[عمرو الهنداوي]

أستاذ عادل أزي حضرتك
لي صديقة بتحب الكمان جداً وقررت انها تتعلمه وتشتري كمان .. وطلبت مني المشاورة في شراء الكمان .. وانا قولت لها ابعدي عن الحاجات الصيني .. فقالتي طيب اجيب ايه؟ هي عايزة كمان محترم ومش حاجة تتعلم عليها وبس .. فهي رافضة حاجة تكون تعليمية وخلاص .. هي عايزة حاجة محترمة واصواتها محترمة علشان تشجعها على الاستمرار .. فالحل الثاني انها تجيب كمان من حد محترف ولقينا الأسعار غالية اوي وبرضو الرخيص الصيني هي مش مقتنعة به .. روحنا محلات كتير والبائع جرب لينا كذا كمان بس بجد أصواتهم عيالي اوي ومش أصوات زي اللي بسمعها من الحفناوي او حضرتك او أنور حريري .. في فروق ضخمة في الأصوات .. وصوت الكمان اللي عرضه البائع باحسه بيغشلق ومشوه .. في بائعين بيقولوا انه في كمان بيبدا من 8000 من نوع ساندنر – سوزوكي – انتوني – ياماها - هيلمان محترم وذو جودة. بما انه حضرتك طبعاً اسطورة في الكمان حضرتك تنصح بأية؟
انا طرحت الموضوع هنا بدل الخاص علشان اكيد حضرتك حتقول كلام يفيد أي حد في الموقف ده .. حد عايز كمان محترم بس مش باهظ الثمن لأنه احنا لقينا أسعار خرافية تصل إلى 300 ألف جنيه في الكمان. وفي بي 600 جنيه حاجة بجد صعبة اوي.

مع جزيل الشكر
اخى العزيز
انت طبعا سألت سؤال مهم جدا .. وسألت السؤال المناسب للرجل المناسب .. اول مشكلة هل هى ودنها موسيقية ولا عايزة تتعلم كمان وخلاص .. ثانيا حاتتعلم فين .. واى حد بيتعلم كمان اما بيوصل لدرجة حلوة او بيفشل ويحصل له احباط لما يحس انها صعبة لذلك لازم تشترى كمنجة رخيصة لاتتعدى 1000 جنيه .. وانا حقولك تشترى واحدة حلوة منين .. تاخدها وتروح لعيسوى .. عارف قصر عابدين ؟ وراه فى قسم شرطة عابدين قبل القسم فى حوارى تسأل فى اول واحدة قبل القسم فين بيت عيسوى الف واحد حايقول لك بتاع الكمنجة .. هو بيصلح وبيبيع كمنجات صينى . بس بيختار كمنجات حلوة لأن الصينى فيه من نفس الماركة ونفس الشحنة كمنجات بتقول يعنىوكمنجات تحت الزف ولازم تتجرب .. ف هو طبعا عشان بيشترى كام كمنجة ف بيفليهم واحدة واحدة .. وبعدين بيعمل لهم حاجة بيغير الفرسة بفرسة احسن شوية وبيظبط العمود .. ودول بيفرقوا جدا جدا ف صوت الكمنجة .. لأن الفرسة الصينى الل بتيجى مع اكلمنجة طبعا تحت كلمة رديئة بكتير وبتكتم صوت الكمنجة .. ولازم تشترى كتافة من اول يوم عشان تريحها تمسك الكمنجة كويس ومريحة .. وبعد ما توصل لمرحلة معينة لو حبت تشترى كمنجة حلوة مشكلة الكمنجات الحلوة انها مش متوفرة يعنى تنزل تشتريها دى بتبقى صدفة او لقطة وانت وحظك وممكن تكلم تاجر زى عيسوى عن حد محترف عايز يبيع كمنجة وتنتظر لحد ما يلاقى لك المشكلة حاجة .. الكمنجة الحلوة بتبقى زى ما تخطب عروسة .. يعنى ممكن كمنجة ب 20 الف جنيه .. انا استلطفها وواحد تانى ما يحبهاش .. يعنى الكمنجة اليدوية الصنع بيبقى لها نكهة يعنى انا يوم ما اشتريت كمنحتى اللى عندى دى كانت واحدة من بتوع انور منسى وكان معاها واحدة تانية انا عزفت على الاتنين واحدة ماعجبتنيش والتانية اتهبلت عليها اللى هى معايا دلقوتى .. ولازم عشان تختار الكمنجة بتاعة العمر تكون شاطر يعنى بتعزف عشان تحس بيها ما ينفعش يختارها مبتدىء .. لانه ممكن مع انها حلوة لما يبقى شاطر ما يحبهاش لأن اكرر في عملية استلطاف بين العازف وبين الكمنجة بالذات يعنى انت بتسوق عربية بقالك اد ايه .. انت دلقوت فى مرحلة ممكن تختار عربيى حلوة .. حاتحس بيها يعن لكن فاكر لما كنت لسه بتتعلم سواقة ماكنتش حاتحس بالفرق بين ال 128 والمرسيدس .. لنك لسه بتطلع بالعربية وتبطل منك فاهم قصدى ؟ فيه كمان ملحوظة خطيرة .. لو الاخت راحت لعيسوى حسب حجم جسمها وحجم ايدها .. الكمنجة فيه مقاسين مقاس كمنجة 4/4 ومقاس 3/4 التلات اربع دى للى جسمهم صغير ودى نقطة خطيرة جدا .. يعنى فيه آنسات بس جسمهم صغير شوية الكمنجة التلات اربع دى تريح الاربع صوابع يعن انا كان فيه آنسة فى كلية التربية الموسيقية كنت بديها درس والدكتور بتاعها نصحها تشترى كمنجة 3 اربع لأن هى طويلة طولى بس ايدها صغيرة ف الكمنجة 4/4 كانت كبيرة شوية عليها اما ال 3/4 ريحتها وبقت معيدة فى الكية اقرا كلامى كويس وافضل نصيحة عيسوى زى ماقلت هو ممكن ياخد 100 جنيه زيادة مقابل ما بيديك كمنجة منقيها كويس وعامل لها الفرسة