المسحراتي
(الحلقات التليفزيونية آداء سيد مكاوي وأشعار فؤاد حداد)
(19)
.... ....
... مسحراتي وجيت في نسمة طرية منأراتي أنادي ع الخضرية ما فاضلش غير ساعتين على الفجرية ... مايل جناحك في العسل بتسوق عربية شايلة الخير ونازلة السوق سنتك مباركة وشهرنا مرزوق ... والدنيا فرحانة بقمرها الباسم ده راجل حديد في المية والضي راسم على كوبري إمبابة مواسم مواسم ... انا شيلت فوق العين وفوق الراس ... رزق الحبايب ينقسم انصاص اصحى يا نايم وحد الرزاق ... رمضان كريم ... رزق الحبايب بالهنا لم يفاصل من السما بالخير على الأرض واصل يطعم صغار الطير ويسقي الحواصل ... الحمد لله اللطيف الرحيم ... وعيني مليانة وقلبي سليم ... وناس كريمة وشهر طيب كريم اصحى يا نايم وحد الرزاق ... رمضان كريم ... أضحك لكم ضحك التهاني والأماني ... وأعمل أنا الخضري وانا الفكهاني ... ومسحراتي في الهوا دكاني ...
المشي طاب لي والدق على طبلي ... ناس كانوا قبلي قالوا في الأمثال ... الرجل تدب مطرح ما تحب ... وانا صنعتي مسحراتي في البلد جوال ... حبيت ودبيت كما العاشق ليالي طوال ... وكل شبر وحتة من بلدي حتة من كبدي حتة من موال ... عملت أنا في البلد فكهاني في البلد نشوان ... أنده على العجمية والحلو من حلوان ... على الجوافة روايح والعنب الوان ... البرتقان النسيم اليوسف المشمش لقيت حديد الكباري من الحنان يرمش ويطير بسور الجنينة حسي والكروان وسبجت في الندى إمبابة والأكوان اصحى يا نايم اصحى يا نايم اصحى وحد الدايم ... السعي للصوم خير من النوم دي ليالي سمحة نجومها سبحة اصحى يا نايم يا نايم اصحى ... وحد الرزاق ... اصحى يا نايم يا نايم اصحى ... وحد الرزاق....اصحى يا نايم يا نايم اصحى ... وحد الرزاق