[عادل صموئيل]

اول امس توفى احد اعز اصدقائى .... الحاج محمود فهمى ... كان من الشخصيات اللى مالهاش علاقة بالموسيقى لكنه عمل مرحلة فارقة جدا جدا فى حياتى الموسيقية .. كلام غريب .. نقول ازاى .. انا طول عمرى عندى شغف شديد جدا يصل الى حد الجنان بالاجهزة والعدد .. الشىء ده خلانى اتعرف بعدد كبير جدا من الناس .. وصدفة تعرفت على الحاج محمود فهمى .. يعنى هو كان ابن خالة واحد زميلى لما كنت مدرس وقتها فى مدرسة عين شمس الثانوية اسمه استاذ صلاح .. يعنى كنا بنتكلم قال لى ان ابن خالته مجنون بالاجهزة مثلى وكلمه قال له عليا الموسيقار الكبير يعنى المهم اتقابلنا .. وهو كان جارى فى عين شمس .. واتصاحبنا بسرعة اوى الكلام ده كان تقريبا 1997 ... كان وقتها اهم حدث فى الاجهزة الريسيفر الديجيتال .. وكان عندنا قبل كده الريسيفر الانالوج وانا تقريبا كنت اول واحد ركبه فى عين شمس وكان غالى جدا يعنى كان الطبق 240 سم ب 20 الف جنيه .. بس كان اخطر حاجة فيه مكونات الطبق كانت تمنها حوالى 2000 جنيه وكانت بتتسرق لدرجة انى ركبت للسطوح باب مصفح .. احلا حاجة فى الديجيتال ان ال LNB كانت تمنها 50 جنيه ماتستاهلش السرقة .. الحاج محمود الله يرحمه كان مصاحب محل فى العتبة اسمه عبد الشافى .. وعبد الشافى كان له قطة طريفة جدا .. كان وقتها ال ART بتاعة الحاج صالح الله يرحمه كان محتكر القنوات الرياضية ومشفرها ومرة حصل كان ماتش مهم بتاع مصر واتحايلو عليه يفتحه عشان الشعب يتفرج قال ولا بصة واحدة حتى ... دى اوغرت عليه صدرو المصريين لوقت طويل .. وظهر بعدها الريسيفر اللى فيه كامة وبيتحط فيه كارت فك شفرة .. وتوصل عبد الشافى الى فك الشفرات وبتدفع 10 جنيه لشحن الكارت كل شهر وخلا الحاج صالح اتجنن وكان عبد الشافى زى بيت ريا وسكينة ورا القسم بس القسم كان مطنش لأن زى ماقلت الحركة بتاعة عدم اذاعة المباراة كرهت فيه كل المصريين وماحدش سأل فيه وحصلت حرب بين عبد الشافى والحاج صالح لما ماقدرش عليه طلب من المانيا تعمل له شفرة صعبة كان عبد الشافى بيفكها وصالح يعمل شفرة جديدة... الحاج محمود الله يرحمه كان كل شهرينزل ريسيفر جديد يوزنى نروح لعبد الشافى ندفع 30 جنيه ونديه اللى عندنا وناخد الجديد .. المهم النقطة الفارقة ... كان وقتها ابتدا يظهر الكمبيوتر .. انا كنت فقدت اهتمامى بالاجهزة الجديدة خلاص .. ما اهتميتش بالموضوع .. ووقتها مكانش منتشر زى دلوقتى .. يعنى انا كنت زى الست ام كلثوم محافظين اوى ... بنغرز فى العصر اللى احنا فيه مش اى موضة نجرى وراها إلا بالاقناع الشديد .. فاكرين لما عبد الوهاب قال لها نجيب جيتار كهربائى وامتنعت يشدة لحد ما اقنعها ... طبعا قبل الريسيفرات كان كل اهتمامى بأجهزة التسجيل والفيديو والامبليفاير والشرئط وكان طبعا عندى كمية شريط تملا اوض ... فجأة بزور الحاج محمود قعدنا فى اوضة فيها كمبيوتر.. عارف ام كلثوم لما قالت : صدفة اهدت الوجود الينا ... وعشان يطرى القعدة راح فاتح الكمبيوتر وشغل اغنية لأم كلثوم ...انا ذهلت ايه اللىبيحصل .. راح قفل الاغنية وورانى الصفحة لقيت معطم اغانى ام كلثوم .. وقفل الملف وورانى ملع ل عبد والهاب وفريد وليلى مراد .. انا حصل لى ذهول عارف على بابا لما دخل المغارة يعنى شفت قدامى محتويات 200 شريط كاسيت مثلا ... واتعدلت فى القعدة وقلت له اشرح لى ايه اللى بيحصل .. قال انك ممكن تسجل عليه او تنقل منه او تحول الشريط الكاسيت الى ملف .. انا اتجننت ... ونزلت كان فى يومين جبت كمبيوتر كان وقتها ب 7000 جنيه ... انا طول عمرى كان من عادى حاجة لما اح دماغى ف موضوع بقعد ادرس فيه لحد ما اتفوق على اللى علمنى بمئات المراحل بجيب آخر الموضوع يعنى وافضل استكشف .. انا كنت خبير مونتاج على الشرايط بالبحث اكتشفت ان فيه برامج على اكلمبيوتر تعمل مونتاج واخترت برنامج= لكنه مش متوفر ( كان وقتها مفيش نت ليه ) اكتشفت برنامج اسمه كول ايديت جننى وكلمت الحاج محود اله يرحمه كان ابنه مصطفى شاطر فى الكمبيوتر بحث وجاب لى البرنامج بالسيريال بتاعه وابتديت اقص الاغانى زى ما انا عايز .. بعد كده دخلت على انى اسجل كمنجة برضه على البرنامج ده بقيت اختار المقاطع الحلوة ونبغت فى البرنامج ده بحيث انى بقيت اقص الحرب الواحد .. بعد كده .. اكتشفت برنامج الوفيس واكتشفت برامج التدوين الموسيقى وانا كنت بدون قبل كده بإحتراف عالى بللقلم والورق وتوسعت علاقاتى وجبت برامج التدوين .. انا طبعا ك مدون مرموق .. وقعدت فى الفرقة الماسية اكتر من عشرين سنة اتعملت ان الطريقة الل ىكنا بندون بيها وشكل النوتة هو افضل شكل فى العالم والعالم كلهاتعلمه من الفرقة الماسية وصاحب لفضل يرجع للمرحوم الاستاذ نصر عبد المنصف .. واول مشكلة لما ابتديت ادون انك تختار برنامج تقدر تروضه فى التدوين وكان افضل برنامج انكور وتخصصت فيه بس كانت بتقابلنى مشاكل لأن البرنامج غربى ودخلت فيه التدوين الشرقى يعنى اخترعت فوت مخصوص بإسمى حطيت فيه كل احتياجاتى وكان هدفى ان كل حاجة فى النوتة تبقى من الكمبيوتر مازودهاش بالقلم بعد كده حطيت كل نبوغى فى الكمبيوتر عشان اوصل لكده .. والحمد لله وصلت .. بعد كده جت الخطوة الفارقة فى حياتى الموسيقية ... ان اسم عادل صموئيل كعازف كمان يتعرف خارج نظاق الناس الل بيتعاملوا معيا شخصيا ... لما دخلت النت بتاع الرواتر ( لأن كان زمان المودم بطىء جدا جدا ) وابتديت اتعرف على منتديات واعرفهم بنفسى وحد قال طب ماتسمعنا حاجة .. ونزلت معزوفات والاعجاب والاستحسان خلانى انزل اكتر الى ان برضه صدفة لقيت موقع اسمه منتدى سماعى للطرب الاصيل .. ده اهم موقع فى العالم للطرب الشرقى الاصيل .. ولما عرفتهم لنفسى ورحبوا انى انزل معزوفاتى وسمعنى ناس من جميع انجاء العالم وابتديت ابقا نجم وطبعا فيه موسيقيين كبار فى العالم اعضاء فى المنتدى يعنى لما دول يسمعوك بتختلف يعنى مرة مايسترو عالمى قال انا رحت كل الدول وسمعت كل المشاهير وسمعت نصير شمه ومين ومين .. لكن عادل صموئيل غيررررررررررررر .. زى ما كتبها ... طبعا دى وسام خلانى انزل هناك اكتر من 120 معزوفة ماحدش عزفهم من قبل لأصعب اغانى ام كلثوم طبعا خطر حاجة انى ملتزم عشان عزفت مع كل الملحنين باللحن زى ماهو عملة باللملى لأن كان محظور انك تشيل او تحط حرف من اللحن زى ماهو عمله .. الصدفة التانية بقلب فى المنتدى الجبار ده واللى يحتاج سنوات عشان تعرف تتعرف على الكنور الى فيه لقيت قسم اسمه النوت الموسيقية .. دخلت حب استطلاع ... لقيت نوت موسيقية بعضها عجبنى وبعضها مش مكتوب حلو .. كان من ضمن اهم حاجة فى القسم ان الاعضاؤ من جميع انحاء العالم بيطلبوا نوت موسيقية وفيه عضو او اتنين بيدونوها لهم .. مرة عضو طلب اغنية رحت ان دونتها ونزلتها ... طبعا الكل كان حايتجنن عليها لن ليا طريقة او مدرسة جديدة فى التدوين ما مرتش عليهم من قبل .. المدرسة دى نتجت عن التركيبات الغريبة اللى انا انفرد بيها فى حياتى ... يعنى انا كنت بالليل موسيقار كبير بقعد مع نجوم النجوم ...والصبح مدرس موسيقى بتعامل مع مبتدئين .. كانت مشكلتى ازاى اخلى المبتدئين يعزفوا الاغانى لأن المبتدى لما يعزف جملة من ام كلثوم او عبد الوهاب دى حافز رهيب يخليه يستمر بدل ما يقعد يعزف حاجات تافهة مالهاش قيمة .. ف عملت مدرسة للتدوين ازاى اسهل تدوين النوتة بحيث ان المحترف يعزفها وهو مغمض والمبتدىء يعزفها بسهولة .. والحمد لله نجحت المهم فى سماعى دونت اكتر من 3000 اغنية من اغانى الزمن الجميل ... انتشروا فى كل دول العالم واتقالت كلمات حلوة زى ملك ملوك التدوين وحد تانى قال مفيش موسيقى بيعزف موسيقى عربية ما يعرفش عادل صموئيل وكان اهم شىء انى بنزل كل النوت مجانا للى يطلب .. وكذا مرة حد قال لى انت لو حبيت تكسب ملايين اعمل زى الل بيعملوا يعنى تقول اللى عايز اغنية يطلبها ويدفع كذا وانزلها له ع الخاص ... انا اتعلمت من العمالقة كلمة خطيرة اسمها للذكرى والتاريخ ... يعنى ممكن آخد منك 100 دولار بس ماحدش حايشوف النوتة غيرك ولا انزلها مجانا ويشوفها ممكن مليون شخص .. التانية عندى احسن .. عبد الحليم صرف اللى كسبه فى نص عمره الاول على انتاج اغانيه فى نص عمره التانى .. يعنى كمان حاجة جميلة عجبتنى .. فيه عشرات الناس بتاخد النوت بتاعتى وتنزلها بأسمى ف منتديات وصفحات انا معرفهاش .. يعنى بكون ببحث عن حاجة على النت الاقى اسمى موجود فى عشرات الصفحات ... دى عندى احسن من مليار دولار ... يعنى النهاردة وسام على صدرى انك لو فى بحث جوجل اكتب : عادل صموئيل حتلاقى عشرات الصفحات ... وكل ده الفضل يرجع للحاج محمود فهمى الله يرحمه لو ما كنتش شفت الكمبيوتر عنده جايز كنت لحد دلقوتى ما اعرفش كمبيوتر الله يرحمه ويحسن اليه وارجو منكم الدعاء له واطيب تحياتى