان يلحن لهم ... والسنباطى معنوش فتات .. او تقول عنده اغانى كبرة الحجم واغانى صغيرة الحجم وبرضه المطرب هو الى بيطلب الحجم .. وحجم الاغنية ده كان بيحدده عوامل كتير يعنى مثلا لو انت مطرب وعملت اغنية طولها نصف ساعة .. كان اهمبة الاغنية زمان انها تتذاع فى الاذاعة .. وعشان تتوضع اغنية فى خريطة الاذاعة طولها نص ساعة كان لازم تكون لحد كبير يعنى ام كلثوم او عبد الواهب او عبد الحليم ولو اى حد مش مشهور اوى الاغنية حتموت لذلك الذكاء بيتطلب ان لو انت مطرب متوسط الحجم اعمل اغنية خمس دقائق ودى تضمن انها تتذاع كذا مرة فى الاسبوع ..لأن خرائط الاذاعة فيها مساحة الخمس دقائق متوفرة كتير جدا وبالطبع الى بيوضع الخريطة بيحيب التنويع ... اما مين المطرب اللى انا احبه .. بخلاف العمالقة انا احب عبد المطلب واعشق فيروز وفيه ناس مش اتشهروش اوى لكن انا بحبهم يعنى اعشق اغنية طير الطير من نعا لهناء الصافى مثلا .. وكنت اتسلطن لما اعزف مع فايزة احمد جدا .. والذوق الموسيقى مش بيتغير مع تقدم العمر .. يعنى انا عن تجربتى او بمشاهداتى ك شاهد على العصر او مؤرخ .. يعنى بعد سنة 1985 حصلت شقطة رهيبة فى الفن بدأت بسقوط تدريجى لحد ما حصل الناهية يعنى الناهردة لما تسمع اللى بيغنوا بعد ما كنا نسمع نجوم الزمن الجميل .. حصل جيلين من الجمهور جيل بيسمق القديم وحيل بيسمع الجديد ومش ممكن تقنع طبعا من يسمع ام لكثوم انه يسمع اللى بيغنوا دلوقتى ببساطة لأنهم مش بيغنوا .. مع اطيب تحياتى