[abuaseem]

المشاركة الأصلية كتبت بواسطة abuaseem

قصيدة صلى عليك الله
الشاعر جمعة ابوخبينة
تسجيل استوديو

قصيدة صلى عليك الله

صلى عليك الله .. يا تاج راسي .. يا رسول الله .. والملائكة صلى عليك الله
صلى عليك اللي عزيز قدير .. والملائكة صفّاً وخير نصير
يا بال من جيته بشير نذير .. وهو قبل غارق في الهوى وبلاه
عليك كل من صلى مقام كبير .. ينال عند ربّه وين ما ناداه
وعليك كل من صلى انْ كان فقير .. سعيد حظ في الدنيا وفي مثواه
وعليك كل من صلى إنْ كان ضرير .. ينال أجر ويعجّل الله بشفاه
وعليك كل من صلى بنظاف ضمير .. وين ما طلب ربّ العباد عطاه
وعليك كل من صلى بلا تحكير .. ينال الرضا والعفو من مولاه
ونا عليك لازمني قصيد اندير .. وجنّي وصايا مو مغير وصاه
في علو شانك من أصحاب الخير .. اللي من أتباعك يا حبيب الله
اللي هذا شجعني على التعبير .. ونا لمن ايحبك ما انخيب جاه
صلى عليك الله
صلى عليك اللـــــــي كريـــم ودود .. والملائكة صلوا عليك احشــود
بكونك علي خلـــقً عظيــــم وزود .. متوكل علي ربّك ونلت رضـاه
طلبت الشفاعة مــن كريم الجـــود .. في كل مؤمن لك عليـــه عناه
من دون الانبيا صفك يجي مسنود .. بقول امتـــي لله فــــي عليـاه
ونا يا حبيبي ما نكــــون جحــــود .. وانت شفيعي ما عليك غنـــاه
انكاني امقصّر والسلف مـــــردود .. يوم الحساب اللي شديد صناه
يوماً الوالــــد يهلــب المولــــــود .. ويهلب اللي قضّت العمر معاه
والخوت والولدين راس الــــرّود .. اللي هذا يبحث له علي ملجاه
يوم فيه لا ناشـــــد ولا منشــــود .. والعــذر غايب ما هنــاك لغاه
امفيت قول نفسي بس يا معبـود .. يا خالق تغفـــر الذنب أمحــــاه
راني امثقّـــل والظهــــر مقنــود .. وما خاب ظنّ اللي عليك اعباه
صلى عليك الله
صلى عليــــك اللــــي عليــك وكيـــل .. والملائكة لا كـــذب لا تدجيـــل
هذا فــــي كتاب الله خيــــر دليـــــــل .. واللي ما قرا يصفّحه يقــــــراه
ومذكور فــي التــورات والانجيـــــل .. من قبل يظهر ع الوجود نبـــاه
أسمك الغالي جيــل يــارث جيـــــــل .. وهو في القلوب الصافية مرساه
ونا فيك ما عنـــدي جــرام جميــــل .. انصلي عليك صلاه خير صــلاه
صلاة في الفجور وفي عقاب الليــل .. صلاة امحب علي حبيب شهــاه
صلاة من الصميم وهيل ما هي كيل .. اعداد ما تعلّت شمس كل ضحاه
صلاه كي ما امرنـــا بها الجليــــــل .. اللي النور نوره ونهتدوا بهـداه
واللي قال عدّوا من رباط الخيـــــل .. الهم نين تنتصروا على الطغـــاه
وهو اللي قطع دابر أصحاب الفيـل .. ومنهم البيت اللي عتيق حمــــاه
وين ابرهه حشّــــد بجيش ثقيـــــل .. وجــــاب الأفيـــال ربنـــا فاجــاه
بطيــراً أبابيــلاً ومــــن سجيـــــــل .. ترميه بحجاره هي أسباب فنـــاه
صلى عليك الله
صلى عليك اللي قـوي جبّـــــــار .. اللي حماك من الكفار والأشرار
ببيت عنكبوت وانت وسط الغـار .. وما يمنعك مــن كيدهم لـــولاه
وكيف قالك بوبكر ما الاخبـــــار .. له قلت لا تحـــزن ولا تخشـــاه
حتى لو علينا ضيقوا الحصــــار .. معانـــــا الله بجيــش مــا تـــراه
ترايوا نصيب وغيروا المســـار .. وعمى ابصارهم عنك انت واياه
معاك ربّ ما يخفاً عليه اســـرار .. ومن قبل موسى هو اللي نجـاه
وأيـــوب فيــه الـــدود يامـــا دار .. وين ما صبر جاب الدوا وابراه
ومن بطن حوته في غريق ابحار .. هو اللي نقض يونس بعد ناجاه
وابراهيم في وسط لهلوبت نـــار .. وبــرد وسلام يقـــول ما تـــاذاه
ولوط وين للقرية نوى الدمــــار .. بارياح النجــا من بينهـــم وازاه
هو وعيلته وانقضه م الفجّـــــار .. امفيت زوجته كانت من العصاه
صلى عليك الله
صلـــــــى عليــــــك الله ربّ الكـــــون .. والملائكة مليون في مليون
اعداد البشر من كـــل جنس ولـــــون .. الحيين واللي فارقوا الحياه
واعداد ما ركز من طير فوق غصون .. وغرّد بعد خيّم اللي أمساه
واعداد ما غضب ربي علي فرعـون .. وقوم لوط واهل الكفر والبغضاه
واعداد كل نقطه من بحـــــر غليون .. واعداد كل كاين حي ساكن ماه
واعداد كنز في بطن الوطا مدفـــون .. واعداد ما بحث عالم علي سبّاه
واعداد ما تناقل من ارياح العــــون .. واداير وجا كاسي الغيم سماه
صلوا عليك صلاه مــــي مـــن دون .. تليق بمقام اللي الله اصطفاه
اللي هو مقامك يا عمار الجـــــــون .. ياللي وين جيت الكون زال كداه
وهو قبل غارق بالفتن مشحــــــون .. وما يفوت يوم وما تسيل ادماه
والسيف ياكل في الجوا مسنـــــون .. وما يقعدن من غير طار نساه
جيتم وصدرك ع الحباب حنــــــون .. هاديتم والهدي يا مبهاه
فيهم اللي بايع وهـــــو ممنــــــون .. وآمن بربّه وين هديـــك جــاه
فيهم اللــــي مابـــوش يعترفــــون .. بهديك ولا باللي عظيم قضــاه
اللي لكل شي ان قال كون يكـــون .. والملك ملكه من جميع ارجــاه
لكن احنــــا غرن بنــــا البطــــون .. وابليس اللعين اللي الله خـــزاه
فينا اللـــــي بالمــــادة مفتـــــــون .. يجري وما حاسب الموت وراه
فينا اللي م المـــال عنـده شــــون .. ولا بيــه يصــــدّق ولا زكّـــــاه
فينا اللي خــــارج علـى القانــون .. وخارج على الملّه وماكـــن داه
فينا اللــي مظلــوم م الواشــــون .. فينا اللــــي ظالـــم ينال جـــزاه
فينا اللي يعطف على القــــــزّون .. فينا اللي مـــا يشغلـــه بابكــــاه
فينا خبر واجـــــد وفيـــه جنــون .. واللي ما سمعنا بيه شاهدنــــاه
وحق من قسم بالتين والزيتــون .. اللي الوحي من عنده عليك هداه
انّ حالنا يشغل وبك مرهـــــــون .. نرجوا شفاعتك فينا نهار لقـــاه
صلى عليك الله
صلى عليك صلاة المحبيـــــن .. والملائكة لعنـد يـــوم الديـــن
وبينك وبيــن الله خيــط متين .. واللي معـــــاه الله ما ينســــاه
حماك م اليهود وم الصليبيين .. وم المشركين وقارنك باسماه
بكونك علي خلقاً عظيم وزين .. وحبيب ربنا واللي نواك نواه
وجدّ الاثنين الحسن والحسين .. خلفة "علي" طيب الله ثــراه
اللي خذ التونيسه وقرة عين .. وماتوا وهم دينك علي مبـداه
صلى عليك الله
صلى عليــــــك وبالصـــــــلاة أمرنـــا .. انصلوا عليك كبيرنا وأصغرنـــا
ورانا احســــاب ان كانـــا قصّرنــــــا .. وعصيناه صاحب الامر ما طعناه
هو اللي خلقنا وهــــو اللي صورنـــا .. وله نرجعوا نبقوا جوار احــــذاه
هاناك يسألنــــا علــــــي مـــا درنــــا .. وهاناك من سلّف سلــف يلقــــاه
وهاناك درب الخيـــر كـــان اخترنـــا .. يبقى عندنا فيها اعروق نجـــــاه
وان كان عكس ذلك هو اللي يسترنا .. ويسبل علينا ستــــر من يـــــالاه
مع شفاعتــك يــــا عزّنــــا وفخرنــا .. يا عزّ من في الكــــون حبّينـــــاه
صلى عليك الله
صلــــى عليـــك الله واحنــــا كنّــــا .. عليك ما انصلوا وانت قدوه لنا
وفي شفاعتك مامــن اللي يستنـــى .. ورافع العين وما ايخيب رجـاه
بكونك شفيع الخلـــق يــــوم الظنـه .. يوم الرضيع يشيب فيد امّــــاه
يا من اصحابك بشّـــروا بالجنــــــة .. كيف ما ابها بشرت بــاذن الله
عثمان وعلي وبوبكر فرض وسنة .. ما فرطوا في الدين حــوذ قذاه
والفاروق من قالــــوا عليه تهنــى .. وين ما حكم بالعدل فـــي دنياه
والزبير في يـــوم الوغى يخشنـــا .. خيل العدا والسيف فــــي يمناه
وبوالعوث فاز ونال مـــا يتمنــــى .. وين ما طلب حقـــق الله مسعاه
وطلحه وسعيد وسعد واخذ رنــــه .. تاريخهم يلمـــع اتقـــول امـراه
عبيده بن الجــــراح مــــــا نسينه .. واللي دار شي يخلّده ذكــــــراه
وبوالعاص في نصرة الدين تعنّـى .. وخالد خزام المشركين اعـــداه
وياما وياما من صحابـــي عنّـــــا .. مهما حكيت يصعب ردود كفـاه
كرامات من واحد بدون امنّـــــــه .. الخالق الباري واسع الميـــــداه
هو اللي خلقنا وين نمشــوا منّـــا .. منين كل حدّ تشهد عليه اعضاه
بلا شفاعتك يا من امليـت محنّــه .. يا قـــدوة اللي يفهمــــوا معنـاه
صلى عليك الله
صلى عليك وبالصلاة حضــاك .. أنت بشر لكن ع البشــــــر عــلاّك
مسك الختام بقدرته اصطفــاك .. والحكم حكمه والقــــــرار خــــذاه
ولا يختشي من هذا لا هــــذاك .. سوى يقول لا ولا ايقــول ايــــواه
ومعاك امهات المؤمنين نساك .. وبناتــك وهــــذا حــظ مــــن والاه
وأصحابك اللي بيهم الله حماك .. ومـــا خالفــــوا لك راي ولا اتجـاه
عليهم صلاه وسلام واستبراك .. م اللي استوى ع العرش وين بناه
صلى عليك الله .. يا تاج راسي يا رسول الله .. والملائكة صلى عليك الله