[الألآتى]

بسم الله نبدأ فى تحليل أغنية ( ياحبيبى واحشنى )

كلمات : مرسى جميل عزيز

ألحان : محمد الموجى

غناء : فايزة أحمد

نحن أمام عمل يستحق أن نجزم أن له خطة موضوعة .. وليس كلشنكان

إختار عمنا الموجى مقام النهاوند ليبدأ به اللحن ..

ومع مقدمة موسيقية .. تشترك فيها الفرقة بكاملها .. لا يوجد صولوهات ( عزف منفرد )

الكل بيزمر .. الكل بيمزك .. مافيش حد بيعزف لوحده

مقدمة لذيذة .. نسمع فيها إيقاعات ( الفوكس والرومبا والمقسوم )

ثم تغنى الست فايزة ( ياحبيبى واحشنى وروحى فيك وبقالى زمان ) من النهاوند

المذهب كله من النهاوند ولا خروج عنه

ونسمع نفس موسيقى المقدمة لتغنى فايزة ( قلبى إللى إنت ظالمنى وظالمه وفاكره ناسيك )

ونقف هنا لحظة .. لنتأكد أن هناك خطة للحن ..

عمنا الموجى إستعمل مقام جديد .. هو مقام المرصع

ومقام المرصع من فصيلة النهاوند .. بل هو نهاوند مع بعض التغييرات

وهو ينقسم إلى جنسين ( جنس نهاوند وجنس حجاز ) جمع متصل

وجدير بالذكر أن النهاوند الطبيعى يجمع بين النهاوند والحجاز أيضاً .. لكنه جمع منفصل

وحابقى أشرح لكم الكلام ده بعدين .. لأنه محتاج درس فى المقامات وطرق الجمع والأجناس

المهم إن عمنا الموجى إختار هذا المقام ( المرصع ) لزوم الشجن واللوعة

فاكرين أغنية ( علمنى الحب ) لصباح .. فى فيلم شارع الحب ؟

هذه الأغنية من مقام النهاوند المربصع .. ألحان منير مراد

وعموماً .. هذا المقام غير مستعمل كثيراً .. أللهم إلا فى داخل بعض الأغنيات وبشكل سريع ولمدة قصيرة

ستنا فايزة تغنى من المرصع إلى أن تعود للنهاوند بتاعنا ( الكردى ) عند ( خاصمنى وإقسى وزيد لهيبى .. بس إوعى تنسى إنك حبيبى )

ونسمع موسيقى جديدة .. من مقام الحجاز كار .. وهنا نعرف أن عمنا الموجى لجأ للحجاز كار .. لزوم الحُرقة وياخراااابى ويادهوتييييييى

الست بترقع بالصوت .. فلا أقل من الحجاز كار ليعبر عن الحالة

ونرجع من تانى للنهاوند من نفس الطريق ( خاصمنى وإقسى وزيد لهيبى .. بس إوعى تنسى إنك حبيبى )

وإلى نهاية الكوبليه والأغنية .. الأغنية مذهب وإتنين كوبليه فقط ..

لكننا نسمع ونستمتع ونعيش فى اللحن بكل جوارحنا .. فلقد إستطاع عمنا الموجى أن يشد أذاننا وقلوبنا بكل بساطة

مافيش مقامات شرقية ( ربع تون ) فى العمل .. لكننا نشعر بالغلبانة التى تصرخ وتولول على حبيبها إللى ضاع

أرجو أن أكون وُفقت فى هذا التحليل المتواضع