[عادل صموئيل]

الاخ العزيز عاصم المنشاوى

لما سيد مكاوى حب ان وردة تغنى اللحن .. مش بينفع انه هو يروح يعرض عليها إلا اذا كان ملحن لها من قبل .. يعنى الملحن والمطرب بعد ما يعملوا عمل او اكثر بيبقوا اصحاب وده يعزم ده .. وساعتها ممكن الملحن يقول للمطرب عندى حلجة حلوة او حتة لسه عاملها ويسمعه منها جزء والمطرب يقرر ياخدها ولا لأ .... اما عن اللحن نفسه ... وده انا اكتشفته كتير بخبرتى ( واقصد اى لحن ما ) فيه لحن ساعة ما الملحن يخلصه ويديه للمطرب اولا على شريط عشان يحفظه ودى اول مرحلة وبيتناقشوا فيه ممكن يحصل تعديلات وبتختلف طبعا من مطرب لمطرب ... اقصد ان فى المرحلة دى ممكن يكون اللحن مكتمل اوى بحيث ان كل ما يتكلموا فيه الملحن مش بيحس ان ممكن يتعمل فيه تعديلات ... وممكن يحصل العكس واللحن يتغير فيه تعديلات كتير ... المرحلة التانية لما اللحن بيتكتب هو طبعا بيتكتب مازورة مازورة وبنقف عند كل جملة ... ساعتها ممكن اللزمات الصغيرة اللى وسط الغنا الملحن بيغير فيها ... لأن فى الشريط الاول اللى قلت عليه بيبقى التركيز على الغنا .. اما لحظة التدوين ممكن الملحن يحس انها عايزة تتعدل .. او حاجة خطيرة انتم ماتعرفوهاش ... ساعات الملحن بيحس ان الغنا مجهد على المطرب بالذات طبعا لما يتقدم ف السن .. فممكن يطول اللزمات دى شوية بحيث يدى فرصة للمطررب يستريح وياخد نفسه ... كمان فيه حاجة تانى .. اول مرة المحلن بيسمع المطرب اللحن ع العود وبياخد باله لو حتة مش عاجبة المطرب وهنا ممكن بيغيرها بسرعة اما لو المطرب ما ابداش كده يبقى خلاص اللحن اعتمد كده ... هى الحاجات دى بتختلف من لحن للحن طبعا ... ووردة نفسها كانت عايزة التغيير لأنها غنت لبليغ كمية كبيرة من الاغانى يعنى محتاجة لون جديد ... كمان حاجة مهمة ... لو تلاحظ فى اللحن ان فى جمل وردة قالتها بلون بلدى اوى ام كلثوم كانت مش حتقولها كده ... كمان من مميزات اللحن ده انه بطىء يعنى من الطرب التقيل اوى ووردة كانت محتاجة حاجة زى كده بعد الاغانى السريعة اللى قالتها من قبل ... بس الخلاصة ان وردة ابدعت فيه مع اطيب تحياتى