أنا الإنسان
-------------
أنا الإنسان
ومن ربى كان البنيان
وأصلى طين
يعنى من تراب الأرض
وميه كمان
وربى بعلمه أنشانى
فى أى صورة سوانى
وفيا نفخة من روحه
حياة بتدب فى البنيان
بقيت إنسان
بنفخة ربى باتحرك
بها عايش .. بها اتنفس
بها أفكر
ولما الروح لخالقها
فى يوم بتعود
يكون الجسم بقا وجبة
حلال للدود
ويتهد كدا البنيان
ويرجع للتراب تانى
كأنه ما كان
كأنه ما اتخلق إنسان
أنا الإنسان
------------
أنا الإنسان
ولما أعلا مع روحى
واطاوع ربى فى أوامره
ولا أعصاه
ولا أخاف حد غير الله
وأقول الحق
لسانى وقلبى هما الصدق
ولا أظلم ولا أكذب
ولا أقتل
ولا أفعل فى يوم منكر
مفيش فى قلبى غير الله
ساعتها يرضى عنى الله
وأطلب شيئ يصير ويكون
أقول للشيئ كن فيكون
بإذن الواحد الرحمن
واكون إنسان
أنا الإنسان
------------------
أنا الإنسان
صراع داير مع نفسى
ما بين روحى
وبين نفسى
ولما النفس يوم تغلب
معاها شيطان
أخدت اللى فى إيد غيرى
قتلته كمان
منيش محتاج
لكن هاخده وأيه يمنع
وليه أنا اسيبه يتمتع
ولو عارضنى راح أدوسه
ومش هارجع
وأسمع ناس وانا ماشى
يقولوا لبعض
( دا حيوان
مهوش إنسان )
أنا الإنسان
------------------
هانئ الجمل