[محمد عبدالخالق]

الاخ العزيز
انت الاول قلت اغنية وانا نزلت الفيلم ما لقيتش فيه اغانى خالص
لكن لما انت وضحت انها موسيقى
هى موسيقى تأليف الاستاذ محمد عبد الوهاب اسمها موكب النور
ومن حسن حظك ان الاخ العزيز نقولا مرجية مدونها من قبل فى المنتدى واليك الرابط
http://www.sama3y.net/forum/attachme...8&d=1354396852

مع اطيب تحياتى عادل صموئيل

تحياتى للجميع،

استاذنا عادل صمويل، أنا فعلا سعيد لانى عرفت اسم اللحن وأسعد انه مازال فى الذاكرة لانه فعلا جميل وغريب وفيه آلات موسيقية من الاوركسترا وآلات تانية تنفع لموسيقى الموالد، بصراحة خليط عجيب لكن فى النهاية متجانس مع بعضه، والناى والكمانجة مميزين جدا فيه.
بصراحة عبد الوهاب عبقرى!! فيه كلمة تانية نوصفه بيها؟
أنا صحيح مش عازف موسيقى لكنى الحمد لله باعرف اسمع نضيف.
وشكرا على الاهتمام والسرعة فى الرد على عضو جديد.

اخى العزيز
احنا هنا فى المنتدى كلنا اسرة , واى عضو جديد بيدخل ويبتدى يشترك معانا فى الحوارات بينضم للأسرة .. وانا معنديش فرق بين عضو قديم وجديد .. والمنتدى بتاعنا موجود على الانترنت ومتاح لكل سكان الكرة الارضية وانا لما بكتب نوتة مش بحدد مين اللى ممكن يستفيد منها لأن ممكن مليون عضو يفتحوا الصفحة ويكونوا مسجلين فى المنتدى وينزلوها .. اما اهم شىء انك بتسمع نضيف .. كان زمان ايام عبد الوهاب ونجوم وعمالقة الزمن الجميل ( وانا اشتغلت معاهم شخصيا اكتر من 20 سنة ) كان الذوق العام للجمهور مرتفع جدا جدا يعنى بيختار الحلو ويلفظ اللى مش حلو .. وده خلا كل الانتاج مستواه عالى حتى مع اصغر مطربين وملحنين .. والمقطوعة اللى حضرتك ذكرتها دى واحدة من عشرات المقطوعات الموسيقية اللى الفها عبد الوهاب وهو بالطبع مش عبقرى هو عبقرى جدا او مستودع عبقرية .. وكانت عبقريته فى ان كل مقطوعة ( ومع ان بتبقى معزوفة على نفس الفرقة وعلى نفس العازفين بيبقى لها نكهة مختلفة ومش بتتكرر فى مقطوعة تانية ومن اهم عبقرياته الدمج بين آلات فى الصولو وبيكون دمج غير معتاد
يعنى انت لما تسمع اول جملة وتسأل اى موسيقى ايه الآلات بالتحديد اللى طلعت النكهة دى مش حايقول غير نصفهم .. وماحدش بيعرف السر ده غير اللى عزفوا مع عبد الوهاب فترة طويلة يعنى مثلا فيه صولو قانون العادى انك بتسمع قانون محدد مع الايقاع
لكن مع عبد الوهاب كان بيخلى لو خلفية منخفضة من آلات تانية تخليك تحتار الالات دى ايه بالتحديد .. عشان كده انت النهاردة لو جبت اخطر فرقة موسيقية وتنفذ العمل ده تانى حاتحس ان فيه نكهة خطيرة ناقصة .. العملية دى انا عشان اوضحها اشبهها بالطبيخ
يعنى انا رحت جميع او معظم دول العالم فى اوربا مثلا لو عجبتك اكلة فيه كتاب طبيخ
بيبقى فيه الطريقة والمقادير محددة بالجرام تنفذ الطريقة بالضبط تطلع الاكلة لكن هات لى اشهر طباخة فى ايطاليا مثلا وعلمها تعمل ملوخية ونجرب مش ممكن حاتطلع زى واحدة مصرية تطبخها بيقولوا السر فى النفس لكن هو شىء سر ماحدش يعرفه .. يعنى حاجة بتعملها امى وامك بس السر ايه العلم عند الله والموسيقى الشرقية كده
انا انصحك فوق فى البحث اكتب موسيقى عبد الوهاب حتلاقى فى المنتدى هنا مجموعة كبيرة جدا حاتعجبك وحتلاقى نفسك سامع معظمهم من قبل هم كانوا كتير بيستعملوا فى الفواصل الاذاعية فى الراديو واحيانا فى بعض الافلام القديمة
وآسف للطالة مع اطيب تحياتى عادل صموئيل