صباح الفل و الياسمين على موسيقارنا الجميل
أنا أفتح صفحة الموسيقار قبل الإفطار وقبل الغذاء وقبل العشاء كل يوم كي أتملى من طلعته البهية.
وأكتفي بمحاولات عزف نوتاته الجميلة.
أنا عندي سؤال خارج موضوع طلب نوتات إذا أمكن:
هل يشترط في توزيع اللحن أن يكون من نفس مقام ( مقامات ) اللحن الأساسي ؟
وما الضابط في توزيع الجمل؟
لكم مني أجمل التمنيات !!
اخى العزيز
اهم حاجة فى التوزيع .. ان الموزع بيستخدم مادة اسمها الهارمونى ... ودى بيدرس فيها التوافق والتنافر بين النغمات اللى بتتسمع مع بعضها .... يعنى مثلا لما تكون نغمة دو ... اللى بيتنافر معاها دو دييز ورى وسى بيمول وسى ناتورايل .. لكن مى ومى بيمول وفا وصول ولا ولا بيمول ودو الجواب بيتوافقا معاها
وهنا الموزع مع كل نغمة موجودة فى اللحن الاساسى لما بيضع نغمة او نغمات معاها لازم يراعى اتوافق والتنافر ده عشان يطلع التوزيع منسجم مع اللحن يديه تجيل ولا يعطى نشاز
بالطبع من المفضل ان يكون الجملة اللى المزع بيضيفها من المستحسن ان تكون فى نفس المقام الاصلى او مقام بيحتولا على نفس علامات التحويل او بعض منها .. ليه .. لأن مثلا فى المقام الاصلى فيه نغمة مى بيمول مثلا .. مش معقول احط لها خط لحنى تانى من مقام فيه امى ناتوريل حايحصل نشاز ..
اما ضوابط التوزيع .. دى مش موضوع اكاديمى .. يعنى بيتاخد اكاديميا الشق العلمى وهو اقصى حدود استعمال مادة الهارمونى بطريقة صحيحة ... لكن بعد ماتستعمل المادة دى هنا بييجى الذوق ... يعنى زمان لما تشوف موسيقى الزمن الجميل .. كان 90% من الحان مش موزعة .. ام الموزعة .. بيبقى الملحن عامل جملة واحدة فقط تتوزع مش اللحن كله .. والجملة دى لازم يكون فيها مواصفات ان نغماتها طويلة يعنى بلانشات او روندات بحيث الملحن بيترك فراغ ان الموزع يحط عليها خطوط لحنية تانية يبقى واضح اللحن الاساسى بتاع الملحن وواضح حلاوة توزيع الموزع .. زى شغل محمد عبد الوهاب مثلا ... عمر ماعبد الوهاب كان يخلى الموزع يوزع اللحن كله ... لأن اللى انت حاتمسعه بيبقى ضاع اللحن الاساسى بتاع عبد الوهاب وانت سامع شغل الموزع ... دلوقتى لما بقى الموضوع سمك لبن تمرهندى تلاقى كل الاغانى والموسيقى موزعة ... وده خطورته على الموسيقى الشرقية حاجتين .. اولهم ان كل الالحان الاساسية بتضيع معالمها فى وسط الدوشة دى بحيث ان الملحن ممكن يسرق من نفسه يعنى يعمل فى لحن تانى جمل شبهها تماما .. او ان غيره يسرق منه .. لأن التوزيع بيغطى كتير على اللحن الاساسى ... وثانيا ان ضاعت قيمة التوزيع .. بمعنى لما تسمع زمان لحن لعبد الوهاب وانا قلت ان الملحن بيعمل مساحة للموزع هنا الموزع لازم يؤلف جمل موسيقية فى اللحن ده مش ممكن يعمل زيها فى لحن تانى .. لأنها واضحة ومسموعة وبتتحفظ .. لكن دلوقتى نفس التوزيع ممكن يتحط ف 30 لحن والجمهور ولا فاهم حاجة ... وده بالذات اللى يخلى الالحان دلوقتى كلها بقت شبه بعضها مش زى زمان اول ماتسمع رفين من اى اغنية تقول دى اغنية كذا مع اطيب تحياتى عادل صموئيل