اقتباس:
المشاركة الأصلية كتبت بواسطة سيادة الرئيس
متردد من زمان في الكلام في هذا الموضوع
محلى عتاب إتنين
شرط المحبة
ما يقدرش حد يحكم في هذا الموضوع من غير زعل إلا إللي عاش في مصر و خاصة قاهرتها
من غير لف و لا دوران دي مش أم كلثوم
و أرجع لموضوع قاهرتها لكل طبقة فيها لكنتها الخاصة و لو حبيت أقسمهم لازم نرجع للثقافة المحيطه بكل طبقة
الأكسنت يا أخوانا أو الأكسون مش ممكن تكون أم كلثوم دي سهام
طب دلوقت حد يقول الراجل ده بيخرف يعني ساب الحمار و مسك في البردعه مش قادر يفرق بين الصوتين راح ماسك في الأكسنت
نعم الصوتين فيهم تشابه لحد كبير و خاصة في زالكم و تلكم الزمان لكن الفرق بينهم إن صوت الست مدملك حبتين يعني سمين شويه و لما تقارن أكتر عربك يا ست ملهاش حل رغم عشقي لتوحه لكن الست تحس إن فيه موزّه بتغني
و لا أقلل من قدر سهام فهى متمكنة
طيب يرجع مرجوعنا لموضوع اللكنة و هى الفيصل في الموضوع ببساطة لكنة سهام بلدي و لكنة الست إتربت على الغالي
يبقى موضوع الآنسة أم كلثوم في أول التسجيل أقول لكم و الأجر على الله لو فتحت الملف على أي برنامج صوت حا تشوف بعنيك اللزقه فين و للأسف ملزوقه وحش و با ين في طبيعة الصوت حتى لو كان مستخدم فيها التداخل
و طبعا أنا لا أقصد أخي علي يموت و لا أتهمه بذلك الفعل و لكن هوه ضحية نصاب أو دجال أو مدّعي أو أي حاجه من دي و بتاع و كده
مرفق الملفين صافيين بدون تعليقات و أترك لكم الحكم عليهما حتى لا نكون شركاء في تزييف التراث
و لك أن تقارن بما موجود لسهام في المنتدى
و صباح و مساء الفل حسب توقيتك المحلي
و فتح ودنك تاكل ملبن |
أنا مش مصري ولا عايش في مصر رغم حبي لكل فن مصري.
بس مع كل ده حبيت اقول لسيادة الرئيس ان معرفة أم كلثوم ورنة صوتها أو لكنتها اللي بتتكلم عنها معروفة عند كل العرب وغير العرب اللي بيحبو يسمعو الست. أنا عن نفسي بسمع ام كلثوم وانا عندي 5 سنين صدق ولا متصدقش، وكمان احب اقولك ان جدتي كانت بتنيمني في حجرها على دنجي دنجي.
مش عارف يا سيادة الرئيس لو سمعت خايف يكون حبك ليا شفقة عليا تقدر تفرق في اللكنة بينها وبين محلا عتاب اتنين وشرط المحبة ولا لا؟
كمان حبيت أقول وده من باب الاستغراب ليه فضلت كل المدة دي على شان تثير هذه القنبلة اللي حتمس في مصداقية ملفين محطوطين في كنوز المنتدى وبقالهم زمان.
على فكره انا حبيت اكتب كلامي ده باللهجة المصرية علشان اقول ان اللهجة دي معروفة بيها وبمفردتها في كل انحاء الوطن العربي مش زي لهجة غيرها. ومحاولة حصر فهم ومعرفة ام كلثوم على اللي عاش في القاهرة فيه اجحاف نوعا ما لحق الأشقاء العرب وقبلهم اهل اسكندرية اجدع ناس - شيلاه يا مرسي يا بوالعباس - وأهل بور سعيد بلد الحلواني اللي بنا مصر واهل طماي الزهايرة اللي منهم الست.
------------------------------------------
يا عندليب ما تخافش من غنوتك
قول شكوتك واحكي على بلوتك
الغنوة مش حتموتك، إنما...
كتم الغنا هو اللي حيموتك
عجبي
صلاح جاهين