- 23 -
أنا وخالد صاحبى
19 - 7 - 2013
----------------------
- أهلا خالد
+ مرحب دكتور
- ليا مدة ما شفتكشى
خير ان شا الله
+ كنت فى رابعة
- بتعمل أيه ؟
+ مانتا عارف باعمل أيه !
الشرعية انقلبوا عليها
شوية عسكر .. شفت يا بيه ؟
وف الآخر يقولولك ثورة
والإعلام بيطبل ليه ؟
دا مش إعلام .. دول ناس كفرة
- واحدة واحدة بص يا خالد
عايزك دايما تعمل فكر
وكمان ماتكفرش الناس
حتى ان شفت أعمال كفر
قول ( يأتى أعمال الكفر )
ونبدأ موضوعنا من الأول
قاعدين ليه ؟
وعايزين أيه ؟
+ دكتور مرسى لازم يرجع
- شفت يوم عدا وبيرجع ؟
+ يبقا هنفضل كدا قاعدين
ومع الوقت شوف هنصعد
وهنملا كل الميادين
- لحظة يا خالد
من حقك تتظاهر سلمى
تعطل شغل ؟ .. طبعا لأ
أو فى يوم تيجى تقطع شارع
منهى عنه .. قول الحق
وف الآخر مرسى مش راجع
ملايين ياما مش عايزاه
أكتر من تلاتين مليون
مرسى خيبته كانت سابقاه
فى مشاكل الشعب ما فكر
لما زادت المعاناه
همه بس فى التمكين
عينه على المرشد ورضاه
+ بس دا جى بالصندوق
- الشعب صاحب الصندوق
+ مش كنا نستنا يكمل ؟
- لو دا ياخالد كان يوم يحصل
ماكنا نلاقى حق نشوق
بكرة ياما هتقرا قضايا
عن سرقات كات للإخوان
+ كله كدب
- وأراضى كانوا بيبيعوها
وفلوسها م الأمريكان
+ برضك كدب
- وأسرار مصر فين ودوها ؟
خيانات ياما مفيشى أمان !
+ والله كدب
- القضايا لسه مقفولة
ومطلبتش منك حلفان
تحلف ليه على حاجة فى الغيب
انها كدب أو بهتان
استنا اما تشوف الحاصل
ساعتها كل حاجة هتبان
+ السيسى خاين
- وقف عندك
السيسى واحد م الشعب
ومن مكانه بيشوف أكتر
بص لقا مصر بتضيع
شغل مخه بحب يفكر
الإخوان ناويين يبيعوها
بقانون رسمى وبيتدور
راح يجهز فى مجلس شورى
وقدامه أسابيع مش أكتر
والشعب شايف قام هب
قال مش هاسكت تانى واتحسر
غور يا مرسى انتا وجماعتك
وسنة كفاية عليك مش أكتر
ووقف السيسى فى صف الشعب
لبى الندا مش طمعان فى اكتر
+ بس أنا راجع
- راجع فين ؟
+ راجع رابعة
- ماشى براحتك
قبل ماتمشى أقول لك حاجة
القادة اللى معاكو فى رابعة
لو فيه فرصة لهم فى هروب
فى ثانية مش هتشوفهم تانى
فيهم الصادق برضه كذوب
جامعينكم وبيتحاموا بيكم
زى الدرع .. أو كوم طوب
بكرة ياما هتشوف ندالتهم
لما الكل بقا مطلوب
ولما هترجع راح تلاقينى
زى ماكنت أنا وانت زمان
ونكمل تانى فى نقاشنا
ونشوف ليه فشل الإخوان
مواضيع ياما راح نناقشها
وناس ياما ساعدناها زمان
دخلت مصر وخانت مصر
وحق ولادنا يعيشوا فى أمان
مستنيك بقا إوعا تعوق
عندك أمراض فى الميدان
التيفود وجرب وبلاوى
واوعاك ترجع لنا جربان
-----------------------
هانئ الجمل