[أحمد البستاوي]

أستاذنا الكبير .. أستاذ عادل صموئيل
ليا عند حضرتك طلب خاص جدا , له علاقة بالتاريخ
حضرتك طبعا عارف أن الأغاني في فترة الخمسينات و الستينات و أوائل السبعينات , و بالذات أغاني عبد الحليم و الفرقة الماسية اللي حضرتك كنت جزء منها شكلت جزء كبير جدا من الوعي الوطني في مصر و العالم العربي عموما .
و ارتبطت الأحداث بالأغاني , يعني مثلا ما ينفعش نفتكر أعياد الثورة من غير أغنية صورة صورة , أو السد العالي من غير أغنية قولنا ح نبني . أو النكسة من غير أغنية عدا النهار . أو التعبئة لحرب أكتوبر من غير أغنية أحلف بسماها و بترابها .
ما أعتقدش فيه أمثلة من أي بلد في الدنيا عبّرت فيه الموسيقى عن الأحداث و ارتبطت بيها زي أغاني عبد الحليم و منجزات ثورة يوليو .
لكن للأسف الشديد جزء كبير من التراث ده . و هو جزء لا يتجزأ من تاريخ مصر مهمش جدا .
مثلا فيه أغاني جميلة جدا
يا أهلا بالمعارك
عبد الحليم حافظ - صلاح جاهين - كمال الطويل - بمناسبة عيد الثورة 1965
البندقية أتكلمت
عبد الحليم حافظ - محسن الخياط - بليغ حمدي - بمناسبة التعبئة لحرب الاستنزاف
الدرس انتهى لموا الكراريس
شادية - صلاح جاهين - بليغ حمدي - بمناسبة ضرب مدرسة بحر البقر الأبتدائية
(الروابط من يوتيوب لعدم توفرها على المنتدى)
الأغاني دي غير مدونة , و أتمنى من كل قلبي يكون ليهم حظ مع حضرتك في التدوين .
أنا عارف طبعا أن الأغاني الوطنية , ممكن ما تكونش النوعية اللي الموسيقيين سواء محترفين أو هواه بيطلبوها أو يحاولوا يعزفوها . و ممكن كمان ما تكونش المزيكا اللي فيهم عظيمة أوي , يعني ممكن ما تكونش مفيدة أوي . لكن طلبي من حضرتك تدوينهم لأنهم بيشكلوا جزء مهم من تاريخ مصر . و عارف أنهم كتير و أننا بنتقل على حضرتك كتير , بس معلش استحملنا إحنا تلامذتك . . و لحضرتك الرأي الأول و الأخير طبعا
مع خالص أمنياتي لحضرتك بدوام الصحة و راحة البال