[عادل صموئيل]

احبائى

اقدم لكم من اغانى محمد قنديل

حدوتة

الاغنية دى انا بسمعها من زمان بس ماحبيتهاش لولا الحاح الاخ العزيز نور الصباح يعنى عمرى ما كنت اختار اكتبها
مع انى بحب حاجات كتير لمحمد قنديل وكنت بستمتع جدا بالعزف معاه
لما جيت اكتبها حسيت فيها حاجات الميزان مكسور او مش مريح بمعنى ان الاغانى عموما عند التدوين لازم لما اسمع بكون سامع مازورة صريحة محددة كذا مرة حسيت ان كذا مازورة ناقصة حاجة
انا عادة لما بتصادفنى حاجة كده بسأل الاخ العزيز محمد الآلاتى حتى فوق هو رد وجايز تكونا حسيتوا ان فيه لبس ع الاغنية هو قال لى انها مش مكسورة وقدمها من عزفه وغناؤه ... لقيتو عازفها زى التسجيل بتاع قنديل بالضبط
بس قال لى كلمة ع الخاص انها تعبته جدا على ماحفظها عشان يسجلها ... ومع ان الاغنية هايفة يعنى مش حديث الروح ولا الاطلال هى لو مضبوطة ماكانش حايتعب فى حفظها يعنى انا شكى فى محله فيها حاجة
جيا الصبح وقلت للأغنية يا انا يا انتى فى اليوم اللى مش غايت ده وابتديت اسمعها بتمعن اوى ولولا انى اعرف سيد مكاوى شخصيا اوى يعنى سيد مكاوى اتنين .. سيد مكاوى الفنان وسيد مكاوى التاجر اللى بيكلفت احيانا يعنى بيعمل الاغنية فى نص ساعة ويقبض يعنى حتى المقدمة تحسها واحد مسك العود وطلعت وهو بيسلطن نفسو فى مقام الراست انا بسميها تسليطة مالهاش محل من الاعراب .. اكتشفت العيب فين .. عارف لما تاكل شىء لذيذ جدا وتحاول تمضغه وتتذوقه ولما تاكل حاجة اى كلام وتبلعها على طول اللحن ده كده .. مش عايز التذوقعايز يتكتب على طول والحمد لله اتكتب مع انى اضطريت للتدخل الجراحى فى مازورتين لسبب ان قنديل المتمكن اتصرف
لكن انا ما اقدرش اكتبها مكسورة ... والمشكلة فى اختيار الاغانى عندكم يعنى مش اى اغنية الواحد يدور على نوتة ليها ويعزفها يعنى مش حاتزود حاجة .. انا لما بختار لكم اغنية على ذوقى ببقى عارف مقدما بخبرتى انها حاتعجب الكل حتى اللى بيفاجأ بيها ومش فى مخو انو يلاقيها نوتة وفيه اغنية حد بيطلبها والاعضاء ماحدش منهم بيشوفها اصلا المهم انا سعيد انى خلصت منها ونرجع لفايزة احمد بس خلوا بالكم فيه طلبات كتير وناس طلبت عليهم اكتر يعنى اصبروا شوية
مع اطيب تحياتى