- 17 -
وجهة نظر
19 - 12 - 2011
------------------------
حقيقى فيه ناس مأجورة ............ وعايزة تقضى على الثورة
فيه ناس بتقبض م الداخل .............. وناس بتقبض من بره
ومش عايزين الجنزورى ................. ولو صبرنا أيه يجرا
الانتخابات أهى شغالة ............. إشراف قضائى وإرادة حرة
وبعد كدا جاى انتخابات .................... رئاسية ولأول مرة
مهيش ديكور وبدون تزييف ............. ولا مخاطبة لناس بره
وتييجى ناس تلعب كورة .................. قدام رياسه للوزرا
وحوواشى ييجى فى ملاكى ......... و( ميت جنيه ) أجر الفترة
والفترة ديا يوم واحد ............... مشمول بجزء من السهرة
لمصلحة مين دا بيحصل .............. حرق المبانى جوه وبره
آدى ( تاريخ مصر ) بيولع ....... دا برضو من أهداف ثورة ؟
ثوارنا إنتو على راسى ........... زى التيجان فوق روس أمرا
ليا رجاء وعشان ننجح ................ بلاش تجمع ومظاهرة
لشهر واحد أو شهرين ............ بعدين نشوف أيه راح يجرا
والأمن يمسك مجرم كان .............. إندس جوا ناس طاهرة
والاقتصاد يمشى شوية ............. دا ( كل مصر ) بقت فقرا
مش كل ( وطنى ) يبقى فلول .. ومش كل ( ثوار ) فى مظاهرة
واللى يحب ميحرقشى ..................... ولا يضر ولو ذرة
تعالوا نقعد نتفاهم ............... نرسم سوا ( مصرنا ) بكرة
------------------------------
هانئ الجمل