[عادل صموئيل]

اخى العزيز عاصم المنشاوى
انت سألت فى موضوع صعب جدا ومتشابك لكن من حسن الحظ انك سألت الانسان الوحيد فى الدنيا اللى عاصر الموضوع ده .. وهو متشابك وملخبط عامل زى المكرونة الاسباجيتى لكن احساسى انه ممكن يثير اهتمام الكثير منكم .. ممكن اقول اللى يفتح بيه عليا ربنا
اول حاجة انتاج الاغانى اول حاجة محتاجين فلوس ... ومين اللى بيدفع الفلوس ... فيه حاجة اسمها صاحب الاغنية او صاحب المشروع .. وكمان فيه فرق بين التعامل من المطرب الكبير اوى والكبير والمتوسط والصغير ... ارخص حاجة لما الاذاعة المصرية بتطلب من مطرب اغنية يعنى مثلا من ام كلثوم اغنية ما ... يعنى مثلا مثلا زى اغنية عن الحج مثلا .. اولا بتكلم ام كلثوم وهى بتحدد المؤلف والملحن واجرها ... لو التلاتة وافقوا على الاجر اللى حددته الاذاعة وطبعا بيبقى مبحبح شوية .. بيبتدى الشغل على الفور بس طبعا بتبقى اغنية محدودة البروفات يعنى 4 او 5 ودى العازف مش بيقبض حاجة ع البروفات يعنى بيقبض حق التسجيل فقط .. وبيبقى اللحن ده ملك الاذاعة يعنى هى بعد كده ممكن تبيعه لشركة صوت القاهرة او لأى اذاعة دولة عربية ... اما الانتاج التانى بتاع الاذاعة .. بيبقى متحدد لها كل سنة ميزانية مبلغ ما لشراء اغانى ... طبعا هنا لو المبلغ ممكن يعمل 100 اغنية مع مطربين زى فايزة او وردة ممكن هم يعملوا شوية منهم كده وشوية مع المطربين الاصغر يعنى زى محمد قنديل وعبد اللطيف التلبانى .. الخ , لأن دول تكاليفهم اقل يعنى ممكن المبلغ الميزانية يعملوا بيهم 200 اغنية .. طبعا معظمهم بيبقوا يعنى حاجات اى كلام كده وبيتذاعوا فى الصبح ... اما الشغل التقيل يعنى مثلا اغنية زى انت عمرى ... المنتج الاصلى صوت القاهرة اللى هو بيتعامل مع ام كلثوم منفرداً . كل سنة هى بتعمل اغنية .. بيتكلموا معاها هى بتختار المؤلف والملحن واجرها فى الموضوع كله لحد ما يسجلوا الاغنية .. واجر الفرقة ككل .. طبعا بتراعى ان تاخد م الشركة مبلغ ما للعازفين فى البروفات الكتير وممكن تكمل ممن اجرها هى ( على اسا انها عملتهم من قبل كده ولو عملت بروفات اكتر طبعا الشغل حايبقى احلى والناس دى مايهمهاش الفلوس يعنى يهمها الذكرى والتاريخ ) وبالذات من اول انت عمرى نوعية الشغل اختلفت يعنى اللحن قبل كده كان يتعمل فى عشر بروفات بقى محتاج اكتر من 40 بروفة .. وييجى يوم التسجيل .. بعد تسجيل الاسطوانة العازف بيقبض اجره عن التسجيل واجره المتواضع عن البروفات ... وبيكون المؤلف والملحن والمطربة قبضوا اجرهم عن التسجيل ... بعدين بتيجى الحفلة ... المتعهد بيبع التذاكر بعدين قبل الحفلة بيكون دفع لأم كلثوم اجرها اللى بتاخده ف الوقت ده واجر الفرقة الموسيقية عن الحفلة .. ولو الحفلة مذاعة الاذاعة بتدفع مبلغ نظير الاذاعة على الهواء ونظير تسجيل الاغنية وشركة الاطوانات بتدفع حاجة للإذاعة نظير انها بتاخد نسخة من تسجيل الحفلة تعمله شرائط .. لكن فيه طبعا شروط ان شركة صوت القاهرة هى صاحبة الاغنية .. يعنى هى اللى بتبيعها للإذاعات العربية وهى صاحبة تسويق الشرائط فى العالم ... طبعا فيه حاجة اسمها جمعية الملحنين والمؤلفين كل حاجة فى الموضوع بتتسجل فيها عشان الحقوق ... بعدين ام كلثوم بيبقى ليها نسبة فى مبيعات الشرائط .. كمان فيه حاجة اسمها حق الاداء العلنى .. يعنى كل اذاعة فيها موظفين شغلتهم بيكتبوا كل يوم من الصبح لليل الاغانى اللى اتذاعت وبيطلع مبلغ للمطرب والملحن والمؤلف .. زمان طبعا لو كان ربع جنيه شوف كام محطة كان بيطلع لهم مبلغ حلو .. ومازال الورثة بياخدوه لحد دلوقتى ... لو الحفلة كانت مذاعة على التليفزيون ام كلثوم بتاخد اجر تانى غير اجر الاذاعة ...
نفس الكلام بالنسبة لحليم مثلا بس حليم عشان كان طول الوقت بيشتغل ع الفرقة الماسية وطبعا كل شغلها نوتة كانت البروفات قليلة اوى .. لكن من اول السبعينات .. لما الاغانى ابتدت تتطور بقت محتاجة بروفات اكتر طبعا اجره محدد ( يعنى زى ما قلنا من قبل ) هنا كان بيدفع اجر البروفات من جيبه الخاص .. بس فيه حاجة خطيرة اكتشفها بذكاءه اللى مش عادى .. ايه السلطنة الخطيرة بتاعة الفرقة بتاعة ام كلثوم .. مع انهم نفس العازفين بتوع الماسية .. اكتشف ان ام كلثوم بتشتغل من غير نوتة يعنى المحلن بيحفظ الفرقة بالعود .. بحيث ان العازف خلال ال 20 بروفة الاولى بيكون حفظ اللحن صم كأنه حافظة من عشر سنين .. وبعدين كل يوم فى البروفات الباقية بيعيد تانى ويحس اكتر ويجود اكتر وهى تتسلطن ... لما توفت ام كلثوم ومابقاش ع القمة غيره ابتدى يطبق النظرية دى يعمل 40 بروفة . منها العازف يحفظ للحن ع الآخر والاخطر ان الملحن الكبير كان كل ماتطول البروفات عمال بيكتف حاجات ويحذف حاجات ويزود حاجات لحد ما اللحن ممكن يتغير نصه
اما المطربين اللى زى فايزة ووردة نفس الكلام بس اجرهم اقل من حليم .. اما المطربين الاصغر ... كان بينتظر لحد ما الاذاعة تطلب منه اغنية او شركة تحب تعمل شريط .. وبيبقى عنده حصيلة يشتغل بيهم الحفلات ... بس طبعا شركة الاسطوانات بتجرى دايما ورا اللى بيجيب لها فلوس اكتر ... من اخطر المشاكل فى الفرق الموسيقية وبالذات الصغيرة السرقة .. يعنى مثلا رئيس فرقة كذا اجره من المتعهد كذا .. ممكن مشبيقسمالمبلغ ع العازفين بالعدل يعنى ممكن يحط فى جيبه نص المبلغ ويوزع الباقى .. ودى كانت خطورتها ان العازف لما يحس انه بيتسرق بيروح فرقة تانية تديه اجر اكتر ... الفرق الصغيرة كانوا بيقبضوا بعد الحفلة .. اما الفرقة الماسية .. كان ليها نظام تانى .. يعنى احنا كان لينا التسجيلات للمصريين والتسجيلات للعرب .. والحفلات والبروفات لما تكون طويلة يعنى لو لحن لفايزة بنعمل 7 بروفات كنا مش بنتحاسب عليهم يعنى بنتحاسب ع التسجيل والحفلة فقط على اساس ان الاغنية دى حانشتغلها حفلات كتير بعد كده .. كنا مش بنقبض كل يوم .. يعنى فيه موظف بيجمع مجموع شغلك طول الشهر ... واول الشهر بيديك 70% منه بيحوش لك الباقى .. بحيث ان فيه اشهر بيبقى الشغل قليل زى يناير وفبراير ( كان الموسيقيين بيسموهم ينايم وفقراير ) بيبقى الدنيا برد ومفيش حفلات هنا بيقبضك من اللى متوحوش لك من قبل على اسا انك بتاخد مبلغ قريب من الثابت كل شهر .. بس كان احلى حاجة طبعا حفلات الخارج يعنى اسبوع فى افخم فنادق وبنقبض بالدولار طبعا اجر الحفلة اكتر من مصر كتير
بس الشعور اللى مش حلو يعنى الاجور زمان بالنسبة للكل كانت ملاليم لما تقارنها بواحد معفن بياخد مليون جنيه فى الحفلة عشان يطلع يتنطط زى القرد .. يعنى ام كلثوم فى مصر عمر ماوصل اجرها 5000 جنيه .. وحليم كان بياخد بعدها اعلى اجر 7000 جنيه ووردة 5000 ... وانا تحت امركم فى اى سؤال بس رجاء تكتب سؤالك اوردك على طول ماحدش يعمل اقتباس لأن زى ما انتم شايفين الموضوع طويل اوى مع اطيب تحياتى