[عادل صموئيل]

اخى العزيز هيثم
اشكرك على اعادة الذكريات الجميلة
انا ذاكرتى فوتوغرافية ودى اهم موهبة لربنا اعطاها لى يعنى بفتكر اى حاجة بشوفها بتتسجل مش بتنمحى وبالذات لما تكون حاجة غريبة والنزل ده كان تصميمه غريب جدا يعنى قد يكون له اشباه فى اماكن تانية من العالم لكن اعتقد انو اول مرة يتبنى فى تونس ... هى بتبقى شوية جنون على عبقرية فى التصميم يعنى كل الناس بتعمل الشكل الهرمى واسع من اسفل ويفضل يضيق يضيق لحد فوق ... ييجى مصمم عبقرى يعمل شكل غريب ومبهر انو يعمل الهرم مقلوب
من ضمن ذكرياتى عن الفندق ده واحد صاحبى تونسى كنا ماشيين جنبه بالسيارة قال لى ان مرة انفجر مخزن به عدة انابيب بوتاجاز ( بتسموها عندكم دبوسة ) حصلت هزة شديدة فى المنطقة زى زلزال شديد الفندق ده عشان رفيه من تحت وعريض من فوق رقص شوية رقص لاتقول لى نجوى فؤاد ولا سهير زكى طبعا النزلاء اللى فيه ماتوا من الرعب بس الحمد لله ان الفندق مبنى متين جدا والا كان طار فى الهوا شاشى وانت ماتدراشى
وفى سر فى الموضوع احب تعرفوه اى نزل او فندق بيبقى تبع شركة عالمية عملاقة والشركة دى لما بتبنى فرع فى اى دولة لازم بنفسها تشرف على الاساسات يعنى ماتتركوش للدولة .. يعنى بتبعت لازم مهندسين متخصصين يسكنوا فى المشروع من اول لحظة لحد الانتهاء لأن لو لاقدر الله الفندق وقع الخسائر الفادحة تدفعها الشركة الكبيرة وطبعا ممكن تخرب لأن التعوبضات بتكون باهظة ده فندق خمس نجوم يعنى
احنا عندنا فى القاهرة فندق غريب شوية كده اسمو فندق شيراتون الجزيرة لما تشوفو من بعدي هو على شكل زجاجة
بس الغريب انو زجاجة مقلوبة يعنى اول الزجاجة هو المغروس فى الارض وجسم الزجاجة لفوق
وارتفاعة حوالى اكتر من 25 طابق
لما حصل الزلزال بتاع 1994 الفندق ده نفس قصة تونس عشان رفيع من تحت وتخين من فوق برضو رقص شوية رقص اللى هم والخطورة الاكتر انو فى جزيرة على النيل يعنى مبنى مزروع فى ارض طينية لكن زى ماقلت ان شركة شيراتون هى اللى بعتت الخبراء بتوعها اشرفوا على بناؤه طوبة طوبة والا كان طار فى الزلزال ونزل فى النيل
نسيت اقول لك ان اهم فائدة للذاكرة الفوتوغرافية او للذاكرة التسجيلية دى هى حفظ الاغانى .. يعنى انا قيمتى لما بكون قاعد مع ناس ومعايا الكمنجة انهم بيطلبوا طلبات غريبة يعنى اغانى بعيدة اوى اوى اى حد بينساها يعنى الناس لما بيكون عازف على قده بيطلبوا طلبات محدودة او بيتركوه هو يعزف اللى حافظه لكن لما بيحسوا ان العازف شاطر شوية بيفتروا فى الطلبات يعنى واحد يقول لك سعنى حلم لأم كلثوم او مضناك جفاه وخد من ده للصبح
هنا مش معقول اقول مش حاافظها طبعا عيب جدا .... يعنى
الصورة الاولى الفندق
الصورة الثانية موقع الفندق يعنى اسفل فيه نافورة دى تقريبا قدام ميدان التحرير وتلاحظ النيل فى المنطقة دى بينقسم الى فرعين فرع رشيد وفرع دمياط والجزء الاوسط اسمو الجزيرة ودى بتقع فيها منطقة الزمالك اللى كان ساكن فيها تقريبا كل نجوم الزمن الجميل ام كلثوم وعبد الوهاب وفريد وعبد الحليم ونجاة وكتير جدا
مع اطيب تحياتى