أخي الفاضل إيهاب عامر
اسعدتني مشاركتك وتحيتك وكلامك اللي طالع من قلبك يا اخي الفاضل ايهاب واشكرك يا غالي وخليني اقولك علي حاجه لو بتحب الاحباب فعلا وعايز تقابلهم معايا يبقي تعالي شرف جنبي .. عربية الترحيلات فاضيه والشاويش طلع صاحبك اهه
بخصوص موضوع الانفصال .. والله كل افكارك جميلة زيك يا ايهاب يا اخي الجميل
تقبل تحياتي وشكري العميق
***************
- اكتب بعد كده يا باش شاويش
قاطعني الشاويش تاني وقال :
- تكونش فاكرني باشتغل عند ( ) يا وله مكفايه كتوبات.
قلتله بنبرة تهديد:
- انت حتكتب بالذوق والا اقول الحاج محمد عن موضوع (الكذا والكذا) اللي بيخلي ركبك ومفاصلك تسيب وتقول جسمك باي باي .
الباش احمد تنح وقالي بصوت فيراني مذعور:
-والنبي لو قعت تمليني كتوبه للصبح مش حقول حاجه ملي ملي يا غالي :
اختنا الفاضلة الأستاذة 
(لولي)
كلمة شكر قليله علي تحيتك الجميلة ربنا يخليكي لمنتدي سماعي ولكل الغلابة اللي زيي ورأيك طبعا قيم جدا ولما اخرج من اللي انا فيه حنفذه باذنالله
طلباتك أوامر
تحياتي وشكري العميق
***********************
استاذتنا وتاج رسنا ونبع حنان المنتدي الصافي
مدام/ناهد
والله ده كتير عليه .. ربنا يخليكي ليه ولكل الاحبه في المنتدي
مع خالص شكري وتقديري العميق
تحياتي
****************
دكتور انس البن
قاطعني تاني الشاويش بصوت مذهول :
- الله أنت تعرف الناس العظمة الأكابر دي كلها منين يا وله .
قلتله :
- يا سلام .. هو انت فاكرني يا شاويش أي كلام ولا ايه لا .. اصحي .. فووووق ..ده انا ليه ضهووور مش ضهر واحد .. اكتب اكتب يا شويش يمكن تترقي علي أيديه وتاخدلك حتي شريطين ولو كانوا بنادول.
استاذنا الفاضل د/أنس
تحليل بديع وأفكار رائعة كالعادة ورأيك الصواب الذي لم يخطئ أبدا
تصدق بالله شهادتك في حقي اغلي من شهادة الثانوية العامة اللي كانت علي أيامنا بتبث الرعب والخوف في قلوبنا وكانت اغلي شهادة في حياة الإنسان ..كان زمان طبعا ..
والله يا عمنا الغالي يشرفني إن استاذنا وتاج رسنا الشاعر الجميل سمعجي يكتب صورة غنائية في المحكمة متهيألي التاريخ الغنائي نفسه حيفرح ..بس أمانه تلقزولي اسمي في الصورة الجميلة دي علشان أنا متأكد انه حيخلد فنيا وأدبيا بعد ما يبتكره الرائع سمعجي ومن جاور السعيد يسعد
خالص تحياتي وشكري العميق
*************
أخي كمال عبد الرحمن
سمعجي الجميل
بسبب مشاركتك ..يا دوبك وقفت ضرب في نفسي .. أصلي كنت كل ما ادخل أقرا لك قصيده ولا عمل أدبي ولا حتي مشاركة بسيطة انشالله سطر واحد امسك شماعة خشب وارثها من جدي وانزل ضرب في نفسي وانا بقول لنفسي ..
طااااااخ
شايف يا واد ..
طااااااااااااخ
شايف الكلام والتعبير والتفاعيل والقوافي والتراكيب والكتوبات والكنيات والحلويات
طاااااااااخ .. ايييييييييييي
مش لو كنت فلحت يا واد كنت حتكتب ولو ربع الكلام ده
يا بليد
طااااااااخ.. ايييييي
وحتكتب كده ازاي وانت خايب ونايب حتي في التحف
طااااااااخ .. اييييييييييييييي
وهاتك يا ضرب لما اتهريت
لكن شهادتك دي ليه خلتني اوقف ضرب في نفسي
ده (سمعجي) الجميل بيقول علي كلامي كلام الماظ
وهاتك يا رقص وتنطيط
ربنا يجبر بخاطرك .. بس وحياتك يا شاعر مخمخ
واكتب المحكمة .. النبي قبل الهدية
لك مني يا استاذي بحق
كل الحب والتقدير
(علي فكرة أنا رميت الشماعة من فوق .. عورت واحد وجرجرني علي القسم ودي حكايه تانيه)
****************