[عادل صموئيل]

المشاركة الأصلية كتبت بواسطة مساعد محمد

الـسلام علـيكم ورحـمة الله وبـركاتـة

لـدي بـعض الاسئلة حـيرتني

أول سـؤال ماذا تعني لازمـة موسيقـية؟

السـؤال الثاني هـو D.S.Al Fine

لـماذا في أغلب النوتات العربـية يكــتب فقــط عــلامة $ Segno

بـدون لاتـكتب D.S.Al Fine

أو فقـط عـلامة الكـودا Coda Sign

بدون لا تكتب D.C. Al Coda

أعـذروني فا أنـا مسـتجد

شـكراً

الاخ العزيز
فيه فرق بين التدوين الموسيقى الشرقى والتدوين الغربى يعنى اتكلم الاول عن موضوع السينيو والكودا .. فى الغربى لازم تتقيد بالتدوين الاكاديمى اللى زى ما انت كاتب .. اما فى الشرقى نحن لانستعمل هذه المصطلحات ولكن بنستعمل وظائفها فقط ... وده معتادين عليه من اول ما بدأ التدوين فى مصر فى اواخر الثلاثينيات .. وبدأ العازفين فى استعمال النوت .. واخذ منه كل الدول العربية فأصبح ستايل واحد بحيث انى لما ادون نوتة يعزفها اى عازف فى اى دولة بدون ان تحدث لخبطة او لبس بسبب المصطلحات .. ولو بحثت الموضوع حتلاقى طريقتنا اسهل يعنى بستعمل العلامة فقط بدون كتابة .. يعنى اخطر موضوع هو موضوع المصطلح اللى بيستعمله الجميع .. عندك مثلا برنامج سبيليوس للتدوين بيدون ويعزف الربع تون ولكن انا لا استعمله لسبب خطير انو بيدون علامة النصف بيمول مقلوبة يعنى احنا متعلمينها وبنستعملها اللى شبه ال b هو بيدونها اللى شبه ال d ودى انا لو دونتها فيه ناس كتير حايتلخبطوا فيها ..
اما موضوع معنى كلمة لازمة .. ده برضو مصطلح فى الموسيقى الشرقية فقط وبيتكون من 3 حاجات وكلهم اسمهم لازمة .. اولا لما مطرب بيغنى والموسيقى بترد عليه دى اسمها لازمة ( فى وسط الغنا ) وموسيقى اى كوبليه اسمها لازمة ... ولطكن فيه كمان لازمة مايعرفهاش غير المحترفين اسمها لازمة انتظار وهى الجملة الموسيقية التى تسبق دخول الغناء مباشرة .. يعنى مثلا عندك المقدمة الموسيقية .. آخر جملة فى المقدمة اسمها لازمة الانتظار بتبقى مثلا مكتوبة فى النوتة لها مرجع يعنى تتعزف مرتين .. لكن المطرب ممكن يكون لسه ما اتسلطنش اوى او الجمهور لسه ما سكتوش ف المطرب بيخلى الفرقة تكررها كذا مرة لحد الجمهور ما يسكت او المطرب يبقى جاهز للغنا .. يعنى تلاحظها بالذات مع عبد الحليم ممكن تتكرر 7 او 8 مرات وتحت امرك فى اى اسئلة
مع اطيب تحياتى عادل صموئيل