عرض مشاركة واحدة
  #5  
قديم 16/12/2013, 02h45
الصورة الرمزية عادل صموئيل
عادل صموئيل عادل صموئيل غير متصل  
Moderator
رقم العضوية:249452
 
تاريخ التسجيل: juin 2008
الجنسية: مصرى
الإقامة: مصر
العمر: 73
المشاركات: 552
افتراضي رد: ذكريات الزمن الجميل للفنان عادل صموئيل

احبائى
بالطبع الاسئلة هى اللى بتوجد خيط الكلام ونشد الخيط يطلع كلام انا دايما لما بكتب مش بكون محضر كل العناصر لكن وسط الكتابة بتطلع حاجات تانية والكلام بيجيب بعضه ,
الكلام عن الفنانين واول مرة التعامل معاهم .. بيختلف من شخص لشخص يعنى من عازف لعازف مع فنان او آخر
بمعنى انا طبعا نشأت وترعرعت ( حلوة ترعرعت دى ؟ ) يعنى اتولدت سنة 1950 وكل اهل بيتى ( مع ان ماحدش منهم مالوش لا فى الموسيقى ولا الشعر ) ولا حتى عائلتى الكبيرة يعنى كان ناس من اعلى الوظائف والدرجات لكن الفن مفيش خالص .. المهم انهم لاحظوا ان عندى حاسة موسيقية عالية جدا حتى من ايام الرضاعة يعنى كانت البزازة فى فمى ولما الراديو يذيع موسيقى حلوة كنت امتنع عن الاكل واسرح ولما مطرب يكون صوته وحش باكل وساعة البطون تتوه العقول وابى رحمه الله كان بيتذكر الايام دى يعنى لما يغنى عبد الوهاب كنت اسمع اوى ولما يغنى صالح عبد الحى كنت آكل ... لحد ما كان سنى عشرين سنة وابتديت العمل مع كبار العمالقة .. يعنى شعورى زى شعور اى شخص بيموت فى مطربين من زمان ونفسه يشوفهم اكيد اول مرة بيشوفهم بتحصل له حاجات غريبة وبيحس انهم مخلوقات آتية من الفضاء وفيه شعور تانى يعنى الشخص اللى انا بحس انه شخص عادى مثلى مثله .. ومن الامثلة هانى شاكر مثلا يعنى كان زميلى فى الكلية ( كلية التربية الموسيقية بالزمالك ) ماكانش لسه بقى هانى شاكر ... كان طالب عادى صوته حلو ونفسه يبقى مطرب وبعدين عرفنا انه هو اللى مثل دور سيد درويش وهو صغير فى فيلم سيد درويش بتاع كرم مطاوع .. يعنى انا كنت ابتديت اشتغل واعزف وكان هو لسه طالب فقط كنت بعزمه على الفطار وكان بيهزر معايا كان مسمينى عادل بيه فلوس نظرا لأنه كان لسه بياخد مصروفه من والدته كأى طالب .. ومن ضمن الهزار كان يقول لى لما اشتهر حاخليك تعزف معايا ... طبعا كعادة الحياة كان فى الكلية اكتر من طالب صوته حلو منهم الفنان محمد رؤوف وكذا واحد مش فاكرهم بعد كل السنين لكن هانى شاكر كان حظه من السما يعنى تهيأت له ظروف انه يبدأ من القمة يعنى ملحنين كبار وعلى الفرقة الماسية من اول مرة ويعنى من ناحيتى الآن بعتبر هانى شاكر من المعدودين الباقين من سلالة زمن الفن الجميل اللى بتنقرض .. حارجع تانى للكلام عن هانى شاكر بعدين بس اكمل موضوع لما تشوف فنان لأول مرة .. كان هانى شاكر بالنسبة لى شخص عادى لكن عبد الحليم مثلا كان حاجة تانية موضوع تانى يعنى هو النجم الكبير الى بسمعه من عشرين سنة فى الراديو ... الشعور ده كان بيحسه زملائى العواجيز منهم يعنى اللى عاصروا ام كلثوم اول ما ابتدت يعنى بيندهوا لها بإسمها عادى وكان ممكن واحد منهم يشخط فيها لو غلطت وكان زمان اعظم عازف رق فى تاريخ البشرية العربية اسمه ابراهيم عفيفى وهو أصلاً اتعلم منه العظماء اللى بعده يعنى حسن انور وحسين معوض ومحمد العربى وكل عازف رق كان ابراهيم عفيفى له فضل عليه حتى لو مش بطريقة مباشرة يعنى ممكن معاشرة شخصية يعنى عزف على مزهر او دف جنبه او سمعه فى الراديو بس بتمعن اوى واتعلم منه ... كان ابراهيم عفيفى ده ابتدا مع ام كلثوم اول ما قرروا يعملوا لها فرقة موسيقية .. يعنى انتم شفتم مسلسل ام كلثوم ؟ يمكن دى الحاجة الوحيدة اللى صح فيه ان ام كلثوم بنت فلاحة فقيرة جت من القرية بتنشد قصائد دينية بدون طبعا آلات موسيقية على طريقة المشايخ .. بعدين شاء الله ( الذى يعطى من يشاء ) ان ام كلثوم تتعرف اوى ويقبل عليها كبار الملحنين واقنعوها انها تغنى الاول على تخت وكان فيه صعوبة بإقناع والدها اللى كان واخد خط دينى بأن ام كلثوم تغنى على تخت .. المهم ان التخت الاول ده كان عازف الرق فيه ابراهيم عفيفى .. طبعا هو كان عازف كبير وهى لسه فتاة ريفية كانت بتقول له ياعمى وهو كان الوحيد اللى ممكن بشخط فيها ويشتمها احيانا لما تغلط وام كلثوم قالت عنه ابراهيم عفيفى كان بيسترنى .. بمعنى ان المطرب ممكن وهو بيغنى لو فيه حرف طويل طبعا الطول ده بحساب يعنى اما روند او روندين مربوطين يعنى 8 او بلانش .. المطرب القدير لما يحب يطول بيطول بحساب يعنى لو روند وحب يطولها لازم يقول روند زيها او روندين زيها المهم ينزل على الدوم .. المطرب الفاشل ما يعرفش يحسبها ممكن لما يطول يطول3 او 3 ونص ده ممكن يكسر الميزان ... الحكاية دى كانت بتحصل مع ام كلثوم فى الاوائل يعنى لما كانت لسه بتتعلم الغناء العاطفى وبالذات الالحان الصعبة او اللى فيها شغل زى بتاعة زكريا او القصبجى ثم السنباطى كان ابراهيم عفيفى لما يلاقيها خرجت عن الرتم بيعمل لها دومين ورا بعض .. الدوم الاول بيشتمها والدم التانى هو الدوم الجديد اللى حتغنى منه .. الحركة دى بالعبقرية بتاعة ابراهيم عفيفى والعبقرية الصاعدة بتاعة ام كلثوم كانت بتبقى للمستمع حاجة حلوة جدا يعنى بيعملوا صيحة استحسان .. يعنى الفنان القدير ممكن لو غلط يعمل حركة انت تحس انه بيعمل تجويد ... وكان الكارثتين اللى فقدتهم ام كلثوم فى طول حايتها الفنية الكارثة الاولى وفاة ابراهيم عفيفى فى الستينات .. من هنا كان لازم تعتمد على نفسها بنسبة 99% يعنى انا مرة سمعت تسجيل حفلة لأغنية اراك عصى الدمع فى الجملة بتاعة اذا مت ظمئـــــــــــــــــــــــــــــــــــان التطويل ده هى كانت مش مظبوطة فى الليلة دى غلطت فيها 3 مرات نفس الغلطة لو ابراهيم عفيفى كان موجود ماكانتش غلطت
الكارثة التانية وفاة محمد عبد صالح .. وانا حضرته فى آخر سنة وشوية .. لكن طبعا كنت مذاكر تاريخه من زملائى اللى عايشوه وقت طويل ... محمد عبده صالح ده كان لقبه فى فرقة ام كلثوم الديزل .. والديزل دى كلمة عند اهل مصر معناها زمان كان القطار السريع اللى بيطلع من القاهرة مش بيقف غير فى الاسنكدرية يعنى بيطلع مافيش حاجة تحوشه فى السكة كل الإشارات مفتوحة مفيش حاجة تقف فى وجهه .. كان عبارة عن خزينة حفظ لأغانى ام كلثوم
زى ما انت لو عندك اغانى ام كلثوم كلها من اول اغانى فيلم سلامة لحد آخر لحظة على فولدر كمبيوتر واى اغنية تختارها تضغط عليها تشتغل ... كان حافظ كل الاغانى وبالذات الكلمات يعنى حافظ الاغنية والكلام اى اغنية لأم كلثوم تخطر على بالك دكتور متخصص فى ام كلثوم يعنى .... ولو تلاحظوا كانت دائما وقفتها لازقة فيه عشان كان كتير بيلقنها الكلام .. السر اللى انتم ماتعرفهوهوش .. كانت ام كلثوم زمان يعنى لحد قبل وفاتها رحمها الله ب 3 سنين كانت بتغنى 3 وصلات كل وصلة ساعة او اكتر .. لو فيه اغنية جديدة النهاردة كانت فى الوصلة الاولى تغنى الاغنية اللى قبلها عشان تغنى ساعة ونص صوتها يفتح .. كانت بعكس كل المطربين كل ماتغنى وقت اطول تلعلع اكتر بعكس ناس تغنى ربع ساعة يتقطع نفسهم .. وكانت فى الوصلة الثانية تغنى الاغنية الجديدة .. السر فى الوصلة الثالثة ..دى كانت بتكون اغنية من التراث بتاعها يعنى ليلى ونهارى اروح لمين الحاجات اللى ماقبل عبد الوهاب الاقدم يعنى .. كانت بتدخل سينما قصر النيل مش فى مخها تختار حاجة ... وممكن الجمهور يطلب منها كذا او حد من حبايبها المقربين بين الوصلة الثانية والثالثة او ممكن سفير دولة صديقة يهمس لها جلالة الملك بيسلم عليكى وهو نفسه يسمع منك اغنية كذا
على طول بتقول لمحمد عبده صالح خلاص خلص الموضوع طبعا اى عازف فى فرقة ام كلثوم لازم يكون سامع كل اغانيها وحافظها من زمان بييجى دور محمد عبده صالح قبل رفع الستارة بيداعب قانونه بيقول بسرعة جدا البداية ولو فى جملة صعبة بعدها يعنى بيقول لك ملخص المقدمة فى ثوانى وانت طبعا بتفتكر ولوتلاحظ كمستمع ان القانون دايما متواجد اوى يعنى لما هى تحب تعيد بيكون هو السباق للتأشير للفرقة بالإعادة بس اخطر حاجة انه كان على طول بيفكرها بالكلام يعنى يقول لها اول كلمة فى الجملة .... الكارثة بعد وفاة محمد عبده صالح راح الشخص اللى بيفكرها بالكلام والكارثة كانت كارثتين لأنها بلغت من العمر عتيا يعنى كان ممكن تنسى الكلام ودى حصلت فى اغنية اسأل روحك فى الكوبليه بتاع كنت زمان بلاقيك بحنانى ... يعنى نسيت الكلام اكتر من مرة وطبعا مفيش حد متعود يلقنها
بس بعد الحفلة دى هى بقت تعتمد على نفسها يعنى تذاكر الاغنية اكتر من الاول .. واقول لكم على سر تانى الحركة بتاعة اغنية اسأل روحك عملت عقدة نفسية عند فايزة ووردة ( بس ده سر ماتقولوش لحد ) ازاى ؟ اى حركة او مشكلة تحصل فى حفلة ام كلثوم كل فناني العالم العربى بيشوفها لأن الكل بلا استثناء كان بيسمع ام كلثوم لذلك حصلت عندهم عقدة نفسية طيب ما انا ممكن انسى الكلام ولوتلاحظو بعدها ان كلتاهما فايزة ووردة بقوا يحطوا بيبتر ( حامل نوتة ) جنبها وتحط عليه كلمات الاغنية بخط كبير وقلم شكله غبى يعنى الكلمة اد الجاموسة وتجيب معاها مشبكين غسيل تشبك بيهم الورق لأن لو الحفلة فى مكان مفتوح تطير الورق وطبعا ... والورق نفسه كان تخين زى ورق اللحمة بتاع زمان مش عارف ليه ... المضحك هنا حاجتين .. اولا ان منظر البييتر والورق جنبها بيعطى الايحاء انهم زى مغنيين الاوبرا قدامهم نوتة موسيقية مش كلمات والحاجة التناية وانا كنت واخد بالى منها كويس جدا ان عمر ما واحدة منهم نظرت الى الورق وغشت كلمة يعنى كانوا حافظين لكن الحركة بتاعة ام كلثوم عملت عندهم العقدة دى
انا حاسس انى طولت وآسف للإطالة وحلقة قادمة ان شاء الله

التعديل الأخير تم بواسطة : الألآتى بتاريخ 16/12/2013 الساعة 11h20
رد مع اقتباس