[عادل صموئيل]

احبائى اشكرك على تفاعلكم

انا لمابكتب النوتة على سرغة 130 معناها بضاعف زمن النوار تبقى بلانش والدوبل كروش تبقى كروش ... انا جربت حاجة لما بكتب العلامات كلبيرة الجم كده احيانا بيبقى فى اللحن حلية اوحاجة صغيرة مثل لمس حرف مينور او ماجير او حاجة زى عربة .. فى سرعة 80 او 90 لما تكون العلامات صغيرة لو حطيت الحرف ده حاتبقى شكلها مفزع ممكن ناس كتير تخاف من شكلها وتبعد عن النوتة كلها ..زائد حاجات تانى .. انا بالاضافة الى انى عازف كمان ومدون موسيقى انا مايسترو .. يعنى بشاور بإيدى اشغل اللحن واشاور بإيدى مع اللحن ... لو انا شاورت اللحن بسرعة 80 ولا 130 .. فى سرعة 80 ايدى بتبقى بطيئة اوى بحيث انى ممكن انا اغلط او العازفين يغلطوا لكن لما اشاور بسرعة 130 بتبقى ايدى سريعة والعازفين بيبقوا شايفين انا بعمل ايه .. عاملة زى لما تسوق سيارة لو الموتور واطى او اوى او انت ماشى بسرعة منخفضة اكتر من اللازم السيارة ممكن تبطل منك
لما نعيد الكلام عن الحليات ... انا ليه مصر على اللى انا بقوله .. لأن ربنا اكرمنى ان عزفت مع جميع اكبر عازفين فى مصر مع اكبر ملحنين فى مصر شفت ع الطبيعة ولمدة عشرين سنة ايه اللى بيحصل بالضبط ,, الحلية بتبقى نوعين اما حلية تجميلية او حلية من عضم الجملة او من صميم الجملة ... اللى من صميم الجملة يعنى امللحن عاملها وبيصر انها تتقال وهنا انا مجبر انى ادونها زى ماهو عايز حتى لو كانت صعبة ... اما الحلية اتجميلية احنا عمرنا ما بنكتبها ..ليه لأن دى بتبقى ذوق وبصمة العازف وانا لو كتبت حاجة ممكن العازف ذوقه احلى من ذوقى .. وحاجة معروفة جدا انك لو جبت جملة موسيقية وحطيتها قدام احلا عشر عازفين حتلاقى كل واحد منهم مكمن يحط فيها حليات غير التانى بس الملحن بيحب ايه ؟ حلية واحدة فقط فى مكانها امناسب تبقى تجميل ولاتؤثر على الجملة
اما لما بكتب جملة قرار او جواب ... عادة الجملة بتتكتب قرار والفرقة مع الملحن فى البروفات هو بيقول خلوا دى جواب ودى قرار والعازفين بيعملوا عليها علامات ... وايه الفرق بين الفرقة الماسية والفرق الاخرى ... كل عازف بيقول من مطرح ماهو عايز لو نص الفرقة قالت الازمة قرار ونصها جواب تطلع اللازمة مسلوخة ولو العازفين يدوا كله جواب على طول حايضيعوا الطرب .. تميز الفرقة الماسية انهم كلهم كانوا بيحسوا الازمة دى تتقال قرار ولا جواب من غير ما حد يقول لهم واطيب تحياتى