الحلقه الرابعة ( النجاح رزق)
مشوار الفنان محمد رشدى
#رشدى_المغنواتى
________________
* 1951دلوقتى رشدى معتمد فى الإذاعه وعنده كام غنوه
( سامع وساكت / يا ناس حبيبى فين / محرمين النوم )
لكنهم اغانى عاطفيه ومفيش حاجه فيهم ناجحه قوى .
* قبل ما الكلام ياخدنا خلينا نقول إسم (محمد رشدى) جه كده ازاى
وهو غنا واسمه (رشدى محمد) ؟
طبعاً هو اسمه الحقيقى (محمد) وشهرته فى بلده دسوق (رشدى محمد)
ولما جم يذيعوا اول اغنيه ليه فى الإذاعه وكان المذيع وقتها (سعد عبد الوهاب)
اللى هو المطرب المعروف ( ابن شقيق الموسيقار محمد عبد الوهاب) اللى اشهر اغنيه (الدنيا ريشه فى هوا) اللى فى 2003 اعاد غنائها الكنج (محمد منير)
كفايه كده عشان مانتوهش من بعض 😂
المهم المذيع قال والأن مع اغنية ( سامع وساكت) غناء المطرب الجديد ( محمد رشدى) طبعاً رشدى قاله ياعم انت قولت اسمى بالمشقلب ، انا (رشدى محمد) مش
(محمد رشدى) ياعم اهلى فى البلد كده مش هيعرفوا انى انا اللى بغنى لانهم عارفنى باسم (رشدى)
المذيع قاله لاء كده احلى وكل النجوم دلوقتى اسمهم الأولانى (محمد) : محمد عبد الوهاب ومحمد عبد المطلب ومحمد الكحلاااااوى وتحيا الوحده العربيه 😂
* عمنا رشدى نفسه فى غنوه تتشهر ويتشهر بيها ، وقد كان
وكانت غنوة (مأذون البلد) اللى هى من الحانه وكتب كلماتها محمد فتحى مهدى ، الغنوه بدأت تشتغل والجمهور يطلبها فى الإذاعه فى مناسبة الأفراح .
قصدى حصلت ثورة
يوليو 1952 23 ومشى الملك فاروق ،
مهو رشدى كان عنده تسجيل فى الإذاعه اليوم ده ،
ولو ماسجلش مش هياخد فلوس ولا هيعرف يعيش ،
المهم لما صعب عليهم قالولوا تعالى غنا ياعم ،
هتغنى ايه ؟ قالهم (المكتوب ع الجبين) قالوا ايه النكد ده 😭
هى البلد ناقصه ، بقولك ثوره والناس فى الشوارع
انت مش عندك غنوه للأفراح ، ماتقولها يانجم واهى البلد دلوقتى فى فرح
وقد كان ، البلد فاتحه الراديو مستنين بيان من الضباط الاحرار
ويلاقوا (محمد رشدى) بيغنى : قولوا لمأذون البلد يجى يتمم فرحتى 😂
الغنوه ضربت وكسرت الدنيا ، وفضلت شغاله لمدة 10 سنين
لدرجة رشدى اتخنق منها ، وبقى يتقال عليه مطرب الغنوه الواحده ، لانه ماعندوش غنوه ناجحه غيرها .
لكن خلينا نتفق انها وش الخير عليه من ناحيتين ، فنياً لانها عرفت الجمهور بيه ، وإنسانياً لانها كانت السبب فى إرتباطه بـ زوجته ام اولاده .
اللى اهلها طلبوه يغنى فى فرح بنتهم ( اخت زوجته) ولما شاف اختها ( اللى هتبقى زوجته بعد كده) عجبته وتم الإرتباط علطول .
لكن يافرحه ماتمت ؟ ايه اللى حصل ؟
تقولش عين ورشقت بس بالجااامد
وده هنعرفه مع بعض فى اللى جاى وعليكم خير