مع الشاعر الفاضل رائد المصري
ليه الوجدان بيروح
لمكان مفتوح و يبوح
لما أدان الشيخ رفعت
يصعَد في براح الروح !
***
النـَّدَى في النـِّدا بيشـُق المَدى
كروان على مَدنِة ربنا شدا
***
و الصَّدَى جـِناحات حِنيّة تضـُّم
صوت الشيخ رفعت في الملكوت
له طعم حنان الأُم
***
راحة و باحة ،،
فاردة على بيوتنا الضُليلة
لمـّا بيدَّن ،،
بتخِف عن اكتافنا الشيلة
***
الشيخ رفعت أبو صوت فـَضة
مِن زمزم صوته بنتوضـّا
***
يا أمان بيطبطب على مجاريح
يا أدان بيقيد في السما مصابيح
***
الصوت سابح في الكون
و الكون
جوهَر مكنون
في ضباب صوت الشيخ رفعت
***