[عادل صموئيل]

الاخ العزيز الريحانى
اشكرك من كل قلبى على هذه اللفتة الكريمة الجميلة
المشكلة الاساسية اللى بيعانى منها كل فنان من فنانى الزمن الجميل وانا اقلهم يعنى ... بس على الاقل انا واحد من الاقلية القليلة جدا الباقية على قيد الحياة منهم ... هو كان حظى انى عملت معهم وانا صغير جدا يعنى كان سنى عشرين سنة بينما زملائى كان اعمارهم بتترواح من خمسين سنة وانت طالع وده يمكن الشىء الوحيد انى موجود بعد مارحلوا وبينى وبينكم انا مولود سنة 1950 وكتير كنت اتمنى انو اكون اتولدت سنة 1930 مثلا وكنت عاصرت كل هؤلاء العمالقة من بداياتهم وانتهيت معهم ولكن يمكن الله عمل الحكمة دى انى اكون موجود بعدهم بشوية ويكون الله سخرنى انى اقدم لكم اللى اتعلمته منهم وبالذات النوت الموسيقية وشوية العزف المتواضع اللى على ماقسم .. وشوية معلومات وكلام عنهم ممكن يستمتع عشاقهم بالكلام عنهم .. بالذات لأن فيه كلام كتير اتكتب عليهم بعد وفاتهم من ناس عايزة تظهر لكن الحقائق بتختلف عما رأيته بعينى ... بس هى الكارثة الكبرى بتأتى من سوء التتابع

اقصد بالتتابع يعنى لو رجعنا لورا 500 سنة من اول وقت ابتدا يبقى فيه فن عربى فى بداية تقنينه .. بمعنى ان من 500 سنة الفن الكلاسيكى الاوربى وصل لأوج مجده ووصل تطوره للدرجة التى نراها عليه الآن يعنى لماتسمع سيمفونية ليوهان سباستيان باخ بيعزفها اوركسترا سيمفونى على اعلى درجة من الجودة وتقول الله ايه الحلاوة دى ... لو رجعنا للوراء عدة قرون نجدهم كانوا بيعزوفها كده بالحرف وحافظوا على المستوى ده خلال القرون التالية
اولا لتطور الآلات الموسيقية فى عصر الباروك وثانيا لتطور كل القوالب الموسيقية حتى وصلت لما هى عليه الآن
والاخطر والاهم اطلاقا تطور التدوين الموسيقى لأعلى درجة وهى اللى بندون بيها الآن ومن هنا كان المؤلف الموسيقى بيدون العمل بدقة متناهية وبيتنفذ بدقة متناهية .. والنوت كلها بتفضل للتاريخ لذلك كانت النوت المكتوبة من 500 سنة بتتعزف بنفس الجودة والنكهة اللى بتتعزف بيها النهاردة من غير ما ينقص او يزيد حرف .. يعنى كان ساعتها الاعتماد فى التداول على النوتة الموسيقية فقط لأن وسائل التسجيل الصوتى ظهرت بعد الوقت ده بييجى 300 سنة وطبعا كانت بدائية جدا حتى الاربعينيات يعنى استعمالها كان بينقص مش بيزود .. يعنى السيمفونية كانت فى حدود 54 دقيقة وسعة الاسطوانة الحجارى القديمة 7 دقائق فقط غير طبعا رداءة الصوت لأن كان السميعة بتوع الكلاسيك متعودين يروحوا الاوبرا يسمعوا ع الطبيعة .. بعد باخ جاء العشرات منهم بيتهوفن وموتسارت وغيرهم كثيرون المهم نرجع للتتابع ... يعنى الموسيقى لما تطورت كان كل مؤلف موسيقى بييجى بيعمل تقدم اكثر ... لأنو الاول بيشرب من اللى قبله ثم يبدع ... لما نرجع للكلام ده عندنا فى الشرق او فى مصر بالتحديد نجد ان التدوين الموسيقى بلغ ذروة كماله ( مع ادخال المقامات الشرقية والاوزان الايقاعية عليه ) فى اواخر الثلاثينيات .. قبلها لمدة خمس قرون كان المطربين والملحنين بيتداولوا الالحان بالتلقين او الحفظ وخطورة التلقين او الحفظ انك ممكن يطير منك حرف هنا وحرف هنا ومع التدوال تلاقى اللحن معالمه اتغيرت عاملة زى واحد ماشى شايل شوال فول مخروم بيخر الشوال وزنه 25 كيلو على ما يوصل يكون فاضل نصه ... ومع ذلك العمالقة بتوعنا اولا حفظوا القديم اوى واستخرجوا منه كل المدارس الفنية وبدأ التطور على يد عبد الوهاب .. وطالما حصل تطور الكل لازم يتطور يعنى واحد فى قرية بتطبخ على الحطب راح اشترى بوتاجاز تعالى تانى سنة تلاقى القرية كلها عندها بوتاجازات .. ثم ظهرت الفلتة الغنائية ام كلثوم واللى قلبت الغنا العربى 180 درجة .. يعنى كان اشهر اسم قبلها كانت منيرة المهدية كان عندها عيبين خطيرين اولهم ان معظم كلمات اغانيها سوقية والبلد ساعتها كان فيها مثقفين كتير وشعراء فطاحل يعنى المستوى الثقافى كان عالى جدا ومحتاج الغنا المحترم الكلمات .. وثانى اخطر عيب فى منيرة المهدية انها كانت بتغنى بطريقة المشايخ بتوع زمان اللى هى استعمال العُرب الكتير اوى اكتر من الازم فى كل جملة بحيث انك ماتقدرش تدندن مع نفسك اللى هى بتقوله .. المشايخ كانوا بالطبع بيستعملوا عرب كتير بس محددة وفى مكانها لذلك كان لهم عشاق كتير فضلوا يسمعوهم حتى بعد التطور التالى لذلك العصر لكن منيرة المهدية كانت بتزود العُرب حبتين .. وانا فى نظرى تزويد العرب زى فى الشاى الطبيعى تحط 3 ملاعق سكر لكن لما تكرمنى وتحط 27 ملعقة سكر طبعا ده ما يبقاش كرم ( والمصيبة النهاردة اصالة بتعمل كده )
جاءت ام كلثوم وغنت غناء جميل وسلس يعنى تعيش معاها من اول حرف ال آخر الاغنية وبدأت فى تقديم روائع الكلام والقصائد السهلة والصعبة وتبنت الشعراء الموهوبين امثال بيرم التونسى ثم احمد رامى وقلبت الغناء المصرى رأسا على عقب ... الكارثة ان من الاربعينيات الى السبعينيات كان العصر الذهبى للموسيقى المصرية يعنى اعلى درجة نضج للعمالقة .. لكن بعد ذلك ابتدأ الانهيار الى ان وصل اليوم الى الصفر ... يعنى اللى جم بعد العمالقة ما اخدوش منهم زى الطبيعى ولكن ابتدوا شىء جديد مقرف من عندهم

انا آسف للإطالة ولكن انا احب اكتر اسألونى وانا اجيب لأن اللى فى مخى كتير اوى اوى ما اعرفش ابتديه منين
مع اطيب تحياتى