[عادل صموئيل]

الفصل الثانى
فى الرسالة بتاعة الاخ وليد قال انه حاسس انه مضايق عشان زمن الفن الجميل راح والاضواء انحسرت عنى يعنى .. قلت له .. ان الفرقة الماسية لما انا دخلتها كان سنى عشرين سنة وكان متوسط اعمارهم 50 سنة .. وساعتها كان فيه نجوم كتير اوى .. لكن الله شاء وحصل الانهيار الفنى برحيل العمالقة وماجاش بعدهم امتداد ليهم زى ماكانوا هم امتداد للى قبلهم .. فى الوقت ده الزملاء فيه ناس منهم ركبوا الموجة يعنى اللى عمل فرقة واللى اشتغل فى حاجة من اجل الفلوس طبعا يعنى هم زيى كانوا مش بيطيقوا يسمعوا الاغانى الحديثة او بعد ماكانوا بيعزفوا مع مين .. يعزفوا مع ناس بتغنى وخلاص .. بالطبع لو كان استمر الزمن الجميل كان زمانى بقيت على الاقل رئيس فرقة كبيرة .. لكن الله شاء كده لكن بعث لى طرق تانية لأن مازال عندى طاقة اعمل شغل .. من اهمها منتدى سماعى وكل اللى انتم عارفينه .. ومن النوت اللى بتنزل والاخوة بياخدوها من كذا دولة ... وانظر تحت فى آخر الصفحة شوف اسماء مين دخل الاسبوع ده فقط حتلاقى عدد من الاسماء انت ماتعرفهاش وماتقدرش تعدهم .. بيدخلوا المنتى وياخدوا النوت ويحطوها فى عشرات المواقع انا معرفهاش او اشوفها صدفة .. يعنى انا بقلب ع النت الاقى مواقع نوتة ادخل حب استطلاع اشوف بيعملوا ايه الاقى معظم النوت هناك تدوينى وبأسمى عليها طبعا ... يعنى بيزيد عدد اللى بيشوفوا النوت من عشرات لملايين انا عايز ايه اكتر منكده .. حسيت انا مشهور دلوقتى اكتر من ايام الفرقة الماسية 100 مرة .. وبعدين كلامكم الجميل اللى انتم بتقلوه يعنى مواطن من دولة شقيقة بيقول هنا ومكتوب فوق فى صفحات ماضية مش انا اللى بقول : ان مفيش موسيقى فى بلده مايعرفش عادل صموئيل او مش بيشتغل من نوت عادل صموئيل .. طبعا الكلمة دى عندى احسن من عشرة مليون جنيه .. اخى تانى من المغرب قال انه كان فى حفلة فيها فرقة كبيرة اوى ومعاهم مطربين كبار من بيغنوا اغانى الزم الجميل المصرية وانه بعدالحفلة ماخلصت طلع يشوف الفرقة شاف الموسيقيين وهم بيلملموا النوت الموسيقية اللى عزفوا منها اكتشف ان معظمها من تدوين عادل صموئيل اللى هنا فى سماعى .. طبعا غير عشرات من المبتدئين قالوا ان عمرهم ماكانوا يحلموا انهم يعزفوا اغانى كتير اوى كانت صعبة لكن انا جعلتها سهلة وعزفوها ... وكتير منكم كان فيه نوت قديمة مكتوبة وهم طلبوا منى اعيد تدونها لهم لأنه مكتوبة صعبة او فيها حاجة ومختاجين لمستى اللى هم بيقولوا سحرية ... طبعا كده انا حسمت النقطة دى وآسف للإطالة لأن لسه عندى كلام كتير اوى استحملونى
اولا فيه ناس لما بيطلبوا نوت فاكرين انى عندى مخزن لنوت جميع الاغانى بتاعة مصر والدول العربية وانت بتطلب اغنية كذا انا بدخل المخزن اجيبها وانزلها .. وانى لو تأخرت عليك شوية او كتير معناها انى طنشت طلبك
فيه ناس منكم بيطلقوا على اسماء يعنى اللى يقول ملك التدوين فى العالم العربى او امبراطورمش عارف ايه .. طيب تخيل حضرتك انت لو جيت بيت ملك التدوين ده عنده ييجى كام نوتة ؟؟؟ اقول لكم ولا نوتة .. لأنى مش بحتاج النوت فى حاجة .. يعنى امتى انت تشوف عندى ورقة نوتة .. عندى 3 طابعات من المستحسن انى اطبع على ك واحدة منهم ورقة كل اسبوع عشان الطابعة تبقى جاهزة للطبع ف اى وقت ... بطبع عليها اى حاجة وغالبا بتكون من آخر نوتة مدونها واركنهم جنبى مش بستعملهم لحد ما يبقى كتير شوية فى البيت عايزين ينظفوا بيقولوا عايز دول اقول مش محتاجهم ف حاجة بياخدوهم يتخلصوا منهم يعنى ملف الانكور موجود وال pdf موجود والورق مالوش لازمة يعنى ..
فيه موضوع تانى وده للجميع ... انا بنزل نسخ ويندوز جديدة كذا مرة فى السنة ومع انى بحط ملفات الانكور فى اماكن لكن احيانا بتضيع الملفات القديمة , طبعا مفيش فرق لأن النوت نازلة ع المنتدى .. لكن لما حد بيطلب انى مثلا اعمل تعديل فى نوتة قديمة يعنى ارفعها او اخفضها لأى درجة .. بالطبع لازم اجيب ملف الانكور لأن البى دى اف ما ينفعش اعمل فيه اى تعديل .. هنا لو انا لقيت الانكور بعدلها وانزلها .. لو مالقيتش الانكور ما اقدر اعمل فيها حاجة .. بعض الاخوة نزلوا برنامج تحويل البى دى اف الى نوتة ... انا جربته بس بيعمل مشاكل كتير ومحتاج انزل انكور اصدار ؤقم خمسة وده كله مشاكل وبيطلع الملف كله مشاكل واقعد اصلح فيه وقت طويل ... كمان وجود برنامج انكور خمسة الى جوار انكور 4.55 اللى بشتغل فيه بيعمل لى مشلكة يعنى كل ما افتح انكور اكتب الاقى حاجات محذوفة انا بحطها عليه وافضل كل يوم احطها تانى وده طبعا بيعطلنى ...
حاجة تانى ... طبعا انتم عارفين ان انكور برنامج غربى .. يعنى لوكتبت عليه غربى زى ما انت عايز يشتغل لكن لما ادون عليه شرقى لازم اعمل تعديلات واختراعات واحيانا اكروبات وشقلباظات .. ومنها انى اخترعت لنفسى فونت بإسمى حطيت عليه احتياجاتى ... بحيث ان النوتة اللى انت بتشوفها دى لو شافها اللى صمم برنامج انكور حايتجنن ايه الحاجات الغريبة دى وجت منين ... طبعا انا على طول وكل يوم بتعلم جديد وبصلح من الامكانيات التقنية .. من اول ما ابتديت كنت بكتب الادليب بطريقة بس كانت بتعمل مشكلة لأنى متحايل اوى على البرنامج ,, لو عملت اى تعديل ولو لمسة قبل المكان اللى فيه الادليب ده ... كان الاديب بيتلخبط ويتشلفط وبيلخبط كل المكتوب بعده حتى لو مش ادليب .. طبعا ليه ؟ .. لأنى عملت حاجة غير البرمجة بتاعة البرنامج يعنى حطيت نوارات كتير فى مازورة هو مبرمج انو بياخد اقصى حد 4 نوارات ...
طبعا فى الحوار مع الناس الحلوة ومنهم الاخ الحبيب الدكتور وسام اكرم من العراق لفت نظرى لحاجة قال لى خلى الميزان حاجة كبيرة يعنى مثلا 11 على 2 هنا المازورة حتاخد 22 نوار طبعا مع اخفاء الميزان ( عشان ماتعرفوش اسرارنا ) وجربتها اكتشفت شىء مذهل ... الاول لما كنت بكتب كان لو البرنامج عزف المزورة بيقرا منها 4 نوارات فقط ويدخل ع اللى بعدها لذلك كنت مش بسمع الادليب يعنى ممكن يكون مش محبوك اوى ... زمان ايام الفرقة الماسية على فكرة كنا بنكتب طبعا بالقلم كان الادليب بيبقى تقريبى لكن المطرب حافظ واحنا بنمشى ورا المطرب يعنى كنا بنشوف فى النوتة فقط لو فيه لازم نرد بيها ع المطرب نعرف بس مكانها فين .. المهم انى جربت وطلعت نتائج مذهلة .. يعنى بقى البرنامج بيعزف لى الادليب .. مش بس كده .. ولكن اعطانى فرصة افضل اظبط فيه ةانسق فيه لحد ماوصلت لنتيجة دقة 99% .. ودى مش مسبوقة ... يعنى وانا بسمع اقول دى عايزة تطول شوية او تقصر شوية او احد هنا سكتة كروش يعنى مثلا .. وطبعا الفضل الاول يرجع لللأخ العزيز وسام اكرم انو نبهنى للموضوع ده ومن هنا ممكن اصلح فى اى نوتة بدون خوف على اى مشكلة تحصل .. وفاصل ونعود طبعا ماحدش منكم ملزم يقرا الكلام ده كله بس فيه كلام كتير عندى