[عاصم المنشاوى]

الأستاذ / عادل

سؤال...لو فيه أغنية والمطرب بيغنى قرار...واللازمة الموسيقية من الجواب ...حضراتكم كعازفين بتركزوا فى اللازمة أكتر من العزف وراه...ولاّ بتعزفوا وراه قرار على جواب ....طب والمبتدئ مش محترف يعزفها أزاى .؟؟..كمثال : الكوبلية الأول من موعود " تانى تانى تانى ...راجعين انا وانت تانى ...لحليم وبليغ ".أو مشغول وحياتك مشغول ...لحليم والموجى...ممكن واحد يقول طب ماتعزفها من القرار ...طبعا بتفقد كتير من حلاوتها لو ده حصل....
اخى العزيز
السؤال عادى فى الفرق الصغيرة لكن فى الماسية وام كلثوم خطير جدا جدا ... يعنى نقاء الصوت اللى انت بتسمعه بينتج من احنا بنقرا النوتة من المكان المكتوب يعنى الجملة انا مثلا لما بكتبها عادة بكتبها من القرار والجملة دى لو جملة موسيقية بتعزفها الفرقة لازمة يعنى بتبقى مرة من القرار ومرة من الجواب والفرقة بتبقى كلها عارفة الكلام ده من غير ما حد يقول .. وطبعا كلهم لازم يكونوا بيعزفوا من مكان واحد عشان الموسيقى ما تطلعش مسلخة .. اما غناء مع المطرب لازم يكون من المكان اللى هو بيغنى منه يعنى ما ينفعش المطرب يغنى من القرار وانا اعزف معها من الجواب انا كده اضعفه .. ولو تسمع كل معزوفاتى تلاقينى بقول من المكان الصح بتاع الجملة .. فيه جملة مثلا المطرب بيطلع ع الجواب اللحن كده زى قارئة الفنجان فى : مقدورك ان ... هنا لازم انا كمان اقول معاه من الجواب وكتير من اغانى فريد بيطلع جواب لازم الفرقة تقول من نفس المكان اللى بيقول منه عندك مثلا ام كلثوم فى الف ليلة وليلة بتوصل لجواب عالى اوى لازم الفرقة تقول زيها لكن طول الغنا طالما بتقول من القرار لازم الفرقة تقول معاها .. هو خطورة واهمية الكمنجات انها بتبطن صوت المطرب فلو قالت من نفس المكان تعمل لو بطانة جميلة لكن لو عزفوا من مكان تانى انت تحس ان الغناء مسلوخ ... يعنى اسوأ حاجة دلوقتى الاغانى الجديدة مفيش موضوع الكمنجات تلاقى المكرب بيغنى على الهوا مفيش تحته حاجة تسنده ولذلك الطرب مات معاهم اما انك تعزف انت من الجواب فى جملة اصلا قرار لو تعزفها قرار مرتين بعدين تعمل واحدة جواب يبقى تلوين لكن لو تعزف الكوبليه كلو جواب بيبقى المستمع متشعلق حاسس ان فيه حاجة مش مضبوطة والاجابات كلها فى معزوفاتى يعنى اهم شىء عندى بعزف الجملة من مكانها الصح
مع اطيب تحياتى عادل صموئيل