[خليل سليم]

تاًلق وابداع من حضرتك استاذ عادل المحترم لأغنية السيدة فايزة احمد ايوه تعبني هواك ... ايوه احنا تعبنك معانا عشرين ساعة لكن في النهاية كانت رائعة خالدة من حضرتك لاعضاء المنتدى وغير الأعضاء المحترمين والله لايحرمنا من عطاءك المستمر وحفظك ورعاك وأنعم عليك بالسعادة الدائمة.
اخوتى الاحباء
التعب بيهونه لما الواحد بيعمل عمل رائع يستفيد منه ناس كتير يعنى اغنية صعبة وطويلةجدا زى دى مكانش اى حد يقدر يدونها لأن لازم تتوافر فيه شروط كتير اهمها يكون حد عزف مع فايزة نفسها عشرين سنة ودون لمحمد سلطان الحان كتير يبقى فاهم يعنى اسلوبهم يعنى انت عشان تعزف اغنية زى دى اول حاجة لازم تكون حافظها صم يعنى احنا بنعزف اولا عشان نمتع نفسنا وثانيا عشان نمتع الآخرين او يحسوا اننا بنعمل شىء رائع ويصقفوا لنا .. وعشان توصل لكده لازم تكون حافظ اللحن صم عشان تبقى فاهم روح الاداء لأن الموضوع مش تأدية حروف موسيقية ..يعنى اسلوب فايزة ومحمد سلطان ان الايقاع تقريبا بيتغيركل جملة يعنى شوف الميزان اتنقل مثلا من 4/4 الى 2/4 كام مرة وبالعكس .. وفى ال 4/4 الايقاع بيختلف ولو مش حافظ اللحن حتعزفهم زى بعض النكهة حاتروح ..يعنى انا قلت انى عشان اللحن مش حافظه لأن هى غنته مع فرقة هانى مهنى ... فى الاول كنت مش مستسيغه خالص .. لكن وانا بدونه ابتديت احبه واستمتع بيه لأنى من عشاق فايزة مع سلطان ..لأن انت ليه بيعجبك تدوينى ..انا مش شاطر فى كتابة الحوف وخلاص ده موضوع اكبرمن كده .. يعنى انا المفروض بيسمع مازورة مازورة كذا مرة افمها بعدين اكتبها وبعدين بسمعها واسمع اللى بعدها عشان آخر كل مازورة مفتاح ال بعدها يعنى المازورة الاولى قفلت على حرف سى مثلا يبقى المازورة االلى بعدها رحنا فين.. ولمابخلص الجملة تدوينا ابتدى عملية التحلية .. ودى اخطر حاجة يعنى بسمع الجملة تانى على بعضها واشوف كتبت ايه واقعد اغير حروف .. ودىبرضه من اهم مميزاتى .. وهى الل بتخلى تدوينى يعحبك هى ايه .. معلوم انى شاطر اوى فى الغنا بالكمنجة يعنى بحاول اسمعك الكمنجة كأنها بتغنى مكان المطرب ودى مرة من خمسين سنة مستمعة اردنية قالت : الكمنجة بتحكى .. ومستمعة تانى قال انت لما بنسمعك بنحس انك فرقة مش عازف واحد .. ليه انا لما بغنى بالكمنجة بحاول اعوض العازفين الناقصين والمطرب فى شخص واحد وبعدين المطرب مش بيغنى حروف ولكن بيعمل تجويد فى الحروف دى انا بحاول اعمل التجويد ده بس كمان بيحكمنى حاجة خطيرة وهى تسهيل التدوين واهو عندنا فى مصر مثل يقول : جه يكحلها يعميها .. يعنى كيف انى اوصل لك احلا اداء ممكن بدون تصعيب الحروف .. لأن لو النوتة صعبة ماحدش حايعرف يقراها ..وطبعا اهم حاجة من اللى اتعلمتها زمان من العمالقة كان اهم حاجة عندهم اللحن وصل للجمهور ازاى .. يعنى تخيل اقول لكم سر .. انا كل زملائى موسيقيين كبار يعنى معظمهم فنان فقط يعنى بيروح الفرقة الماسية بالليل وبينام بالنهار انا كنت بروح الفرقة الماسية بالليل والصبح مدرس موسيقى فى مدرسة يعنى بحتك بالجمهور .. زمان كان الجمهور بيهتم بالفن يعنى فيه مثلا مطربة اسمها نادية مصطفى تصادف انى وقتها كنت بشتغل الصبح مدرس موسيقى فى معهد معلمات شبين القناطر من عين شمس تاخد ساعة بالقطار لما ركبت القطار تانى يوم حفلتها كان كل ركاب القطار بيتكلموا عن الموهبة الجديدة نادية مصطفى .. وتعمدت انى ما اقعدش على كرسى يعنى اتمشى فى القطار عشان اسمع اراء الركاب الل بيمثلوا شريحة من الجمهور .. نفس الكلام كان بيحصل تانى يوم الاغانى الجديدة سواء لأم كلثوم او عبد الحليم او فايزة او وردة او نجاة .. كانت اغنية ام كلثوم موضة السنة يعنى كان واحد متجوز يقول لك انا خطبت مراتى فى سنة انت عمرى واتجوزنا فى سنة امل حياتى..وكان حديث الجمهورصباحية كل حفلة ولمدة كذا يوم عن الاغنية الجديدة لذلك كان كل العمالقة سواء مطربين او ملحنين كنت انا من مصادر استبيان اعجاب الجمهور لأنى بقعد مع الجمهور يعنى يسألونى الاعجاب ييجى كام % وعدم الاعجاب كام % .. وكنت اقول لهم مش من اول يوم يعنى لازم الجمهور يحفظ الاغنية شوية عشان يحسها .. طبعا الكلام ده كله مات معاهم لأن دلوقتى اللى بيعملوا غنا او تلحين اهم حاجة عندهم الفلوس والجمهور اصلا بقا بيرقصا و يتمايل او يصرخ وهو بيسمع يعنى كائنات مش بتسمع من اصله او بتفهم من اصله لأنهم لو بيفهموا ما يدفعوش 1000 جنيه تذكرة عشان يسمع واحد بيقول نشاز يعنى كان المتفرج زمان بيدفع عشرة حنيهات عشان يسمع فايزة يخرج من الحفلة وهو كانه اكل خروف .. مع اطيب تحياتىطبعا كلامى مش موجه لأخى العزيز خليل ولكن للمنتدى كله