[الشاعر صلاح عطيه]

المطرب الشعبى الكبير
#شفيق_جلال_ابن_البلد

#مقدمه
استاذ الموال وصوت شعبى اصيل
وحكاية اشهر موال فى حياته
خلونا نستمتع ونتعلم من تفاصيل الفنانين المجتهدين
___________
#الجزء_الأول


* الأسم بالكامل : شفيق جلال عبد الله حسين فتح الباب البهنساوى
* جده من المنيا وجدته من الدقهليه
* مواليد يناير 1929 الدرب الأحمر
* بداية حبه للغناء لما كان طفل صغير وشاف فيلم الموسيقار (محمد عبد الوهاب) (الورده البيضا) وسمع اغانى الفيلم وتحديداً موال (سبع سواقى)

* لما دخل المدرسه كان بيغنى طول الوقت ومش فاضى للدراسه واهله قالوا ده مش هينفع وطلعوه من المدرسه وشغلوه فى (ورشة احذية)
فى الشغل كان هو مطرب الورشه .

* وفى عام 1940 راح يحضر فرح زميله فى الشغل فى الهرم وغنا فى الفرح ،
وبعد اسبوع واحد قابله قاله انت اللى كنت بتغنى فى الفرح طب انا عندى فرح الليله وعايزك تغنى وهديلك ريال ( 20 قرش) وهتاخد نص النقوط (ليلتها لم نقطه جنيه ) يبقى كده خد 70 قرش وده كان اول اجر للفنان (شفيق جلال)
فى الوقت ده كان عنده 11 سنه

* وفى عام 1944 بعت رساله لمجلة : المطرب الشعبى الصغير شفيق جلال يريد التعارف بالشباب العرب ،
وبعد اسبوع جاله 300 جواب من القراء ، المهم القراء قالولوا إحنا عايزين نسمع صوتك ، ابو شفيق رد عليهم فى الجوابات وقالهم ابعتوا جوابات فى الإذاعه واطلبوا انهم يخلوا شفيق يغنى فى الإذاعة .
وبدأت الجوابات تروح الإذاعه
عايزين شفيق عازين شفيق (المطرب مش الفريق &#128514
مين ياعم شفيق ده ماحدش فى الإذاعه عارفه

* بيقولك واحد صاحبه حب يعمل فيه مقلب ويشتغله ، قاله الست عزيزه امير والأستاذ محمود ذو الفقار سألوا عليك فى القهوه وعايزينك يانجم
(الفنانه والمنتجه عزيزه امير أول سيدة مصرية تعمل في مجال الإخراج
وجوزها الفنان محمود ذو الفقار)
عمنا شفيق طار من الفرح ومانمش وتانى يوم راح لهم الأستوديو :
انا جيت..
ايوا عايز ايه ؟!
انتوا اللى عايزينى
يلا يا ابنى اتكل على الله
طب والنبى ياعم ان شالله ابوك يحج 😢
المهم مدير الإستوديو قال للست عزيزه ماتسمعيه ياريسه دا بيقول انه بيقلد الفنان (محمد الكحلاوى)
بس ياسيدى ، سمعت صوته ومضيته على 3 افلام حته واحده
اول فيلم نزل عام 1946 عودة طاقية الإخفاء

* خد بالك طاقية الإخفا اتعمل منه 3 افلام ، اول فيلم اسمه طاقية الإخفاء عام 1944 بطولة محمد الكحلاوى وتحيه كاريوكا وكان حوار الست عزيزه امير ومن انتاجها هى وجوزها محمود ذو الفقار.
وتانى فيلم اسمه عودة طاقية الإخفاء عام 1946 من انتاجهم برضو وبطولة محمود شكوكو بعد لما حصلت مشاكل بين الأنتاج وبين الكحلاوى ومارداش يعمل الفيلم
تالت فيلم وهو اشهرهم واللى كلنا فاكرينه هو سر طاقية الإخفاء عام 1959 بطولة عبد المنعم ابراهيم وتوفيق الدقن ( العلبه فيها إيه &#128514

* المهم كده الحياه هتروق وتحلى مع عم شفيق اهو غنا فى فيلم من بطولة النجم شكوكو
لكن للأسف اسم شفيق جلال كان بيتقال فى الإذاعه غلط لما كانوا بيذيعوا اغانى الفيلم ( جلال شفيق )
وبعدين 🤔
لا بعدين دى بعد شويه عشان نكمل الحوار ونشوف اللى حصل فى مشوار شفيق جلال
____________
* إيه علاقة الكحلاوى بالطبال بالبقال بموال الصبر بشفيق جلال
وازاى ريا وسكينه عملوا خدمه كبيره لـ شفيق جلال
ده اللى هنعرفه بعد شويه
____________
#الجزء_الثانى

* شفيق جلال راح الإذاعه يقولهم انتوا بتقولوا اسمى غلط (جلال شفيق)
لو سمحتم عدلوا الإسم .
قالولوا دا احنا بندور عليك لان المستمعين بيبعتوا جوابات وعايزينك تغنى.
وقد كان
وفى 3 مايو 1946 غنى لأول مره فى الإذاعه غنوتين وهو عنده 17 سنه

* 1952 كانت سنه خير وبداية نجاح شفيق جلال
اشترك بالغناء فى فيلم ريا وسكينه مع نجوم كبار :انور وجدى وفريد شوقى وشكرى سرحان ومن تأليف الكاتب الكبير نجيب محفوظ واخراج العبقرى صلاح ابو سيف ( هو بالفعل انا صلاح وعندى ابنى سيف بس مش انا مش انا &#128514
الفيلم كسر الدنيا وعلامه من علامات السينما المصريه
و اول معالجه للقضيه الشهيره ريا وسكينه
شفيق غنا فى الفيلم من كلمات عمنا وعم العاميه المصريه بيرم التونسى والحان الموسيقار احمد صدقى ، اغنية (بنت الحاره) الشهيره بـ
(حسره عليها ياحسره عليها )
(والملاحه والملاحه وحبيبتى ملو الطُراحه)

* كل ده جميل وحلو ، شفيق جلال بيغنى ويشارك فى افلام
لكن ولمدة 15 سنه مالوش غنوه مشهوره وضاربه (بغض النظر عن ريا وسكينه)
وهنا يجى دور الحظ والرزق اللى بينادى صاحبه

* فى عام 1961 كان مشارك فى حفله وميعاده يغنى فى اخر السهره اللى طبعاً الجمهور بيكون نام او مشى ، مين بقى هيفتح الحفله ؟ العندليب عبد الحليم حافظ ، ولظروف العندليب يتأخر وشفيق يطلع المسرح وكل الناس مصحصحه ومركزه والإذاعه بتنقل الحفله و التليفزيون المصرى اللى لسه كان فاتح من سنه
شفيق يغنى فى الحفله اغنيه جديده او بمعنى اصح موال ، لكن مش اى موال دا موال الصبر اللى هيكون وش السعد عليه ، وقد كان والجمهور اندمج واتسلطن مع الموال .

(ياخوخ خانونا الحبايب وإحنا لم خونا)
* بس الموال ماكنش بتاع شفيق جلال !!
لان صاحب الموال الفعلى هو الفنان محمد الكحلاوى (صاحب الغنوه الشهيره لاجل النبى) ومن الحانه كمان ومن كلمات كمال مجاهد .

*الحكايه ان شفيق فى بدايته كان مغرم بـ الكحلاوى وبيقلده وبيعتبره استاذه ،
وفيما بعد الكحلاوى لحنله اغانى منها (اه واهين) (معانا غزال)
نرجع لموال الصبر..
شفيق كان له صاحب اسمه عبد القادر شغال طبال فى فرقة الكحلاوى وفاتح كشك سجاير وكان كل يوم شفيق يعدى عليه يشترى منه ،
وعبد القادر يقول كلمتين من الموال ، لحد لما كتبله الموال وشفيق حفظه وغناه وكسر الدنيا.
رغم ان الكحلاوى غنا الموال برضه بس ما اتشهرش
لكن من شفيق حاجه تانيه خالص
كسر الدنيا ياجدع 😂
وبعدين..
بعدين دى تبقى بعدين لأن الجاى مهم جداً
_____________
* شلبى جوز نعيمه الماظيه
ماله ؟ ماهو ده اللى هنعرفه بعد شويه
_____________
#الجزء_الثالث

* تلات مطربين كان ليهم دور مهم جداً فى بداية مشوار المطرب شفيق جلال :
1_ عبد الوهاب ..
الموسيقار محمد عبد الوهاب ، من خلال اغانى افلامه شفيق جلال حب الغنا
واكتشف ان صوته حلو .
والفرصه تيجى بعد 30 سنه من إحتراف شفيق الغناء انه يغنى من الحان عبد الوهاب
فى فيلم وبالوالدين إحساناً سنة 1976
اغنية دار البشاير مجلسنا ، كلمات مين ؟ امير الشعراء احمد بيه شوقى 😯
ياحظك ياعم شفيق ، لاء والفيلم يكون من بطولة وحش الشاشه فريد شوقى
وإخراج العبقرى حسن الإمام .. كده إتعشت اوى بصراحه 😂
هنتكلم بعدين عن حكاية الغنوه وازاى امير الفصحى كتب عاميه وكتب الأغنية لمين فى الأصل 😉

2_ الكحلاوى ..
المطرب والملحن والممثل والمنتج والمنشد الدينى محمد الكحلاوى
شفيق جلال بيعتبر الكحلاوى استاذه ، ومن شدة حبه كان بيقلده ،
وغنا كتير اغانى بدويه ( اللون اللى اشتهر بيه الكحلاوى ) وبعد كده الكحلاوى لحن له اغانى ،
وشفيق ديماً بيذكر ان موال الصبر اللى اتشهر بيه هو فى الأساس بتاع الكحلاوى .

3_ عبد المطلب ..
المطرب الشعبى الكبير محمد عبد المطلب ، شفيق اتعلم غناء الموال من عبد المطلب ،
وكان ديماً فى حفلاته بيغنى موال غدار يازمن اللى هو بتاع عبد المطلب ،
لكن الموال اتشهر بصوت ابو نور عمنا عبد المطلب وماحدش فاكر الموال بصوت شفيق .

* من الملاحظات الطريفه ان عبد المطلب لما عمل الأغنية الشهيره :
(ساكن فى حى #السيده وحبيبى ساكن فى #الحسين)
شفيق حب يجرب موضوع اسماء الأحياء والمناطق يمكن تضرب معاه 😂
وقام عامل اكتر من غنوه بالشكل ده لكن للأسف مفيش حاجه نجحت معاه
خد عندك : اغنية من #السبتيه لـ #الشربيه 😂
اغنية مابين حيين .. #الموسكى و #الحُسين 😂
ياجدع دا لدرجة انه عمل اغنية اسمها انا م #الفيوم رغم انه من #الدرب_الأحمر 😆
عمنا شفيق كان راجل دمه زى العسل

* اه بالحق اومال فين شلبى جوز نعيمه الماظيه 🤔
مهو ده فى اللى جاى ان شاء الله وعليكم خير
____________
* الليله الكبيره ماكنتش كبيره
دى كانت صغيره وبعد كده كبروها ،
ده كلام حقيقى ومش ألش
بعد شويه هنعرف ده مع عمنا شفيق جلال ومسا التماسى
___________
#الجزء_الرابع

* أكتوبر1960 اول عرض لـ اوبريت العرائس (الليله الكبيره)
تأليف صلاح جاهين والحان سيد مكاوى وتصميم عرائس ناجى شاكر وإخراج مسرحى صلاح السقا
وغناء مجموعه من المطربين التقال اوى من اهمهم عمنا محمد رشدى ( بلدياتى دسوق كفر الشيخ)
و عمنا شفيق جلال بطل حكايتنا

* معظم الجمهور العربى شاف الأوبريت واستمتع جداً بيه ، لكن قليل اللى يعرف ان الأوبريت ماكنش كده !

لانه اتعمل فى البدايه صوره غنائيه بتتذاع فى الإذاعه ومدته (13:30) فقط
ولكن لما المنظمون للمهرجان العالمى للعرائس فى بوخارست (عاصمة رومانيا)
طلبوا من مصر المشاركه ، قام (ناجى شاكر) اللى كان معجب جداً ب الليله الكبيره اللى بيذيعها الراديو ، كلم صلاح جاهين وسيد مكاوى وقالهم لازم نضيف شخصيات للأوبريت ونخلى مدته اطول

وقد كان واتحولت الليله الكبيره اللى ماكنتش كبيره من مدة (13:30) الى ليله كبيره بجد مدتها (33:32)
طبعاً الإضافه كانت موفقه جداً وكسرت الدنيا ، لكن اللى سمع الأوبريت بنسخة الإذاعه هيعرف ان الغنا فيه احلى بكتيييير ، يكفى لما محمد رشدى وشفيق جلال بيغنوا نفس المقطع ده بمزاااج :
( مسا التماسى مسا التماسى .. ياورد قاعد على الكراسى)
انا عاملها نغمة تليفونى وضايف عليها مقطع (مسا مسا ياكبير) غنوتى بقى 😂
__________________
* سعاد حسنى: تاج الفتاة المثالية
تحيه كاريوكا: ياما جاب الغراب لـ امه ، وده لما نتعزر ونحب نبيعه ، نبيعه بكام؟
سعاد حسنى: يا ماما دا حاجه معنويه ، حاجه رمزيه
شفيق جلال: رمزيه 🤣 اُمِك إسمها نعيمه الماظيه
تحيه كاريوكا: إتكتم ياشلبى خلينا نشوف حالنا
شفيق جلال: امرك يا اوسطى
..
* اول مشهد لـ شفيق جلال فى فيلم (خلى بالك من زوزو) 1972
فيلم مهم وعلامه من علامات السينما المصريه سيناريو وحوار صلاح جاهين وإخراج حسن الأمام
وبطولة سعاد حسنى وحسين وفهمى وناس حلوه كتير
شفيق جلال بجانب تمثيله فى الفيلم غنا موال ومقدمة اغنية خلى بالك من زوزو
والفيلم فرق معاه جداً
سلام زوزو ياجدع 💃
مش هنطول كتير احنا قربنا نشطب ونلم الحكايه
😉 استنوا الباقى
___________
* المنولوجست سيد الملاح كَل عيش من تقليده شفيق جلال ،
وشفيق جلال نجح جداً برضه بسبب سيد الملاح
طب الحكاية جات ازاى 🤔
مهو ده هنعرفه بعد شويه
___________
#الجزء_الخامس

* إمتىَ الفنان يتقلد ؟
لما يكون صاحب شخصيه فنية مميزه وكاركتر خاص .
وده اللى حصل مع (شفيق جلال)
(سيد الملاح) منولوجست مواليد بور سعيد (اصغر من شفيق جلال بـ 9 سنين ومات بعده بـ 5 سنين)
(الملاح) كومديان شاطر وكمان ملحن فاهم اوى وصوته كان حلو وكان بيبتكر فى التقليد .

(سيد الملاح) كان له اغانى خاصه بيه ، كلنا فاكرين زمان اغنية الأطفال الشهيره ( انا انا انا ابريق الشاى)
( كلمات صلاح جاهين والحان ابراهيم رجب)
(الملاح) عمل اغانى وطنيه وبرامج إذاعيه وكان دايماً مشارك فى حفلات التليفزيون وحقق شهره كبيره .

اكتر اتنين قلدهم وحقق من خلالهم نجاح كبير (محمد عبدالمطلب) و (شفيق جلال)
ورغم انه كان بيأفور فى تقليدهم إلا ان شفيق جلال كان بيحبه وكان مبسوط
ولما تشوفوا (الملاح) وهو بيقلد (شفيق) مش هتعرفوا هو مين بيقلد مين

وبالمناسبه دى اعتقد ان المطرب الشعبى (عبدالباسط حموده) متأثر جداً بطريقة حديث (شفيق جلال) وتقريباً بيتكلم بنفس اللكنه والطريقه.
اما من ناحية الغناء فـ المطرب (محمود الليثى) يعتبر إمتداد لـ لون (شفيق جلال)
حتى (السبكى) استغل ده وخلا (الليثى) فى فيلم (شارع الهرم) 2012
يلبس جلابيه بلدى وطاقيه كاركتر (شفيق جلال)

(شفيق جلال) عمل فى السينما حوالى (50) فيلم
اولهم 1946 (عودة طاقية الإخفاء) واخرهم 2000 (زنقة الستات)

الملحنين اللى اتعاون معاهم (شفيق جلال) اسماء تخض
لكن ده فى اللى جاى بقى
______________
غنيت كل الألوان ولسه بيقولوا عليا مطرب شعبى ☹️
ده اللى هنعرفه بعد شويه
____________
#الجزء_السادس والإخير

* فى عام 2017 فى برنامج (الراجل ده ابويا)
قالت الفنانه سعيده جلال (شقيقة شفيق جلال)
(للأسف ماكانش بيستعين بملحنين تانيين ، ودى مشكلته وده اللى عطل مسيرته و اخر نجوميته)

🙄🤨 طبعاً الكلام ده غير صحيح
وواضح ان حضرتها (رغم انها شقيقته) مش فاكره (او مش عارفه) تاريخ شفيق جلال

خلينا نرد ونوضح : (شفيق جلال) إتعامل مع ملحنين كبار من العيار التقيل ونذكر بعضهم :
محمد عبد الوهاب / محمد الكحلاوى/ محمد الموجى/ سيد مكاوى/ عبدالعزيز محمود/ محمود الشريف/ عبدالعظيم عبدالحق/ فاروق سلامة / منير مراد/ أحمد صدقي/ عبد الرؤوف عيسي/ رؤوف ذهنى.
وغيرهم كتير

العتاوله دول عمل اغانى كتير لـ (شفيق جلال)
لكن الصدمه بقى ان تقريباً مفيش اى لحن منهم عاش ولا حد فاكره 🤔

اومال الحان مين اللى عاشت ونجحت ؟
مهو ده هنعرفه كمان كام سطر
بس خلونا نرد على الجزء التانى من كلام الأستاذه سعيده

اللى اخر شهرة ونجومية شفيق جلال وعطل مسيرته :
نقدر نقول بضمير مستريح ان سبب عدم الشهره ( بالمقارنه بزملاءه وما بعده من مطربين شعبيين)
ان (شفيق جلال) كان تايه ومش ثابت على لون وصوته بيتلون ومقتنع بينه وبين نفسه انه مطرب عاطفى وبيغنى زى عبد الوهاب ، تحسه عايز يبقى عبد الغنى السيد وعبد العزيز محمود وشويه يبقى محمد عبد المطلب ومحمد رشدى ، وبرضه إختياراته ماكنتش قويه رغم الأسماء الكبيره اللى اتعامل معاهم.

لما نيجى نشوف الأغانى اللى نجحت
ولسه عايشه لـ (شفيق جلال)
هنلاقيها من الحانه هو 😳😂
رغم انه مش دارس مزيكا
لكنه موهوب بالفطره وإتعلم بالممارسه
اشهر اغانية : شيخ البلد / امونه / كلمات سيد قشقوش
الحق مش عليك الحق عليا انا / كلمات على الجندى
بالإضافه لموال الصبر ( ياخوخ خانونا الحبايب) كلمات كمال مجاهد والحان محمد الكحلاوى .

(شفيق جلال) قدم فى بداية التسعينات البوم لـ اشهر اغانيه بتوزيع جديد واشتغل حلو
( فى اول كومنت كليب شيخ البلد بالتوزيع الجديد)

نجاح العمل الفنى واستمراره مايبانش دلوقتى لكن يبان بعد 20 او 25 سنه
لو فضلت الأغنية عايشه والناس فاكراها
بالظبط زى (لولاكى 1988على حميده )

تحياتى للجميع
واتمنى اكون قدرت اساهم ولو بجزء بسيط فى التعريف بمشوار
الفنان الشعبى الكبير ابن البلد (شفيق جلال)
الله يرحمه ويجعل مثواه الجنه

#الفن_وسنينه
#صلاح_عطية
ملحوظة: كتبت الكلام ده فى بوستات على صفحتى بالفيسبوك يوم 2018/2/4