[الهائف]

ضاقت بي الدنيا وانا قبل مسرور ** وانت السبب يامرخص كل غالي
هذا وانا توي من اليوم مهجور ** وشلون لو لي عن فراقك ليالي
إن جاك مني ما يغيظك فمعذور ** والا ماهو حق تسن الجفاء لي
مجروح روح وخاطري منك مكسور ** رد النظر وابصر حبيبي بحالي
اين العزا عني وانا فيك مجبور ** الحب سلطان على القلب والي
ياغصن موز حدره الشط مفجور ** طاغي يميل به الهواء والدلالي
على جبينك جوهر الزين مسطور ** مكتوب في الدنيا وحيد الجمالي
هذا الجمال اللي توصّف به الحور** يكشف جنوب ومنور بالشمالي
ماخبر به مخلوق مخلوق من نور ** إلا انت ثالث شمسها والهلالي
أشهر بكثر الزين من كل مشهور ** واعلى بغير الزين من كل عالي