[عادل صموئيل]

ردا على اخى العزيز عمرو هنداوى
برضو من وحهة نظرى وقرائتى للى شفته وللى كان ممكن يحصل قبل ان الشتغل معاهم
عبد الحليم كان متعود على ملحنين معينين يعنى الموجى وبليغ وعبد الوهاب وكان زمان منير مراد ومحمود الشريف
رياض السنباطى حسب ما ان عرفته كان انسان مش اجتماعى يعنى من البيت للشغل ومن الشغل للبيت مش بيخرج يقعد فى اجتماعات ولاقعدات من اللى كان بيعملها عبد الحليم .. يعنى عبد الحليم كان بيسهر مع شلة .. او قول كان بيحب لو اتيحت الفرصة يسهر مع هذه الشلة وبالطبع فى الوسط الفنى كلمة شلة يعنى شغل يعنى اللى بيقعدوا مع بعض بيشتغلوا مع بعض ... وبعد فيلم ابى فوق الشجرة ... ونقول اشمعنى قلت ابى فوق الشجرة .. أخر فيلم عمله عبد الحليم والفيلم بيحتاج اغانى كتير فى سنة واحدة ... اما بعد الفيلم كان عبد الحليم بيعمل اغنية واحدة فى السنة وكانت اما بليغ او الموجى او عبد الوهاب ... واللى كانموجود او اللى انا شفته ان الاغانى دى بتكون معدة مسبقا ... اقصد فى السهرات او القعدات .. بيكون حد من الشلة بيشتغل فى اغنية وسمع حليم منها حتة وعجبته وحجزها للسنة الجاية واغنية تانية حجزها للسنة اللى بعدها ... او كذا اغنية زى يامالكا قلبى يعنى مكمن يعملها مع اغنية تانية وهكذا .. اقصد يعنى كان عنده جدول بحاجات حايعملها لمدة كذا سنة قدام .. يعنى لولا وفاته كان عمل من غير ليه وبعدها كان بليغ مجهز هو اللى اختار واللى غناها هانى شاكر من بعد ... من ضمن الاحتمالات ... ان حليم ابتدا بلون يغلب عليه الصبغة الموجية شوية ... وحتى لما عبد الوهاب عمل فوق الشوك فى البدايات كان برضه فى نفس الخط يعنى تحس انها اللون الى عبد الحليم رسمه لنفسه ... كان لون السنباطى تقيل بالنسبة لجمهور عبد الحليم ... بس كمان كان فيه مشكلة حصلت بين حليم وام كلثوم فى اوائل الخمسينات وام كلثوم كانت قطار يعنى بيدوس اى حد ... يعنى فاكرين قصة اسمهان لما القصبجى لحن لها وام كلثوم حذرته ان ما يعملش لها الحان ولما القصبجى استخسر اسمهان انه ما يعملش لها كمان كذا لحن ( ودول دلوقتى بيعتبروا من كنوز الموسيقى العربية يعنى لون مختلف جدا عن اغانيها التانية ) وانا مش فاهم ام كلثوم مابتحبش اسمهان ليه مع ان لونها كان يختلف عن لون ام كلثوم تماما وكانوا حاجة زى خطين مش ممكن يتلاقوا ... يعنى كان زمان فيه منيرة المهدية وحت ام كلثوم تقريبا مسحتها واحتلت مكانها ... بس كان فيه سبب ... منيرة المهدية كانت سوقية اوى يعنى اقرب لعالمة منها الى مطربة كبيرة ... وكان فيه جمهور مثقف جدا جدا فى الوقت ده لما ابتدت ام كلثوم تتعرف سابوا منيرة المهدية وجريوا ورا ام كلثوم وده اللى عمل لها المكانة الكبيرة دى .. لكن عمر ما اسمهان كانت حاتدخل فى نظام ام كلثوم زى ماقلت دى حاجة ودى حاجة تانية خالص ... من الممكن تكون ام كلثوم منعت السنباطى يتعامل مع عبد الحليم وبالطبع ام كلثوم بتعتبر روح الحان السنباطى يعنى لو غضبت عليه زى ما غضبت على القصبجى وقاطعته لكان السنباطى مات ..... يعنى فيه سر او حاجة انا شفت وعشت واشتغلت فى جزء كبير منها ... كان السنباطىاى لحن بيعمله لأى حد غير ام كلثوم ... كان بيجيب فرقة ويسجله تانى بصوته .. لأنه كان مش بيقتنع بحد 100% غير ام كلثوم يعنى لما اى مطربة تانى بتسجل لحن من الحانه كان بيحس ان فيه شىء ناقص ومكانش بيستريح إلا لما يسجل اللحن بصوته والتسجيلات دى موجودة ... او يكون السنباطى شاف اللى حصل للقصبجى وخاف ... وبرضه فيه النظرة الثاقبة اوى اوى للعبقرى السنباطى ( ودى من عندى انا ) انت لو سألتنى كخبير من هو عبد الحليم او ايه اللى عمل عبد الحليم وحطه بسرعة فى الصدارة ومانزلش منها لحد آحر لحظة ... حقول لك الاختراع العبقرى اللى اسمه عبد الحليم اللى صنعه محمد الموجى وبالذات محمد الموجى القديم ... يعنى ظالم وبتقول لى بكره ويامواعدنى بكرة انا بحس ان دول هم عبد الحليم ... اما اللى بعد كده يعنى عبد الوهاب وكمال الطويل وبليغ بناء اتعمل على الاساس اللى عمله محمد الموجى ... بعبقرية السنباطى قال انا ملك مع ام كلثوم ايه اللى يدخلنى فى قطاع تانى .. فهمتوا صقدى ؟ يعنى كان فيه مثلا شادية احلا اغنيها مع منير مراد .. ليلى مراد مع احمد صدقى ... الملحن العبقرى بيشتغل فى المنطقة اللى يبقى فيها الملك ... والله اعلم مع اطيب تحياتى