كنت فين يا حسن
-------------------------
كنت فين يا حسن واحنا بندور عليك
عارفين طبعا كنت أنا عازب
وكان الوقت كله مكاسب
واكتب شعر قافية وقالب
واسع صدرى مفيش تلاكيك
كنت فين يا حسن واحنا بندور عليك
فضلوا يزنو بقا على ودنى
اتجوز يا سيدنا لافندى
لما الصبر خلص من عندى
قلت وماله الله ما يوريك
كنت فين يا حسن واحنا بندور عليك
م السعودية جيت على طول
قلت جوازة وانا مسئول
نستحملها عرض وطول
برضو حياتى عايزة شريك
كنت فين يا حسن واحنا بندور عليك
وكنت ناوى اعزم خلانى
اخويا حمدى واخويا هانى
وعمى سعد لو كان جانى
كنت عشانه اجيب مزازيك
كنت فين يا حسن واحنا بندور عليك
بس سهى عليا ازاى
أيه اللى شغلنى عن دعواى
زعلان طبعا من جواى
صاحبى أقول له بروحى افديك
كنت فين يا حسن واحنا بندور عليك
والمهم دخلت الدنيا
من وقتها مفيش ولا ثانية
ضاعت دون أكلة والتانية
لحم كتير وحمام بفريك
كنت فين يا حسن واحنا بندور عليك
ومن يومها مكتبتش كلمة
قايد النور وبخاف م الضلمة
واملا بطنى بط وضلمة
م النت قلت يافكيك
كنت فين يا حسن واحنا بندور عليك
شوفوا م الآخر أنا مش جاى
قاعد آكل واشرب شاى
مبسوط انا بقا م اللى معاى
انسونى وبلاش تماحيك
كنت فين يا حسن واحنا بندور عليك
----------------------------------------------------
هانئ الجمل