المسحراتي
(الحلقات التليفزيونية آداء سيد مكاوي وأشعار فؤاد حداد)
(05)
.... ....
... ... اصحى يا نايم اصحي يا نايم اصحى وحد الدايم .... وقول نويت بكرة إن حييت الشهر صايم والفجر قايم .... اصحى يا نايم وحد الرزاق ... رمضان كريم ...
مسحراتي وكل ليلة سحور منئراتي وبطبلتي مسرور ... أخدت بعضي من بولاء للصحافة والجلاء طاير حمامة والإشارة مرور ... يا اهل المطابع والأصابع نور شفت الليالي نهاري ونهاركم نور تسحروني والا اسحركم ... الحرب على الورق ثابت محفور ... واعرف تاريخ اليوم في أيامي ... والدنيا ع البنورة أدامي والحبر جايز والمكان بيدور ... وفي كل سطر ألوف بتشبهلي الواجب ؟؟؟ على مهلي والعمر ما يكفيش قراية السطور ... غير دعوة صادقة ومصر منصورة ... كل الأحبة يبانوا في الصورة ... وكل غايب ينكتب له حضور ... واخطف بعيني أول الصفحة من الجريدة المسعدة الصابحة ... والقطر قايم والأمل مأطور ...
والمشي طبلي والدق على طبلي ... ناس كانوا قبلي قالوا في الأمثال ... الرجل تدب مطرح ما تحب ... وانا صنعتي مسحراتي في البلد جوال ... حبيت ودبيت كما العاشق ليالي طوال ... وكل شبر وحتة من بلدي حتة من كبدي حتة من موال ... أنزلكم في الندى والطل أتنسم ... في الضي أضحك لكم وفي الضلمة أتبسم ... نغم المحبة بيجمع لما بيقسم ولا أبطل غُنى ولا أبطل التسحير بقلبي طول السنة وبطبلتي موسم اصحى يا نايم اصحى يا نايم اصحى وحد الدايم ... السعي للصوم خير من النوم دي ليالي سمحة نجومها سبحة اصحى يا نايم يا نايم اصحى ... وحد الرزاق ... اصحى يا نايم يا نايم اصحى ... وحد الرزاق....اصحى يا نايم يا نايم اصحى ... وحد الرزاق